ການແຂ່ງຂັນໂອລິມປິກ 2016 ທີ່ປະເທດ ບຣາຊິນ ໃກ້ຈະປິດສາກລົງ ເຊິ່ງດຳເນີນການແຂ່ງຂັນ ມາຮອດວັນທີ 15 ຂອງການແຂ່ງຂັນແລ້ວ ແລະ ຈະມີພິທີປິດໃນວັນທີ 21 ສິງຫາ 2016 ນີ້.

ມື້ນີ້ພວກເຮົາໄດ້ສະຫຼຸບຜົນງານຂອງ ທັບນັກກິລາລາວ ທີ່ໄປສູ້ເສິກການແຂ່ງຂັນ ຊີງໄຊ ຢູ່ທີ່ບຣາຊິນ ມາໃຫ້ບັນດາທ່ານ ໄດ້ອ່ານດັ່ງນີ້:

1. ນາງ ແລນລີ້ ພຸດທະວົງ ລົງແຂ່ງກິລາແລ່ນ-ລານ ໃນລາຍການ ແລ່ນ 100 ແມັດຍິງ ຮອບຄັດເລືອກ ໃນວັນທີ 12 ສິງຫາ 2016 ລາວແລ່ນໃນ heat ທີ 2 ເຊິ່ງລາວສາມາດ ແລ່ນເຂົ້າເສັ້ນໄຊ ດ້ວຍເວລາ 12.82 ວິນາທີ ເປັນອັນດັບທີ 7 ຂອງ heat ທີ 2 ແລະ ເປັນອັນດັບ 16 ຂອງການແຂ່ງຂັນ ລາຍການນີ້ ບໍ່ສາມາດຜ່ານເຂົ້າຮອບຕໍ່ໄປ ແຕ່ລາວສາມາດ ທຳລາຍສະຖິຕິຂອງຕົນເອງ ທີ່ເຄີຍເຮັດໄວ້ 12.89 ວິນາທີ ໃນການແຂ່ງຂັນລາຍການແລ່ນ 100 ແມັດຍິງ ງານມະຫາກຳກິລາ ມະຫາວິທະຍາໄລ ອາຊຽນ ຄັ້ງທີ 18 ທີ່ປະເທດ ສິງກະໂປ.

2. ນາງ ສິຣິອາຣຸນ ບຸດຈະເລີນ ລົງແຂ່ງກິລາລອຍນ້ຳ ໃນລາຍການ Women’s 50 m freestyle ຮອບຄັດເລືອກ ໃຊ້ເວລາ 32.55 ວິນາທີ ໄດ້ອັນດັບທີ 76 ບໍ່ສາມາດຜ່ານເຂົ້າຮອບຕໍ່ໄປ ແຕ່ລາວສາມາດ ທຳລາຍສະຖິຕິຕົນເອງ ທີ່ຜ່ານມາໄດ້ຄື 33.71 ວິນາທີ.

3. ທ້າວ ອາຣິຍາ ພູນສະຫວັດ ລົງແຂ່ງກິລາລົດຖີບ ໃນລາຍການ Men’s road race ໄລຍະທາງ 256.6 ກິໂລແມັດ ລົງແຂ່ງໃນວັນທີ 06 ສິງຫາ 2016 ແຕ່ວ່າໜ້າເສຍດາຍ ລາວປັ່ນບໍ່ຮອດເສັ້ນໄຊ ຕາມໄລຍະເວລາທີ່ ການແຂ່ງຂັນກຳນົດໄວ້.

4. ທ້າວ ສຸກພະໄຊ ສິດທິສານ ລົງແຂ່ງກິລາເທຄວັນໂດ ໃນລາຍການ Men’s −60 kg ຮອບຄັດເລືອກ (Round of 64) ໃນວັນທີ  06 ສິງຫາ 2016 ພາດທ່າເສຍທີໃຫ້ຄູ່ແຂ່ງຈາກ ຈີນໄທເປ ບໍ່ສາມາດຜ່ານເຂົ້າຮອບຕໍ່ໄປ.

5. ທ້າວ ສັນຕິສຸກ ອິນທະວົງ ລົງແຂ່ງກິລາລອຍນ້ຳ ໃນລາຍການ Men’s 50 m freestyle ຮອບຄັດເລືອກ ໃຊ້ເວລາ 26.54 ວິນາທີ ໄດ້ອັນດັບທີ 69  ບໍ່ສາມາດຜ່ານເຂົ້າຮອບຕໍ່ໄປ.

6.  ທ້າວ ອານຸສອນ ໄຊສາ ລົງແຂ່ງກິລາແລ່ນ-ລານ ໃນລາຍການ Men’s 110 m hurdles ບໍ່ສາມາດຜ່ານຮອບຄັດເລືອກ (DNS).

ເຖິງຢ່າງໃດກໍ່ຕາມ ທີມງານ laosportnews ກໍ່ຂໍສະແດງຄວາມດີໃຈ ແລະ ເປັນກຳລັງໃຈໃຫ້ກັບ ທັບນັກກິລາລາວ ທຸກຄົນ ທີ່ໄດ້ເປັນຕົວແທນໃຫ້ກັບ ປະເທດລາວ ເຂົ້າຮ່ວມການແຂ່ງຂັນກິລາ ໂອລິປິກ 2016 ໃນຄັ້ງນີ້. ປະຊາຊົນລາວທຸກຄົນ ມີເອກອ້າງທະນົງໃຈ ແລະ ພາກພູມໃຈທີ່ເຫັນ ທຸງຊາດລາວ ໂບກສະບັດ ຢູ່ໃນການແຂ່ງຂັນລະດັບສາກົນ ຄືແນວນີ້ ແລະ ພວກເຮົາສັນຍາວ່າ ຈະຍັງສຶບຕໍ່ເປັນກຳລັງຈ ແລະ ຮ່ວມຊົມຮ່ວມເຊີຍ ນັກກີລາລາວ ຕະຫຼອດໄປ.

ຂອບໃຈຂໍ້ມູນ ແລະ ພາບຈາກ rio2016.com, laenly.phoutthavong

http://laosportnews.com/index.php/news/article/564