ສາຍຕາເປັນອະໄວຍະວະສຳຄັນຢ່າງໜຶ່ງຂອງຮ່າງກາຍທີ່ເຮົາຄວນຕ້ອງດູແລຮັກສາຢ່າງດີທີ່ສຸດແຕ່ສຳລັບມະນຸດແວ່ນທັງຫລາຍທີ່ມີແວ່ນເປັນສັນຍະລັກບອກຢູ່ແລ້ວວ່າມີຄວາມຜິດປົກກະຕິບາງຢ່າງເກີດຂຶ້ນກັບສາຍຕາຂອງຕົນເອງກໍຄວນຕ້ອງເບິ່ງແຍງສຸຂະພາບດວງຕາໃຫ້ຫລາຍກວ່າປົກກະຕິມື້ນີ້ມີຄຳແນະນຳມາບອກຄົນທີ່ໃສ່ແວ່ນຄວນປະຕິບັດໂຕແບບໃດໃນຂະນະທີ່ຕ້ອງໃສ່ແວ່ນ
ຫລີກລ້ຽງການນອນອ່ານໜັງສື
ຄົນໃສ່ແວ່ນຕາບໍ່ຄວນນອນອ່ານຫນັງສືໃນລັກສະນະທີ່ນອນຮາບໄປກັບພື້ນແຕ່ຄວນຖືຫນັງສືໃຫ້ຫ່າງຈາກສາຍຕາປະມານ 30ຊັງຕີແມັດເປັນຢ່າງຫນ້ອຍເພາະເປັນໄລຍະແລະອົງສາທີ່ເໝາະສົມກັບການອ່ານຫນັງສືຂອງຄົນໃສ່ແວ່ນຕານັ້ນເອງ
ພັກສາຍຕາແນ່
ຖ້າກຳລັງອ່ານຫນັງສືຫລືນັ່ງເຮັດວຽກໜ້າຈໍຄອມພິວເຕີຢູ່ຄວນພັກສາຍຕາທຸກໆ 5-10ນາທີດ້ວຍການເບິ່ງອອກໄປໄກໆໃນໄລຍະ 6 ແມັດເປັນຢ່າງຕ່ຳໃຫ້ສາຍຕາຜ່ອນຄາຍຄວາມເມື່ອຍແນ່
ຢ່າຈ້ອງສິ່ງໃດໃກ້ເກີນໄປ
ພະຍາຍາມຢ່າຈ້ອງສິ່ງຂອງໃກ້ດວງຕາຫລາຍເກີນໄປເພາະການຈ້ອງສິ່ງຂອງຜ່ານແວ່ນຕາໃນໄລຍະໃກ້ໆອາດເປັນສາເຫດໃຫ້ສາຍຕາບໍ່ສາມາດຜັນກັບມາເປັນປົກກະຕິໄດ້ອີກ
ໃສ່ແວ່ນກັນແດດທຸກເທື່ອທີ່ອອກແດດ
ແສງແດດທໍາຮ້າຍດວງຕາເຮົາໄດ້ຫລາຍກວ່າທີ່ຄິດໂດຍສະເພາະກັບຜູ້ທີ່ມີຄວາມຜິດປົກກະຕິກັບດວງຕາຢູ່ແລ້ວ ຄວນຕ້ອງໃສ່ແວ່ນກັນແດດຄຸນນະພາບດີຫລືຢ່າງນ້ອຍໆຄວນໃຊ້ເລນສາຍຕາທີ່ມີຄຸນສົມບັດກອງແສງໄດ້ຫາກຕ້ອງອອກໄປເຮັດກິດຈະກຳກາງແຈ້ງຫລືຕ້ອງຂັບລົດສູ້ແດດດ້ວຍທຸກຄັ້ງ
ໃສ່ແວ່ນກອງແສງທຸກເທື່ອທີ່ຢູ່ໜ້າຈໍຄອມພິວເຕີ
ນອກຈາກແສງແດດຈະມີລັງສີຢູວີທີ່ທໍາຮ້າຍສາຍຕາເຮົາໄດ້ແລ້ວລັງສີຈາກຄອມພິວເຕີແລະແທັບເລັດທັງຫລາຍກໍໃຫ້ໂທດກັບສາຍຕາເຮົານໍາເຊັ່ນກັນດັ່ງນັ້ນທຸກເທື່ອທີ່ຕ້ອງໃຊ້ງານຈໍເຫລົ່ານີ້ຄວນໃສ່ແວ່ນທີ່ມີຄຸນສົມບັດກອງລັງສີນໍາອີກ
ອ່ານຫນັງສືໃນບ່ອນທີ່ມີແສງສະຫວ່າງພຽງພໍ
