ຖືເປັນຂ່າວທີ່ກຳລັງເປັນກະແສເທິງໂລກໂຊຊຽວກໍວ່າໄດ້ ສຳລັບການເຜີຍແຜ່ຂ່າວ “ການຕັດຕົ້ນໂພອາຍຸເກົ່າແກ່” ຢູ່ເຂດບ້ານຂຸນຕາທ່າ ເມືອງສີໂຄດຕະບອງ ນະຄອນຫຼວງວຽງຈັນ ຊຶ່ງມີຈຸດປະສົງແມ່ນເພື່ອຈະນຳໃຊ້ເນື້ອທີ່ດິນໃນຈຸດນີ້ສ້າງເປັນອາພາດເມັນທັນ ສະໄໝ.
ຕາມການບອກເລົ່າຂອງປະຊາຊົນທີ່ເປັນຄົນພື້ນທີ່ ຊຶ່ງອາໄສຢູ່ເຂດບ້ານດ່ັ່ງກ່າວໄດ້ເລົ່າໃຫ້ຟັງວ່າ ຕົ້ນໂພຕົ້ນນີ້ຖືເປັນຕົ້ນໄມ້ເກົ່າແກ່ທີ່ຢູ່ຄູ່ບ້ານມາຫຼາຍຊົ່ວຄົນ ມີຄວາມສູງປະມານ 30 ກວ່າແມັດ ຖືເປັນຕົ້ນໄມ້ທີ່ປະຊາຊົນໃຫ້ຄວາມເຊື່ອຖື ແລະ ເຄົາລົບ ມາແຕ່ລຸ້ນປູ່ຍ່າຕາຍາຍຈົນມາເຖິງລຸ້ນລູກລຸ້ນຫຼາຍ.
ຫຼ້າສຸດ ທີມງານຂ່າວລາວໂພສໄດ້ຮັບການຢັ້ງຢືນຢ່າງເປັນທາງການຈາກຫ້ອງການບ້ານຂຸນຕາທ່າວ່າ ຈາກການຕົກລົງເຫັນດີລະຫວ່າງເຈົ້າຂອງທີ່ດິນ ບໍລິສັດຮັບເໝົາກໍ່ສ້າງ ແລະ ອຳນາດການປົກຄອງບ້ານ ເປັນເອກະພາບເຫັນດີຈະບໍ່ມີການຕັດຕົ້ນໂພ ຕົ້ນດັ່ງກ່າວ ແຕ່ຈະແຕ່ງເຕີມໃຫ້ເໝາະສົມກັບສະພາບເສັ້ນທາງ ແລະສິ່ງກີດຂວາງຕ່າງໆຢູ່ເຂດບໍລິເວນນັ້ນ.
ໂດຍ: ສະຫະລັດ ວອນທິວົງໄຊ