ລັດຖະບານຢີ່ປຸ່ນ ຮັບຮອງຮ່າງກົດໝາຍ ອອກວີຊ່າສຳລັບແຮງງານຕ່າງຊາດ ເພື່ອຫວັງແກ້ໄຂພາວະການຂາດແຄນແຮງງານໃນວຽກງານບາງປະເພດ ໂດຍວາງເງື່ອນໄຂອອກເປັນ 2 ແບບຄື: ສຳລັບແຮງງານທີ່ມີຄວາມສາມາດຕໍ່າ ແລະ ສຳລັບແຮງງານທີ່ມີຄວາມຮູ້ພາສາຢີ່ປຸ່ນ ເຊິ່ງແຜນເປີດນຳໃຊ້ໃນເດືອນ ເມສາ ປີໜ້າ.
ສຳນັກຂ່າວຕ່າງປະເທດລາຍານຈາກ ນະຄອນຫຼວງໂຕກຽວ ປະເທດຢີ່ປຸ່ນ ໃນວັນທີ 2 ພະຈິກ 2018 ວ່າ ໃນກອງປະຊຸມລັດຖະບານຢີ່ປູ່ນ ເຫັນດີຕົກລົງຮ່າງກົດໝາຍວ່າດ້ວຍການດຶງດູດແຮງງານຕ່າງຊາດ ຈາກຕ່າງປະເທດໃນໜ້າວຽກທີ່ຍັງຂາດແຄນ ໂດຍແບ່ງປະເພດຂອງການຂໍວີຊ່າອອກເປັນ 2 ແບບຄື: “ວີຊ່າທີ່ມີໄລຍະເວລາສູງສຸດ 5 ປີ ສຳລັບແຮງງານທີ່ມີຄວາມສາມາດຕໍ່າ ແລະ ເມື່ອຄົບກຳນົດບໍ່ສາມາດຕໍ່ອາຍຸໄດ້ອີກ; ອີກປະເພດໜຶ່ງສຳລັບແຮງງານທີ່ມີຄວາມສາມາດສູງ ທີ່ມີສັກກະຍະພາບໃນການເຮັດວຽກທີ່ໂດດເດັ່ນກວ່າຄົນອື່ນ ແລະ ຜ່ານການທົບສອບຄວາມຮູ້ພາສາຢີ່ປຸ່ນລະດັບດີ ສາມາດຕໍ່ອາຍຸວີຊ່າໄດ້ເມື່ອຄົບກຳນົດ 5 ປີ ສາມາດຍື່ນຄຳຮ້ອງຂໍຮັບການພິຈາລະນານຳສະມາຊິກໃນຄອບຄົວມາອາໄສຢູ່ນຳກັນໄດ້ ພ້ອມທັງມີສິດຍື່ນເອກະສານຂໍຮັບເປັນຜູ້ອາໄສຢູ່ຖາວອນ”.
ຢ່າງໃດກໍຕາມ ຮ່າງກົດໝາຍດັ່ງກ່າວ, ໄດ້ຮັບການວິພາກວິຈານຢ່າງໜັກ ເຊິ່ງມີແນວໂນ້ມສົ່ງຜົນເຮັດໃຫ້ຮ່າງກົດໝາຍອາດບໍ່ຜ່ານການອະນຸມັດໃນປີນີ້ ອາດຈະເລີ່ມອອກວີຊ່າໃນເດືອນ ເມສາ ປີໜ້າ ຕາມແຜນຂອງນາຍົກລັດຖະມົນຕີ ຊິນໂຊ ອາເບະ. ທັງນີ້, ດ້ານຜູ້ນຳຢີ່ປຸ່ນໄດ້ຢືນຢັນວ່າ: ລັດຖະບານຈະພິຈາລະນາສະເພາະແຕ່ແຮງງານທີ່ມີຄວາມສາມາດທີ່ແທ້ຈິງ ແລະ ສາມາດເຮັດວຽກໄດ້ທັນທີ ເພື່ອບັນເທົາຄວາມຕຶງຄຽດຂອງພາວະການຂາດແຄນແຮງງານໃນໜ້າວຽກທີ່ຕ້ອງການເທົ່ານັ້ນ ລວມມີວຽກກໍ່ສ້າງ, ພະຍາບານ, ໂຮງແຮມ, ກຳສິກຳ ແລະ ອຸສາຫະກຳບາງປະເພດ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: dailynews.co.th
ຮູບພາບຈາກ: pixabay.com