ເນື່ອງຈາກແສງສະຫວ່າງທີ່ບໍ່ເອື້ອອໍານວຍຕໍ່ການອ່ານຫນັງສືຈະຍິ່ງທໍາຮ້າຍສາຍຕາໃຫ້ເຮັດວຽກໜັກຈົນເມື່ອຍຫລາຍຂຶ້ນ
ບໍ່ຄວນອ່ານຫນັງສືໃນຂະນະທີ່ເຄື່ອນໄຫວ
ບໍ່ວ່າຈະນັ່ງລົດໃຫຍ່,ລົດໄຟ,ເຮືອບິນຫລືແມ່ນແຕ່ກຳລັງຍ່າງຢູ່ກໍບໍ່ຄວນໃຊ້ສາຍຕາອ່ານຫຍັງທັງໝົດບໍ່ຢ່າງນັ້ນຖ້າເກີດອາການປວດຮາກແລ້ວຈະວ່າບໍ່ເຕືອນ
ເບິ່ງໂທລະພາບໃນໄລຍະຫ່າງທີ່ເໝາະສົມສະເໝີ
ໄລຍະຫ່າງທີ່ເໝາະສົມສຳລັບການເບິ່ງໂທລະພາບຂອງຄົນທີ່ໃສ່ແວ່ນຕາຄວນຢູ່ຫ່າງໂທລະພາບປະມານ 1-3 ແມັດ
ຄຸນສົມບັດແວ່ນຕ້ອງແມ້ນຢໍາ
ຖ້າຢາກໃຫ້ວິໄສທັດໃນການເບິ່ງຊັດເຈນຂຶ້ນແນະນຳໃຫ້ເລືອກໃຊ້ເລນທີ່ມີຄຸນສົມບັດປ້ອງກັນແສງສະທ້ອນໄດ້ດີກວ່າ
ຄວບຄຸມຄວາມດັນໃຫ້ດີ
ນອກຈາກປັດໄຈພາຍນອກແລ້ວຄວນຕ້ອງເບິ່ງແຍງສຸຂະພາບພາຍໃນນໍາໂດຍສະເພາະລະດັບຄວາມດັນແລະລະດັບຄໍເລດເຕີລໍຄວນຢູ່ໃນລະດັບດີເພື່ອໃຫ້ຄວາມດັນໜ່ວຍຕາເປັນປົກກະຕິນັ້ນເອງ
ອາຫານໄຂມັນຕ່ຳຜັກແລະຫມາກໄມ້ທີ່ມີສີຂຽວ,ສີເຫລືອງແລະສີສົ້ມຈະອຸດົມໄປດ້ວຍແຄໂລທີນອຍຊຶ່ງເປັນສານອາຫານທີ່ຊ່ວຍບຳລຸງສາຍຕາໄດ້ເປັນຢ່າງດີສະນັ້ນຖ້າຢາກມີສາຍຕາທີ່ດີກໍຄວນກິນອາຫານເຫລົ່ານີ້ນໍາ
ເຊັກສາຍຕາທຸກໆ 6ເດືອນ
ສາຍຕາຂອງເຮົາຈະປ່ຽນທຸກໆ 6 ເດືອນຫລືຢ່າງຊ້າທີ່ສຸດກໍ 1ປີດັ່ງນັ້ນຄວນກວດວັດສາຍຕາຕາມເວລາທີ່ກຳນົດແລະເມື່ອສາຍຕາປ່ຽນກໍຄວນຕ້ອງປ່ຽນແວ່ນໃໝ່ນໍາ
ເຊື່ອຟັງໝໍ
ໃນກໍລະນີທີ່ໄປກວດສາຍຕາແລ້ວແພດແນະນຳໃຫ້ທ່ານເຮັດຫຍັງເພື່ອເປັນການປິ່ນປົວສຸຂະພາບຕາຊຶ່ງບາງຄຳແນະນຳກໍອາດຈະເບິ່ງເປັນເລື່ອງທີ່ທ່ານເຫັນວ່າບໍ່ສຳຄັນເທົ່າໃດແຕ່ຂໍຮ້ອງວ່າຢ່າດື້ກັບໝໍເລີຍດີກວ່າເພາະທຸກຄຳແນະນຳຈາກປາກໝໍນັ້ນຄືຄວາມຫວັງດີຕໍ່ສຸຂະພາບຕາຂອງຕົນເອງທັງໝົດ
ກໍໄດ້ຮູ້ແລ້ວວ່າຄວນຕ້ອງເບິ່ງແຍງສາຍຕາຂອງເຮົາແບບໃດແນ່ເມື່ອຍາມໃສ່ແວ່ນແຕ່ແທ້ໆແລ້ວຄົນບໍ່ໃສ່ແວ່ນແລະຄົົນທີ່ມີສາຍຕາປົກກະຕິກໍສາມາດເບິ່ງແຍງສາຍຕາຂອງດ້ວຍວິທີເຫລົ່ານີ້ໄດ້ຄືກັນ