ເລີ່ມແຕ່ວັນທີ 1 ພຶດສະພາ 2025 ເປັນຕົ້ນໄປ, ຜູ້ທີ່ບໍ່ແມ່ນພົນລະເມືອງໄທທຸກຄົນ (ນັກທ່ອງທ່ຽວ, ຄົນຕ່າງປະເທດ) ທີ່ຈະເດີນທາງໄປປະເທດໄທ ຕ້ອງໄດ້ເຂົ້າຕື່ມແບບຟອມ (TDAC) ລິ້ງ https://tdac.immigration.go.th ທາງອອນລາຍ ພາຍໃນ 3 ມື້ ກ່ອນເດີນທາງເຂົ້າໄທ. (ພາຍໃນ 3 ມື້ໝາຍເຖິງ ຕື່ມຂໍ້ມູນໃສ່ແບບຟອມອອນລາຍກ່ອນ 3ມື້, 2 ມື້, 1 ມື້, 2 ຊົ່ວໂມງ, 1 ຊົ່ວໂມງ ກ່ອນເດີນທາງ ແມ່ນໄດ້ໝົດ)

• ແບບຟອມອອນລາຍ TDAC ແມ່ນຫຍັງ?
  TDAC ຫຼື ຊື່ເຕັມແມ່ນ THAILAND DIGITAL ARRIVAL CARD ຄື ແບບຟອມອອນລາຍທີ່ຂຽນຂໍ້ມູນກ່ອນເດີນທາງເຂົ້າປະເທດໄທ ເຊິ່ງແຕ່ກ່ອນ ກໍຄືການຂຽນຂໍ້ມູນຂອງການເດີນທາງໃສ່ເຈ້ຍ ຕມ. 6 ທີ່ລະບຸຂໍ້ມູນຜູ້ເດີນທາວ ຊື່, ນາມສະກຸນ ປະຫວັດການເດີນທາງມາຈາກໃສ? ດ້ວຍພາຫະນະຫຍັງເປັນຕົ້ນ ເມື່ອຂຽນແລ້ວກໍແນບໃສ່ກັບພາສປອດເພື່ອໃຫ້ເຈົ້າໜ້າທີ່ກວດ ແລະ ຈ້ຳປຶ້ມ.
• ການເຮັດແບບຟອມ TDAC ຂຶ້ນມາກໍເພື່ອຄວາມສະດວກວ່ອງໄວ ແລະ ສາມາດຕື່ມຜ່ານອອນລາຍລ່ວງໜ້າໄດ້. ເຊິ່ງເມື່ອກ່ອນການຂຽນຂໍ້ມູນຜ່ານເຈ້ຍ ເຮັດໃຫ້ມີຄວາມລ່າຊ້າ ເພາະຕ້ອງໄດ້ເອົາເຈ້ຍດັ່ງກ່າວເມື່ອຮອດດ້ານເທົ່ານັ້ນ.
• ຜູ້ໃດແດ່ທີ່ຕ້ອງຕື່ມແບບຟອມອອນລາຍ TDAC ?
  ຄົນທີ່ບໍ່ໄດ້ຖືພາສປອດປະເທດໄທ (ນັກທ່ອງທ່ຽວ, ຄົນຕ່າງປະເທດ)
  ສ່ວນຄົນທີ່ຖືພາສປອດໄທຢູ່ແລ້ວ ສາມາດເດີນທາງເຂົ້າໄດ້ເລີຍໂດຍບໍ່ຕ້ອງຂຽນ.
• ຂັ້ນຕອນການຕື່ມຟອມອອນລາຍ TDAC ແມ່ນແນວໃດ?
  ຜູ້ທີ່ຈະເດີນທາງໄປປະເທດໄທ ຕ້ອງໄດ້ເຂົ້າຕື່ມແບບຟອມ (TDAC) ຜ່ານລິ້ງ https://tdac.immigration.go.th/arrival-card/#/home ພາຍໃນ 3 ມື້ ກ່ອນເດີນທາງເຂົ້າໄທ. (ພາຍໃນ 3ມື້ ໝາຍເຖິງຕື່ມກ່ອນ 3ມື້, 2ມື້, 1ມື້, 2 ຊົ່ວໂມງ, 1 ຊົ່ວໂມງ ກ່ອນເດີນທາງ ແມ່ນໄດ້ໝົດ)
• ເມື່ອຮອດມື້ເດີນທາງ, ຮອດດ່ານໄທ ກໍສະແດງຄິວອາໂຄ້ດຜ່ານສະມາດໂຟນໃຫ້ເຈົ້າໜ້າທີ່ ແລະ ລໍຖ້າຈໍ້າພາສປອດຕາມປົກກະຕິ. ສຳລັບຜູ້ທີ່ບໍ່ມີສະມາດໂຟນ ເຊິ່ງແມ່ນລູກຫຼານຕື່ມຂໍ້ມູນໃຫ້ ກໍສາມາດປິ້ນເອກະສານທີ່ມີຄິວອາໂຄ້ດ ແລ້ວແນບໃສ່ກັບປຶ້ມພາສປອດໄດ້.
  #ສຳລັບປຶ້ມຜ່ານແດນ (ປຶ້ມສີຟ້າທະເລ) ຫຼື ເອກະສານຜ່ານແດນຊົ່ວຄາວ (ເດີນທາງໄປ-ກັບ ຈັງຫວັດອຸດອນ, ຈັງຫວັດໜອງຄາຍ ປະເທດໄທ ດ້ວຍເວລາກຳນົດພຽງ 3 ວັນ) ແມ່ນບໍ່ຕ້ອງຕື່ມແບບຟອມອອນລາຍ (TDAC) ກໍສາມາດເດີນທາງເຂົ້າ-ອອກໄດ້ປົກກະຕິ.

ທັງນີ້, ຄິດວ່າຊ່ວງທຳອິດຂອງການປະຕິບັດກ່ຽວກັບການຕື່ມຂໍ້ມູນ TDAC ອາດຈະມີເຄົາເຕີເຈົ້າໜ້າທີ່ຄອຍໃຫ້ຄຳປຶກສາ-ກວດສອບ ເອກະສານ ເພື່ອເຮັດໃຫ້ສະດວກ ແລະ ສາມາດເດີນທາງໄດ້ໄວ.

ຢ່າງໃດກໍຕາມໃນການຂຽນແບຟອມອອນລາຍໃນຊ່ວງທຳອິດແມ່ນຈະມີຄວາມຫຍຸ້ງຍາກເນື່ອງຈາກເວັບໄຊ້ຂຽນແບບຟອມອອນລາຍມີພຽງ 5 ພາສາ ກໍຄື: ອັງກິດ, ຍີ່ປຸ່ນ, ຣັດເຊຍ, ຈີນ ແລະ ເກົາຫຼີ ແຕ່ທ່ານສາມາດໃຫ້ຄົນອື່ນທີ່ມີຄວາມເຂົ້າໃຈ ແລະ ຂຽນແບບຟອມເປັນໃຫ້ຂຽນຂໍ້ມູນຂອງທ່ານແທນກໍໄດ້.