ຫວຽດນາມປັບແຜນການຮຽນຄັ້ງສຳຄັນໃນປະເທດ ໂດຍຕັ້ງເປົ້າໃຫ້ພາສາອັງກິດເປັນພາສາທີສອງ ພາຍໃນປີ 2035 ເຊິ່ງຈະຄ່ອຍໆເລີ່ມໃນແຕ່ລະໂຮງຮຽນທົ່ວປະເທດ.
ສຳລັບໂຄງການນີ້ ແມ່ນເລີ່ມແຕ່ປີ 2025 ໄປຈົນເຖິງປີ 2035 ແລະ ມີແຜນຈະຂະຫຍາຍໄປຕື່ມຈົນຮອດປີ 2045 ໂດຍກຳລັງຄັດເລືອກວິທະຍາໄລ ແລະ ໂຮງຮຽນ ເພື່ອເລີ່ມແຜນການ.
ທ່ານ ຟາມ ຫງ໋ອກ ເທືອງ (Pham Ngoc Thuong) ລັດຖະມົນຕີກະຊວງສຶກສາທິການ ເນັ້ນຢໍ້າເຖິງຄວາມສຳຄັນຂອງການຮໍ່າຮຽນຈາກປະສົບການນານາຊາດ ເພື່ອປັບແກ້ຂະແໜງການສຶກສາໃຫ້ເໝາະສົມໃນປະເທດ ໃຫ້ນັກຮຽນ-ນັກສຶກສາມີຄຸນນະພາບດ້ານພາສາ ພ້ອມກ່າວວ່າ: ໂດຍບົດບາດການປ່ຽນແປງທາງດິຈິຕອນ ແລະ ການປະຍຸກໃຊ້ເທັກໂນໂລຢີໃນການສອນ ສາມາດຫຼຸດຊ່ອງວ່າງໃນລະດັບພາກພື້ນ ທັງປະຢັດເວລາ ແລະ ຫຼຸດຜ່ອນແຮງງານນຳອີກ.
ນອກຈາກນີ້, ໂຄງການດັ່ງກ່າວ ກໍໄດ້ກຳນົດເປົ້າໝາຍສະເພາະສຳລັບການບູລະນະພາສາອັງກິດເປັນພາສາທີສອງ ໃນລະດັບການສຶກສາ ພາຍໃນປີ 2035 ໂຮງຮຽນອະນຸບານທີ່ຢູ່ໃນເປົ້າໝາຍ (ເດັກ 3-5 ປີ) ທັງໝົດຈະນຳພາສາອັງກິດມາໃຊ້ແບບ 100% ພາຍໃນປີ 2035.
ຍັງໃຫ້ຮູ້ຕື່ມວ່າ: ພາຍໃນປີ 2035 ນັກຮຽນທຸກລະດັບຕັ້ງແຕ່ຊັ້ນປະຖົມຈົນຮອດຊັ້ນມັດທະຍົມ ຈະຕ້ອງຮຽນພາສາອັງກິດເປັນພາສາທີ 2 ໃນລະດັບ 1,2 ແລະ ໂຮງຮຽນທັງໝົດຈະເປີດສອນລະດັບຂັ້ນສູງ 4,5 ແລະ 6 ພາຍໃນປີ 2045 ເຊັ່ນດຽວກັບມະຫາວິທະຍາໄລທັງໝົດຈະນຳລະດັບ 4,5 ແລະ 6 ມາໃຊ້.
ຈຸດມຸ່ງໝາຍກໍເພື່ອເພີ່ມທັກສະຄວາມສາມາດ ເພື່ອຕອບສະໜອງຄວາມຕ້ອງການເຮັດວຽກໃນຍຸກປັດຈຸບັນ. ນອກນີ້, ພາສາອັງກິດຈະບໍ່ພຽງແຕ່ເປັນວິຊາໜຶ່ງເທົ່ານັ້ນ ແຕ່ຍັງຈະສອນວິຊາອື່ນໆທີ່ເໝາະສົມອີກດ້ວຍ.
ທີ່ມາ: vnexpress