ຂປລ. ກອງ​ປະຊຸມ​ສະ​ໄໝສາມັນ​ເທື່ອ​ທີ 1 ຂອງ​ສະພາ​ແຫ່ງ​ຊາດ ຊຸດ​ທີ VIII ຈະ​ໄຂ​ຂຶ້ນ​ໃນ​ວັນ​ທີ 24 ຕຸລາຫາ 18 ພະຈິກ 2016 ທີ່​ສະພາ​ແຫ່ງ​ຊາດ ​ເປັນ​ເວ​ລາ 20 ວັນ ບໍ່​ລວມວັນພັກລັດຖະການ ​ເຊິ່ງຈະ​ໄດ້​ຮັບຟັງ​ການ​ລາຍ​ງານ, ພິຈາລະນາ ​ແລະ ຕົກ​ລົງ​ບັນຫາ​ສຳຄັນ​ຂອງ​ຊາດ​ ເປັນ​ຕົ້ນ​ແມ່ນວຽກງານ​ລັດຖະບານ, ວຽກງານ​ສະພາ​ແຫ່ງ​ຊາດ, ວຽກງານ​ອົງການ​ກວດ​ສອບ​ແຫ່ງ​ລັດ, ວຽກງານ​ອົງການ​ໄອ​ຍະ​ການ​ປະຊາຊົນ ​ແລະ ສານ​ປະຊາຊົນ, ພິຈາລະນາ​ຮັບຮອງ​ເອົາຮ່າງ​ກົດໝາຍສ້າງ​ໃໝ່, ຮ່າງ​ກົດໝາຍສະບັບ​ປັບປຸງ ​ແລະ ປະກອບ​ຄຳ​ເຫັນ​ໃສ່​ຮ່າງ​ກົດໝາຍທາ​ບທາມ ລວມທັງໝົດ 16 ສະບັບ. ນອກ​ນັ້ນ​, ຍັງ​ພິຈາລະນາ​ບັນຫາ​ອື່ນໆ ຕາມ​ການສະ​ເໜີຂອງ​ສະພາ​ແຫ່ງ​ຊາດ ​ແລະ ລັດຖະບານ.

