ສຳນັກຂ່າວລາວໂພສຕ໌ໄດ້ຮັບຈົດໝາຍ ພ້ອມຂໍ້ມູນເປັນຮູບຖ່າຍເອກະສານໄປສະນີ ໂດຍເນື້ອໃນຈົດໝາຍເວົ້າເຖິງບັນຫາເລັກນ້ອຍ ທີ່ຍັງເປັນຈຸດທີ່ຕ້ອງການຢາກໃຫ້ ໄປສະນີລາວມີການປັບປຸງຕື່ມ ເພື່ອຮັບໃຊ້ສັງຄົມຕາມແນວທາງນະໂຍບາຍຂອງພັກ-ລັດຖະບານ.
ຈົດໝາຍເລົ່າວ່າ: ຝາກເຄື່ອງຈາກອາເມກາ ທີ 19/7/16 ເຄື່ອງຮອດໄປສະນີລາວ ລູກຄ້າໄປຮັບເຄື່ອງທີ 26/7/16 ເເຕ່ນໍ້າຫນັກບໍ່ຄົບ 5 ໂລ. ກະເປົາເສຍ 14 ຫນ່ວຍ ເເລະ ຫນ່ວຍທີ່ເສຍກະມີເເຕ່ຫນ່ວຍງາມງາມຍີ່ຫໍ້ດັງໆທີ່ເປັນທີ່ນິຍົມຢູ່ລາວ ສີຂີ້ຮ້າຍພັດບໍ່ເສຍ ເບິ່ງຄືວ່າມີລັກສະນະຕັ້ງໃຈ. ຕາມການບອກເລົ່າຂອງລູກຄ້າ ຜູ້ທີ່ໄປຮັບເຄື່ອງຢູໄປສະນີບອກວ່າ ພະນັກງານໄປສະນີບອກວ່າເເກັດເເຕກ ພວກເຮົາພ້ອມດ້ວຍເຈົ້າຫນ້າທີ່ພາສີເລີຍເເກະກວດເບິ່ງ, ລູກຄ້າໄດ້ຖາມໄປອີກວ່າ ເປັນຫຍັງຈະເເກະເເກັດຂ້ອຍຄືບໍ່ຖ້າຂ້ອຍຜູ້ທີ່ເປັນເຈົ້າຂອງຊັບມາເບິ່ງນຳກັນ ເຈົ້າຫນ້າທີ່ບອກວ່າ ເເກັດເຈົ້າມັນເເຕກ ພວກເຮົາກັບເຈົ້າຫນ້າທີ່ພາສີເລີຍເເກະກວດເບິ່ງ ມັນເປັນກົດລະບຽບບໍ່ສາມາດໃຫ້ຜູ້ຮັບມາເບິ່ງນຳໄດ້ (ເເຕ່ພັດເເມ່ນຮອຍປາດດ້ວຍຂອງມີຄົມ ແລະ ບໍ່ມີຮອຍເເຕກຈັກນ້ອຍ).
ເຄື່ອງຈະເສຍຢູ່ພາຍໃນ ຫລື ປະເທດທາງຜ່ານກໍ່ເເລ້ວເເຕ່ ມັນກໍສ້າງຄວາມເສຍຫາຍໃຫ້ຜູ້ທີ່ໃຊ້ບໍລິການ ເເລະ ພາບພົດຂອງໄປສະນີລາວ ດັ່ງນັ້ນ, ໄປສະນີລາວຄວນຈະຕ້ອງມີການສືບທາວຫາວ່າແກັດແຕກມັນແຕກຢູ່ໃສ? ເຄື່ອງເສຍມັນເສຍຢູ່ໃສ? (ຕະຫຼອດການນຳສົ່ງສິນຄ້າ ຈາກອາເມລິກາ-ປະເທດລາວ) ເພື່ອຫາຄຳຕອບແກ່ລູກຄ້າ ຖ້າພົບເຫັນວ່າຄວາມເສຍຫາຍທີ່ເກີດຂຶ້ນ ເກີດຂຶ້ນຢູ່ຈຸດໃດຂອງການຂົນສົ່ງ ກໍຄວນໃຫ້ຈຸດນັ້ນທົດແທນຄ່າເສຍຫາຍ.
ໃນປັດຈຸບັນນີ້ ຄົນລາວຫລາຍຮ້ອຍຄົນກໍ່ພາກັນໄປຝາກເຄື່ອງຢູ່ໄປສະນີຫນອງຄາຍເເທນ ເພາະເຂົາເຈົ້າເຫັນວ່າມີຄວາມສະດວກ, ເຄື່ອງຮອດໄວ, ປອດໄພ ແລະຄ່າບໍລິການຖືກກວ່າ. ອັນນັ້ນແມ່ນໄດ້ສະເເດງໃຫ້ເຫັນເເລ້ວວ່າ ຄວາມເຊື່ອຫມັ້ນຂອງປະຊາຊົນຕໍ່ໄປສະນີລາວເເມ່ນມີນ້ອຍລົງ ຈິ່ງຮ້ອງຂໍໃຫ້ພາກສ່ວນທີ່ກ່ຽວຂ້ອງເເກ້ໄຂບັນຫານີ້ຕື່ມ ເພື່ອບໍ່ໃຫ້ເກີດມີບັນຫາອີກເເລະເປັນການປັບປຸງໃຫ້ດີກວ່າເກົ່າ ເພື່ອໃຫ້ຄົນລາວໄດ້ຫັນມາໃຊ້ການບໍລິການຂອງ ໄປສະນີລາວໃຫ້ນັບມື້ຫຼາຍຂຶ້ນ ຢ່າງພາກພູມໃຈ.
ດ້ວຍຄວາມເຄົາລົບ
ຈາກລູກຄ້າໄປສະນີລາວ
ຕິດຕາມເຮົາທາງFacebook ກົດຖືກໃຈເລີຍ!