ຊົມເຊີຍ 1 ນະຄອນ ແລະ 5 ເມືອງຂອງແຂວງຈຳປາສັກໄດ້ຮັບໃບຢັ້ງຢືນເປັນນະຄອນ – ເມືອງພົ້ນທຸກ.
1 ນະຄອນ ແລະ 5 ເມືອງຂອງແຂວງຈໍາປາສັກ ຄື: ນະຄອນປາກເຊ, ເມືອງໂພນທອງ, ປາກຊ່ອງ, ບາຈຽງຈະເລີນສຸກ, ຈໍາປາສັກ ແລະ ເມືອງໂຂງ ໄດ້ຮັບໃບຢັ້ງຢືນເປັນນະຄອນ – ເມືອງພົ້ນທຸກ ປະເມີນຕາມດໍາລັດ 348/ລບ, ລົງວັນທີ 16 ພະຈິກ 2017 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ.
ການມອບໃບຢັ້ງຢືນເມືອງພົ້ນຄັ້ງນີ້ ຈັດຂຶ້ນໃນວັນທີ 6 ພຶດສະພາ 2025, ໃນໂອກາດທີ່ແຂວງຈໍາປາສັກ ຈັດກອງປະຊຸມສະຫຼຸບວຽກງານກໍ່ສ້າງຮາກຖາກການເມືອງ, ວຽກງານພັດທະນາຊົນນະບົດ ແກ້ໄຂຄວາມທຸກຍາກ, ວຽກງານ 3 ສ້າງ ໃນໄລຍະ 2024 ແລະ ວາງທິດທາງແຜນການ 2025 ພ້ອມທັງຮັບຮອງຜົນການປະເມີນມາດຖານພົ້ນທຸກ ແລະ ມາດຖານພັດທະນາຕາມດຳລັດ 348/ລບ ປະຈໍາປີ 2024.
ສຳລັບການມອບໃບຢັ້ງຢືນ ເມືອງພົ້ນທຸກ ແລະ ເມືອງເຂັ້ມແຂງຮອບດ້ານ ຕາມມາດຕະຖານເມືອງພົ້ນທຸກ ແມ່ນເມືອງທີ່ມີເງື່ອນໄຂຄົບຖ້ວນ 9 ມາດຕະຖານ ຄື: ມີໂຮງຮຽນມັດທະຍົມສົມບູນ; ມີໂຮງໝໍເມືອງ ຫຼື ເຂົ້າເຖິງການບໍລິການຂອງໂຮງໝໍແຂວງ ຫຼື ສູນກາງ; ເທດສະບານເມືອງ ໄດ້ຊົມໃຊ້ນໍ້າປະປາຊຸມຊົນ ຫຼື ລະບົບນໍ້າປະປາ; ເທດສະບານເມືອງ ໄດ້ຈັດຕັ້ງປະຕິບັດຕາມແຜນຜັງ; ມີເສັ້ນທາງເຂົ້າເຖິງທຽວໄດ້ຕະຫຼອດປີ ແລະ ເຊື່ອມຈອດກັບທຸກໆບ້ານ ພາຍໃນເມືອງ; ມີລະບົບໂທລະຄົມມະນາຄົມ, ການຂົນສົ່ງ ແລະ ຂໍ້ມູນຂ່າວສານ; ມີຕະຫຼາດຊື້-ຂາຍສິນຄ້າ ເປັນປົກກະຕິ; ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຮັບການຄຸ້ມຄອງ, ປົກປັກຮັກສາ ແລະ ນໍາໃຊ້ຢ່າງມີປະ ສິດທິຜົນ ແລະ ມີບ້ານພົ້ນທຸກຫຼາຍກວ່າ 70% (ເຈັດສິບສ່ວນຮ້ອຍ) ຂຶ້ນໄປ ຂອງຈໍານວນບ້ານທັງໝົດພາຍໃນເມືອງ. ເມືອງທີ່ບໍ່ບັນລຸ 9 ເງື່ອນໄຂຂ້າງເທິງນີ້ ຖືວ່າເປັນເມືອງທຸກ.
ນອກນີ້ ຍັງໄດ້ມອບໃບຢັ້ງຢືນເມືອງເຂັ້ມແຂງຮອບດ້ານ ໃຫ້ແກ່ນະຄອນປາກເຊ, ເມືອງໂພນທອງ ແລະ ເມືອງປາກຊ່ອງ ຕາມມາດຕະຖານເມືອງເຂັ້ມແຂງຮອບດ້ານ ເຊິ່ງເປັນເມືອງທີ່ມີເງື່ອນໄຂຄົບຖ້ວນ 10 ມາດຕະຖານ ຄື: ລະບົບການເມືອງໜັກແໜ້ນ ເຂັ້ມແຂງ; ມີຄວາມເຂັ້ມແຂງທາງດ້ານປ້ອງກັນຊາດ ແລະ ປ້ອງກັນຄວາມສະຫງົບ; ມີພື້ນຖານໂຄງລ່າງດ້ານການຜະລິດ ແລະ ການບໍລິການທີ່ໜັກແໜ້ນ; ແຜນຜັງເມືອງດີ, ປະຕິບັດຖືກຕ້ອງຕາມແຜນຜັງ ແລະ ມີຄວາມສະອາດງາມຕາ; ເສດຖະກິດມີການຂະຫຍາຍຕົວໜັກແໜ້ນ, ຕໍ່ເນື່ອງ, ມີຄວາມເຂັ້ມແຂງດ້ານງົບປະມານການເງິນ; ພາຍໃນເທດສະບານເມືອງ ມີລະບົບເສັ້ນທາງສະດວກດີ, ເຊື່ອມຈອດກັບເທດສະບານແຂວງ ແລະ ທຸກໆບ້ານ ພາຍໃນເມືອງ; ບັນລຸເງື່ອນໄຂດ້ານການສຶກສາ, ວັດທະນະທໍາ – ສັງຄົມ; ການບໍລິການສາທາລະນະ ທົ່ວເຖິງ ແລະ ສະດວກ; ມີການຄຸ້ມຄອງ, ປົກປັກຮັກສາ ແລະ ນໍາໃຊ້ຊັບພະຍາກອນທຳມະຊາດ ແລະ ສິ່ງແວດລ້ອມຢ່າງມີປະສິດທິ ຜົນແລະຢືນຍົງ ແລະ ບ້ານພັດທະນາກວມ 85% (ແປດສິບຫ້າສ່ວນຮ້ອຍ) ຂຶ້ນໄປ.
ແຫຼ່ງຂ່່າວ: ຈໍາປາໃໝ່