ເຈົ້າໜ້າທີ່ສະເພາະກິດຂອງຫ້ອງການປັບສະຖານະພາບແຮງງານລາວ ປະຈຳຢູ່ລາຊະອານາຈັກໄທ ລາຍງານໃນວັນທີ 30 ສິງຫາ 2017 ນີ້ວ່າ ປັດຈຸບັນນີ້ ມີແຮງງານລາວເຮັດວຽກຢູ່ປະເທດໄທ ໄດ້ເລີ່ມເຂົ້າໄປລົງທະບຽນປັບສະຖານະພາບ ໃຫ້ຖືກຕ້ອງຕາມລະບຽບກົດໝາຍແລ້ວປະມານ 10 ຄົນ ແລະ ຄາດວ່າຍັງຈະສືບຕໍ່ເດີນທາງເຂົ້າໄປລົງທະບຽນເພີ່ມຂຶ້ນຢ່າງຕໍ່ເນື່ອງ ຂະນະທີ່ແຮງງານລາວຢູ່ໄທ ປະມານ 70.000 ກວ່າຄົນ ຢູ່ໃນເງື່ອນໄຂຕ້ອງປັບສະຖານະພາບໃຫ້ເຂົ້າສູ່ລະບົບ.
ເຈົ້າໜ້າທີ່ສະເພາະກິດດັ່ງກ່າວ ກ່າວຕື່ມວ່າ: ການລົງທະບຽນ ແລະ ຕໍ່ບັດອອກແຮງງານໃຫ້ເຂົ້າສູ່ລະບົບ ເລີ່ມປະຕິບັດແຕ່ວັນທີ 28 ສິງຫາ 2017 ເປັນຕົ້ນມາ ທີ່ສູນການຄ້າໄອທີສະແຄ ຊັ້ນ 3 (IT Square) ຖະໜົນແຈ້ງວັດທະນະເຂດຫຼັກ 4 ບາງກອກ ໃນນັ້ນ ໄດ້ດຳເນີນການອອກເອກະສານໃຫ້ສຳລັບກຸ່ມແຮງງານທີ່ມີບັດສີບົວ ທີ່ທາງການໄທໄດ້ຂຶ້ນທະບຽນໄວ້ ສຳລັບຜູ້ເຮັດວຽກໃນກິດຈະການປະມົງທະເລ ແລະ ແປຮູບສັດນ້ຳທີ່ຈະໝົດອາຍຸ ໃນວັນທີ 1 ພະຈິກ 2017 ແລະ ກຸ່ມແຮງງານທົ່ວໄປທີ່ບັດຈະໝົດອາຍຸ ໃນວັນທີ 31 ມີນາ 2018 ເຊິ່ງການບໍລິການຈະໄດ້ເປີດແຕ່ວັນຈັນຫາວັນເສົາ ແຕ່ເວລາ 8:30-16:30 ໂມງ ຜູ້ອອກແຮງງານຕ້ອງມີເອກະສານຄື: ບັດສີບົວທີ່ທາງການໄທອອກໃຫ້ ໃບຄິວທີ່ໄດ້ລົງທະບຽນໄວ້ ໜັງສືຮັບຮອງການອະນຸຍາດອອກນອກພື້ນທີ່ເອກະສານສ່ວນຕົວໃດໜຶ່ງ ທີ່ສາມາດສະແດງວ່າເປັນພົນລະເມືອງລາວ ເພື່ອຢັ້ງຢືນ ເຊັ່ນ: ສຳເນົາສຳມະໂນຄົວ ໜັງສືຜ່ານແດນ ບັດຜ່ານແດນ ບັດປະຈຳຕົວ ໃບຂັບຂີ່ ແລະ ອື່ນໆ ຫຼັງຈາກນັ້ນ ໃຫ້ນາຍຈ້າງຜູ້ອອກແຮງງານນຳເອົາເອກະສານທີ່ກ່ຽວຂ້ອງ ເຊັ່ນ: ບັດຊີໄອ (CI) ບັດອະນຸຍາດເຮັດວຽກຢູ່ຕ່າງປະເທດ ແລະ ບັດສີບົວ ກັບໄປຕິດຕໍ່ທີ່ສຳນັກງານຈັດຫາງານບາງກອກ (ກຸງເທບມະຫານະຄອນ) ພື້ນທີ 1-10 ຫຼື ສຳນັກງານຈັດຫາງານຈັງຫວັດ ທີ່ຕົນເອງເຮັດວຽກຢູ່ເພື່ອຂໍອະນຸຍາດເຮັດວຽກໃນປະເທດໄທ ພາຍໃນໄລຍະ 15 ວັນ.
ແນວໃດກໍ່ດີ ເຖິງແມ່ນຫ້ອງການປັບສະຖານະພາບແຮງງານລາວ ປະຈຳຢູ່ລາຊະອາຈັກໄທ ໄດ້ເປີດໃຫ້ບໍລິການຢ່າງເປັນທາງການແລ້ວກໍ່ຕາມ ແຕ່ກໍ່ຍັງພົບວ່າມີແຮງງານລາວນອກລະບົບຢູ່ໄທ ຍັງບໍ່ຮູ້ຂໍ້ມູນ ຫຼື ສະຖານທີ່ຫ້ອງການດັ່ງກ່າວໄດ້ຢ່າງທົ່ວເຖິງ ເຮັດໃຫ້ເຂົາເຈົ້າໄປລົງທະບຽນໜ້ອຍ ແລະ ຄາດວ່າຈະມີຄົນມາໃຊ້ບໍລິການເພີ່ມຂຶ້ນເລື້ອຍໆ ພາຍຫຼັງເຂົາເຈົ້າຮັບຮູ້ ແລະ ເຂົ້າໃຈ.
ແຫຼ່ງຂ່າວ: ໜັງສືພິມວຽງຈັນໃໝ່