spot_img
Homeນານາສາລະປະລິນຍາບໍ່ແມ່ນສິ່ງຕັດສິນຜົນສຳເລັດ

ປະລິນຍາບໍ່ແມ່ນສິ່ງຕັດສິນຜົນສຳເລັດ

Published on

ເວົ້າແນວນີ້ ກໍບໍ່ແມ່ນວ່າໃບປະກາດປະລິນຍາ ຫຼືການສຶກສາລະດັບສູງບໍ່ມີຄຸນຄ່າ. ການສຶກສາທຸກລະດັບແມ່ນມີຄຸນຄ່າ ຖ້າຫາກບໍ່ມີການສຶກສາຮຽນຮູ້ນັ້ນລະຈຶ່ງບໍ່ມີຄຸນຄ່າ, ແຕ່ຂ້ອຍຢາກໝາຍເຖິງການສຶກສາທີ່ແທ້ຈິງບໍ່ຈຳເປັນຕ້ອງມີໃບປະກາດ ເພາະຫຼາຍວິຊາອາຊີບທີ່ສາມາດລ້ຽງໂຕເອງໄດ້ ຫຼືມີຊີວິດທີ່ດີໄດ້ນັ້ນ ກໍບໍ່ໄດ້ມາຈາກໃບປະກາດ ແຕ່ມັນມາຈາກການສຶກສາຮຽນຮູ້ແລະລົງມືເຮັດ.

ທ່ານຜູ້ອ່ານຄົງຮູ້ຈັກ ສະຕີບ ຈ໊ອບ ຜູ້ສ້າງໂທລະສັບໄອໂຟນ ຫຼື ຮູ້ຈັກກັບ ມາກ ຊັກເກີເບີກ ຜູ້ກໍ່ຕັ້ງເຟັດບຸກ ເຂົາຕ່າງກໍບໍ່ໄດ້ຈົບປະລິນຍາ ແລະກໍເປັນຄົນໜີອອກຈາກມະຫາວິທະຍາໄລ (ຮຽນບໍ່ຈົບ) ແຕ່ເຂົາເຈົ້າໄດ້ສ້າງສິ່ງສຳຄັນແລະເປັນປະໂຫຍດຕໍ່ມວນມະນຸດແບບທີ່ຄົນອື່ນເຮັດບໍ່ໄດ້.

ອ້າຍ ບຸນຄຳ ຜູ້ມີລໍ້ໝາກສົ້ມແລ້ວເລາະຂາຍ ໄດ້ກຳໄລບໍ່ຕໍ່າກວ່າມື້ລະ 5-6 ແສນ ຫຼືບາງມື້ໄດ້ເປັນລ້ານປາຍກີບ ລາວກໍບໍ່ໄດ້ໃຊ້ໃບປະກາດປະລິນຍາເພື່ອເຂົ້າເຮັດອາຊີບນັ້ນເລີຍ ແຕ່ລາວມີຄວາມຊຳນານໃນການປອກໝາກໄມ້ໄດ້ຢ່າງວ່ອງໄວ.

ທ້າວ ກາດຳ ບ້ານຊຳເກດ ເມືອງສີໂຄດຕະບອງ ນະຄອນຫຼວງວຽງຈັນ ເອົາເຫຼັກເຜົາໄຟໃຫ້ຮ້ອນແລ້ວຕີ ໃຫ້ເປັນພ້າເປັນມີດສົ່ງຂາຍຈົນຕີບໍ່ທັນ ຍ້ອນຄຸນນະພາບພ້າມີດທີ່ລາວຕີນັ້ນມີຄຸນນະພາບ ທົນທານແລະຟັນເຂົ້າດີ ອັນນັ້ນລາວກໍບໍ່ມີໃບປະກາດຄືກັນ.

ລຸງເຄນຕາ ບ້ານນາເມືອງ ເມືອງຄຳເກີດ ແຂວງບໍລິຄຳໄຊ ຫ້ອຍໂຫນໜ້າຜາເພື່ອເອົານໍ້າເຜີ້ງຈາກຮັງທຳມະຊາດ ໂດຍທີ່ແມ່ເຜິ້ງບໍ່ຮູ້ທໍ່ໃດພັນໂຕ ບໍ່ຕອດລາວເລີຍ ແຕ່ລາວບໍ່ຮູ້ໜັງສື.

