ພິທີມອບ-ຮັບລົດດັບເພີງ 2 ຄັນ ໃຫ້ອຳນາດການປົກຄອງແຂວງຊຽງຂວາງ ໂດຍບໍລິສັດ ພັດທະນາກະສິກຳ ລາວ-ຍີ່ປຸ່ນ ຈາກປະຊາຊົນເມືອງໂອໂກຢາມາ ໄດ້ຈັດຂຶ້ນໃນວັນທີ 26 ສິງຫາ 2013 ທີ່ຫ້ອງວ່າການປົກຄອງແຂວງຊຽງຂວາງ ຕາງໜ້າມອບໂດຍທ່ານ ສຈ. ຮາກິວາຣາ ຕາງໜ້າເມືອງໂອກາຍາມາ ແລະ ຕາງໜ້າຮັບໂດຍທ່ານ ພັນເອກ ບຸນມີ ແສງຄຳຢອງ ຫົວໜ້າກອງບັນຊາການປ້ອງກັນຄວາມສະຫງົບແຂວງຊຽງຂວາງ ໂດຍຊ່ອງໜ້າທ່ານ ສຈ.ດຣ. ສົມກົດ ມັງໝໍ່ເມກ ເຈົ້າແຂວງຊຽງຂວາງ ແລະ ທ່ານ ອິໂມຣິ ປະທານບໍລິສັດ ພັດທະນາກະສິກຳ ລາວ-ຍີ່ປຸ່ນ ທ່ານຜູ້ຕາງໜ້າສະຖານທູດຍີ່ປຸ່ນ ປະຈຳລາວ ພ້ອມດ້ວຍພາກສ່ວນທີ່ກ່ຽວຂ້ອງ.
ບໍລິສັດ ພັດທະນາກະສິກຳ ລາວ-ຍີ່ປຸ່ນ ແລະ ປະຊາຊົນເມືອງໂອໂກຢາມາ ໄດ້ນຳລົດຈຳນວນ 2 ຄັນ ລວມມູນຄ່າ 226.000 ໂດລາສະຫະລັດ ຫຼື ປະມານ 1.768 ລ້ານກວ່າກີບ ມອບໃຫ້ແກ່ກອງບັນຊາການປ້ອງກັນຄວາມສະຫງົບແຂວງຊຽງຂວາງ ໂດຍເປັນການຊ່ວຍເຫຼືອລ້າ ເພື່ອເປັນການຢັ້ງຢືນໃຫ້ເຫັນໝາກຜົນແຫ່ງສາຍພົວພັນມິດຕະພາບ ຄວາມສາມັກຄີ ແລະ ການຮ່ວມມືຍາວນານລະຫວ່າງລັດຖະບານ ສປປ ລາວ ແລະ ຍີ່ປຸ່ນ ທ່ານ ພັນເອກ ບຸນມີ ແສງຄຳຢອງ ໄດ້ກ່າວວ່າ: ການຊ່ວຍເຫຼືອລ້າພາຫະນະລົດດັບເພີງໃນຄັ້ງນີ້ ໄດ້ເປັນການປະກອບສ່ວນອັນສຳຄັນ ເຂົ້າໃນວຽກງານປ້ອງກັນສະກັດກັ້ນ ແລະ ຮັບປະກັນຄວາມສະຫງົບປອດໄພໃຫ້ແກ່ຊີວິດ ແລະ ຊັບສິນຂອງທັງພາກລັດ ແລະ ເອກະຊົນຢູ່ພາຍໃນແຂວງ ຄຽງຄູ່ກັນນັ້ນ ກໍເປັນອຸປະກອນອັນສຳຄັນຂອງເຈົ້າໜ້າທີ່ຕຳຫຼວດ ສະກັດກັ້ນ ແລະ ຕ້ານອັກຄີໄພ ໄປປະຕິບັດໜ້າທີ່ດັບມອດໄຟຢ່າງທັນການ ໂດຍຈະຄຸ້ມຄອງນຳໃຊ້ພາຫະນະດັ່ງກ່າວໃຫ້ມີປະສິດທິຜົນໃນຂັ້ນສູງສຸດ ແລະ ນຳໃຊ້ໄດ້ຍາວນານ ປັບປຸງກຳລັງຕຳຫຼວດປະຈຳການໃຫ້ຮັບປະກັນ ກຽມພ້ອມເຮັດໜ້າທີ່ຕະຫຼອດ 24 ຊົ່ວໂມງ ເມື່ອມີເຫດການເກີດຂຶ້ນຕ້ອງມີຄວາມວ່ອງໄວ ແກ້ໄຂເຫດການເກີດຂຶ້ນທັນເວລາ.