ທ່ານ ​ນາງ ສວນ​ສະ​ຫວັນ ວິ​ຍະ​ເກດ ກຳມະການ​ຄະນະ​ປະຈຳ​ສະພາ​ແຫ່​ງຊາດ, ​ເລຂາທິການ​ສະ​ພາ​ແຫ່ງ​ຊາດ ​ກ່າວ​ໃນ​ງານ​ຖະ​ແຫລ​ງຂ່າວ ກ່ຽວກັບ​ການ​ດຳ​ເນີນ​ກອງ​ປະຊຸມ ​ສະ​ໄໝສາມັນ ເທື່ອ​ທີ 1 ຂອງ​ສະພາ​ແຫ່ງ​ຊາດ ຊຸດ​ທີ VIII ​ໃນ​ວັນ​ທີ 19 ຕຸລາ​ນີ້ ວ່າ: ກອງ​ປະ​ຊຸມ​ຍັງ​ຈະໄດ້​ພິ​ຈາລະ​ນາ​ຮັບຮອງ​ເອົາ ບົດ​ລາຍ​ງານ​ຂອງ​ລັດຖະບານ ກ່ຽວກັບ​ການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-​ສັງຄົມ, ​ແຜນ​ງົບປະມານ​ແຫ່ງ​ລັດ, ນະ​ໂຍບາຍ​ເງິນຕາ ​ສົກ​ປີ 2015-2016 ​ແລະ ​ແຜນ​ພັດທະນາ​ເສດຖະກິດ-​ສັງຄົມ, ​ແຜນ​ງົບ​ປະມານ​ແຫ່ງ​ລັດ, ນະ​ໂຍບາຍ​ເງິນຕາ 2017, ພິຈາລະນາ​ຮັບຮອງ​ເອົາ​ ບົດ​ລາຍ​ງານ​ຂອງ​ລັດຖະບານ ກ່ຽວກັບ​ການ​ປັບປຸງ​ແຜນ​ງົບປະມານ​ແຫ່ງ​ລັດ 4 ປີ (2017-2020), ພິຈາລະນາ​ຮັບຮອງ​ເອົາ ບົດ​ລາຍ​ງານ​ຂອງ ​ອົງການ​ກວດກາ​ລັດຖະບານ ກ່ຽວກັບ​ການ​ແກ້​ໄຂ​ຜົນ​ການ​ກວດ​ສອບ ສົກປີ 2013-2014; ສຳລັບ​ວຽກງານ​ສະພາ​​ແຫ່ງ​ຊາດ ​ແມ່ນ​ໄດ້​ພິຈາລະນາ​ຮັບຮອງ​ເອົາ ບົດ​ລາຍ​ງານ​ຂອງ​ ຄະນະ​ປະຈຳ​ສະພາ​ແຫ່ງ​ຊາດ ກ່ຽວກັບ​ການ​ເຄື່ອນ​ໄຫວ​ວຽກງານ 6 ​ເດືອນ​ທ້າຍ​ປີ 2016 ​ແລະ ​ແຜນການ​ເຄື່ອນ​ໄຫວ​ວຽກງານປີ 2017 ຂອງ​ສະພາ​ແຫ່ງ​ຊາດ​ຊຸດ​ທີ VIII, ພິຈາລະນາ​ຮັບຮອງ​ເອົາ​ ການ​ເລືອກ​ຕັ້ງ​​ສະມາ​ຊີກ​ສະພາ​ແຫ່ງ​ຊາດ ຂອງ​ແຂວງ​ສະຫວັນ​ນະ​ເຂດ, ພິຈາລະນາ​ຮັບຮອງ​ເອົາ ບົດ​ລາຍ​ງານ​ຜົນ​ການ​ຕິດຕາມ​ກວດກາ ການ​ອອກ​ນິຕິ​ກຳ​ລຸ່ມ​ກົດໝາຍຂອງ​ລັດຖະບານ ​ແລະ ບົດ​ລາຍ​ງານ​ຜົນ​ການ​ຕິດຕາມ​ກວດກາ ການ​ນຳ​ໃຊ້​ສານ​ເຄມີ​ເປັນ​ພິດ ສົ່ງ​ຜົນ​ກະທົບ​ຕໍ່​ການ​ຜະລິດ ​ແລະ ຊີວິດ​ການ​ເປັນ​ຢູ່​ຂອງ​ປະຊາຊົນ, ສ່ວນວຽກງານອົງການ​ກວດ​ສອບ​ແຫ່ງ​ລັດ ​ແມ່ນ​ຈະ​ໄດ້​ພິຈາລະ​ນາ​ຮັບຮອງ​ເອົາ ບົດ​ລາຍ​ງານ​ຜົນ​ການ​ກວດ​ສອບ​ບົດ​ສະຫລຸບ​ຂາດ​ຕົວ ການຈັດ​ຕັ້ງ​ປະຕິບັດ​ແຜນ​ງົບ​ປະມານ​ແຫ່ງ​ລັດສົກ​ປີ 2014-2015, ພິຈາລະນາ​ຮັບຮອງ​ເອົາ ບົດ​ລາຍ​ງານ​ການຈັດ​ຕັ້ງປະຕິ​ບັດ ​ແຜນການ​ກວດ​ສອບ​ແຫ່ງ​ລັດ ສົກ​ປີ 2015-2016 ​ແລະ ​ແຜນການ​ກວດ​ສອບ​ແຫ່ງ​ລັດ ​ປີ 2017.

ນອກຈາກ​ນັ້ນ, ຍັງ​ຈະ​ໄດ້​ຮັບຮອງ​​ເອົາ ບົດ​ລາຍ​ງານ​ການ​ເຄື່ອນ​ໄຫວວຽກງານ 5 ປີ (2011-2015), ການ​ເຄື່ອນ​ໄຫວ​ວຽກງານ ສົກ​ປີ 2015-2016 ​ແລະ ທິດ​ທາງ​ແຜນການ​ເຄື່ອນ​ໄຫວ​ວຽກງານ 5 ປີ (2016-2020), ​ແຜນການ​ເຄື່ອນ​ໄຫວ​ວຽກງານ ປີ 2017 ຂອງ​ອົງການ​ໄອ​ຍະ​ການ​ປະຊາຊົນ​ສູງ​ສຸດ, ພິຈາລະນາ​ຮັບຮອງ​ເອົາ ບົດ​ລາຍ​ງານ​ການ​ເຄື່ອນ​ໄຫວ​ວຽກງານ 5 ປີ 2011-2015 ການ​ເຄື່ອນ​ໄຫວ​ວຽກງານ​ສົກ ​ປີ 2015-2016 ​ແລະ  ​ທິດ​ທາງ​ແຜນການ​ເຄື່ອນ​ໄຫວ​ວຽກງານ 5 ປີ 2016-2020 ​ແຜນການ​ເຄື່ອນ​ໄຫວ​ວຽກງານ​ ປີ 2017 ຂອງ​ສານ​ປະ​ຊາ​ຊົນ​ສູງສຸດ ​ແລະ ບັນ​ຫາ​ອື່ນໆທີ່​ສຳຄັນ​ຂອງ​ຊາດ.

ແຫລ່ງຂ່າວ:

ຕິດຕາມເຮົາທາງFacebook ກົດຖືກໃຈເລີຍ!