spot_img
Homeຂ່າວທ້ອງຖິ່ນເມືອງຫາດຊາຍຟອງ ຈັດກິດຈະກໍາສົ່ງເສີມ ແລະ ກວດສຸຂະພາບ ໃຫ້ປະຊາຊົນໂດຍບໍ່ເສຍຄ່າ

ເມືອງຫາດຊາຍຟອງ ຈັດກິດຈະກໍາສົ່ງເສີມ ແລະ ກວດສຸຂະພາບ ໃຫ້ປະຊາຊົນໂດຍບໍ່ເສຍຄ່າ

Published on

ຫ້ອງການກອງທຶນຄວບຄຸມຢາສູບ ແລະ ເຄື່ອງດື່ມທີ່ມີທາດເຫຼົ້າ ກະຊວງສາທາລະນະສຸກ ຮ່ວມກັບ ຫ້ອງການສາທາລະນະສຸກເມືອງຫາດຊາຍຟອງ ນະຄອນຫຼວງວຽງຈັນ ໄດ້ຈັດກິດຈະກໍາສົ່ງເສີມ ແລະ ກວດສຸຂະພາບໃຫ້ປະຊາຊົນໂດຍບໍ່ເສຍຄ່າຂຶ້ນໃນຕອນເຊົ້າວັນທີ 05 ມີນາ 2016 ທີ່ເດີ່ນດ້ານໜ້າຂອງຫ້ອງການສາທາລະນະສຸກເມືອງຫາດຊາຍຟອງ ໂດຍການເປັນປະທານຂອງ ທ່ານ ດຣ. ສຸລິວັນ ພົນເສນາ ຮອງຫົວໜ້າຫ້ອງການກອງທຶນຄວບຄຸມຢາສູບ ແລະ ເຄື່ອງດື່ມທີ່ມີທາດເຫຼົ້າ ກະຊວງສາທາລະນະສຸກ ທ່ານ ບຸນນະໄລ ສີຫາກຸນ ຫົວໜ້າຫ້ອງການສາທາລະນະສຸກເມືອງຫາດຊາຍຟອງ ມີບັນດາພະນັກງານແພດ ໝໍ ອໍານາດການປົກຄອງບ້ານອ້ອມຂ້າງ ແລະ ພໍ່ແມ່ປະຊາຊົນເຂົ້າຮ່ວມຈໍານວນຫຼາຍ.

ທ່ານ ດຣ. ສຸລິວັນ ພົນເສນາ ໄດ້ກ່າວວ່າ ກິດຈະກໍາໃນຄັ້ງນີ້ ແມ່ນນຶ່ງໃນວຽກງານທີ່ເປັນບຸລິມະສິດຂອງຫ້ອງການ ກອງທຶນຄວບຄຸມຢາສູບ ແລະ ເຄື່ອງດື່ມທີ່ມີທາດເຫຼົ້າ ກະຊວງສາທາລະນະສຸກ ຈັດຂຶ້ນເພື່ອສົ່ງເສີມສຸຂະພາບຂອງພໍ່ແມ່ປະຊາຊົນລາວບັນດາເຜົ່າໃຫ້ມີສຸຂະພາບແຂງແຮງດີ ທັງເປັນການສະໜອງຂໍ້ມູນຂ່າວສານດ້ານສາທາລະນະສຸກໃຫ້ປະຊາຊົນໄດ້ຮັບຊາບ ເປັນຕົ້ນ ກົດໝາຍວ່າດ້ວຍການຄວບຄຸມຢາສູບ ແລະ ກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າທີ່ສົ່ງຜົນກະທົບຕໍ່ສຸຂະພາບ ແລະ ນໍາໄປສູ່ການເຈັບປ່ວຍ ພິການ ແລະ ການເສຍຊີວິດ ທັງແນໃສ່ໃຫ້ປະຊາຊົນເຫັນໄດ້ເຖິງຄວາມສໍາຄັນໃນການຮັກສາສຸຂະພາບ ເຊິ່ງຕະຫຼອດການຈັດງານໃນຄັ້ງນີ້ ມີນັກວິທະຍາກອນ ແພດຊ່ຽວຊານ ຈາກສູນກາງ ແລະ ໂຮງໝໍເມືອງຫາດຊາຍຟອງ ຈໍານວນ 50 ທ່ານ ຮ່ວມກັນກວດສຸຂະພາບ ແລະ ໃຫ້ສຸຂະສຶກສາແກ່ປະຊາຊົນ ນອກນີ້ ຍັງມີການແຈກຢາຍຢາຕາມການບົ່ງມະຕິພະຍາດຂອງທ່ານໝໍໃຫ້ປະຊາຊົນໂດຍບໍ່ເສຍຄ່າ.

ທ່ານຮອງຫົວໜ້າຫ້ອງການກອງທຶນຄວບຄຸມຢາສູບ ແລະ ເຄື່ອງດື່ມທີ່ມີທາດເຫຼົ້າ ກະຊວງສາທາລະນະສຸກ ຍັງໃຫ້ຮູ້ຕື່ມອີກວ່າ ກິດຈະກໍານີ້ແມ່ນເລີ່ມຈັດຕັ້ງປະຕິບັດໂຄງການແຕ່ຕົ້ນເດືອນມັງກອນ 2016 ເຊິ່ງເລີ່ມກິດຈະກໍາຢູ່ເມືອງສີສັດຕະນາກ ນະຄອນຫຼວງວຽງຈັນເປັນຄັ້ງທໍາອິດ ສໍາລັບການຈັດກິດຈະກໍາຢູ່ເມືອງຫາດຊາຍຟອງ ເປັນຄັ້ງທີ 2 ຂອງໂຄງການ ແລະ ຈະສືບຕໍ່ຈັດຢູ່ບັນດາເມືອງຕ່າງໆພາຍໃນນະຄອນຫຼວງວຽງຈັນໃຫ້ຄົບ 9 ໂຕເມືອງ ໂດຍຄາດວ່າຈະໃຫ້ສໍາເລັດໃນເດືອນມິຖຸນາ 2016 ພ້ອມນີ້ ຍັງມີແຜນຈະຂະຫຽາຍໄປຍັງຊຸມຊົນ ຊົນນະບົດເຂດຫ່າງໄກສອກຫຼີກຢູ່ບັນດາແຂວງຕ່າງໆທົ່ວປະເທດ ດ້ວຍການຖອດຖອນບົດຮຽນຈາກການຈັດຕັ້ງປະຕິບັດໂຄງການສົ່ງເສີມ ແລະ ກວດສຸຂະພາບໃຫ້ປະຊາຊົນໂດຍບໍ່ເສຍຄ່າທີ່ໄດ້ຈັດຕັ້ງປະຕິບັດຢູ່ນະຄອນຫຼວງວຽງຈັນ ເພື່ອນໍາໄປຜັນຂະຫຽາຍ ແລະ ປະຕິບັດໃຫ້ມີປະສິດທິພາບ ແລະ ປະສິດທິຜົນ.
ຂໍ້ມູນຈາກ http://www.vtetoday.la/

ບົດຄວາມຫຼ້າສຸດ

1 ນະຄອນ ແລະ 5 ເມືອງຂອງແຂວງຈໍາປາສັກໄດ້ຮັບໃບຢັ້ງຢືນເປັນນະຄອນ – ເມືອງພົ້ນທຸກ

ຊົມເຊີຍ 1 ນະຄອນ ແລະ 5 ເມືອງຂອງແຂວງຈຳປາສັກໄດ້ຮັບໃບຢັ້ງຢືນເປັນນະຄອນ - ເມືອງພົ້ນທຸກ. 1 ນະຄອນ ແລະ 5 ເມືອງຂອງແຂວງຈໍາປາສັກ ຄື: ນະຄອນປາກເຊ,...

ສຶກສາຮ່ວມມືການຈັດລະບຽບສາຍສື່ສານ ແລະ ສາຍໄຟຟ້າ 0,4 ກິໂລໂວນ ລົງໃຕ້ດິນ ໃນທົ່ວປະເທດ

ບໍລິສັດໄຟຟ້າລາວເຊັນ MOU ສຶກສາຮ່ວມມືການຈັດລະບຽບສາຍສື່ສານ ແລະ ສາຍໄຟຟ້າ 0,4 ກິໂລໂວນ ລົງໃຕ້ດິນ ໃນທົ່ວປະເທດ. ໃນວັນທີ 5 ພຶດສະພາ 2025 ຢູ່ ສໍານັກງານໃຫຍ່...

ຕິດຕາມ, ກວດກາການບູລະນະ ເຮືອນພັກຂອງທ່ານ ໜູຮັກ ພູມສະຫວັນ ອະດີດການນໍາຂັ້ນສູງແຫ່ງ ສປປ ລາວ

ຄວາມຄືບໜ້າການບູລະນະ ເຮືອນພັກຂອງທ່ານ ໜູຮັກ ພູມສະຫວັນ ອະດີດການນໍາຂັ້ນສູງແຫ່ງ ສປປ ລາວ ວັນທີ 5 ພຶດສະພາ 2025 ຜ່ານມາ, ທ່ານ ວັນໄຊ ພອງສະຫວັນ...

ວັນທີ 1 ເດືອນພຶດສະພາ ຂອງທຸກໆປີ ເປັນວັນບຸນໃຫຍ່ຂອງຊົນຊັ້ນກຳມະກອນໃນທົ່ວໂລກ

ປະຫວັດຄວາມເປັນມາຂອງວັນກຳມະກອນສາກົນ 1 ພຶດສະພາ 1886 ມູນເຊື້ອ, ປະຫວັດຄວາມເປັນມາຂອງວັນກໍາມະກອນສາກົນ ຂອງຊົນຊັ້ນກຳມະກອນສາກົນ ແມ່ນໄດ້ກໍາເນີດເກີດຂຶ້ນໃນທ້າຍສະຕະວັດທີ XVIII ຫາຕົ້ນສະຕະວັດທີ XIX ຫຼາຍປະເທດໃນທະວີບເອີຣົບ ແລະ ອາເມລິກາ ໄດ້ສຳເລັດການໂຄ່ນລົ້ມລະບອບສັກດີນາ...