ທີ່ຍົກມາຂ້າງເທິງນັ້ນ ແມ່ນສ່ວນໜ້ອຍໆ ຂອງອີກຫຼາຍໆ ອາຊີບທີ່ເຈົ້າຂອງອາຊີບມີຄວາມຊຳນານແລະສາມາດຫາລ້ຽງຊີວິດໂຕເອງໄດ້ ແລະລວມທັງຜູ້ປະສົບຜົນສຳເລັດລະດັບໂລກນຳ.

ຕາມປະສົບການຂອງຜູ້ຂຽນເອງແລ້ວເຫັນວ່າ ສິ່ງສຳຄັນຂອງຄົນທີ່ຈະເອົາໂຕລອດໄດ້ນັ້ນ ມັນບໍ່ຂຶ້ນກັບໃບປະກາດປະລິນຍາດອກ ເພາະໝູ່ຂ້ອຍທີ່ຈົບປະລິນຍາຄົນໜຶ່ງພ້ອມກັນກັບຂ້ອຍ ລາວກໍວ່າງງານແລະຍັງເລິ່ມຕົ້ນຊີວິດບໍ່ໄດ້ ທັ້ງໆທີ່ໄດ້ໃບປະກາດປະລິນຍາມາແລ້ວໄດ້ 10 ປີ.

ສິ່ງທີ່ຈະເຮັດໃຫ້ຊີວິດຂອງຄົນເຮົາຢູ່ລອດໄດ້ນັ້ນແມ່ນ ການສຶກສາຮຽນຮູ້ແລ້ວລົງມືເຮັດມັນຈົນຊຳນານ, ແຕ່ການສຶກສາໃນທີ່ນີ້ຂ້ອຍບໍ່ໄດ້ໝາຍເຖິງການສຶກສາໃນໂຮງຮຽນທໍ່ນັ້ນ ແຕ່ຂ້ອຍໝາຍເຖິງສຶກສາຮຽນຮູ້ກັບທຸກຢ່າງທີ່ຜ່ານເຂົ້າມາໃນຊີວິດ ຮຽນຮູ້ອາຊີບໃດກໍໄດ້ທີ່ບໍ່ຜິດກົດໝາຍແລ້ວເຮັດມັນໃຫ້ດີ ມັນກໍສາມາດປະສົບຜົນສຳເລັດໄດ້.

ໃນຍຸກສະໄໝປັດຈຸບັນນີ້ ຖ້າຢາກອອກແຮງງານເບົາ ແຕ່ສາມາດເອົາໂຕລອດໄດ້ແມ່ນຂໍໃຫ້ມີ 4 ຢ່າງຕິດໂຕຄື:
1. ມີທັກສະຊີວິດ: ສາມາດຢູ່ຮ່ວມໝູ່ໄດ້, ເຮັດວຽກຮ່ວມໝູ່ໄດ້, ເຂົ້າຄົນໄດ້ງ່າຍ, ຮູ້ຈັກເວົ້າ, ມີຄວາມກ້າຫານ, ກ້າປຶກສາຫາລື ແລະຮຽນຮູ້, ເປັນນັກຮ້ອງ, ນັກດົນຕີ, ນັກກິລາ ແລະອື່ນໆ
2. ຮູ້ພາສາອັງກິດ: ເປັນປະຕູທີ່ຈະຮຽນຮູ້ເລື່ອງລາວທຸກຢ່າງຈາກທົ່ວໂລກໄດ້ ແລະສາມາດເຮັດວຽກກັບຄົນຕ່າງປະເທດໄດ້.
3. ດຸໝັ່ນ: ດຸໝັ່ນໃນການເຮັດວຽກ, ດຸໝັ່ນໃນການຮຽນຮູ້, ຮູ້ແລ້ວລົງມືເຮັດ, ແລະເຮັດແລ້ວຖອດຖອນບົດຮຽນນຳ.
4. ຊື່ສັດ: ຄວາມຊື່ສັດເປັນສິ່ງທີ່ຈະເຮັດໃຫ້ໝັ້ນຄົງ. ຈະເປັນໝູ່ຄູ່, ຄອບຄົວ, ຄູ່ຄ້າ ແລະສັງຄົມ ຕ່າງກໍຢາກຢູ່ກັບຄົນທີ່ມີຄວາມຊື່ສັດແລະຈິງໃຈ.

ຂ້ອຍວ່າ ຖ້າເຈົ້າມີ 4 ຢ່າງນີ້ແລ້ວ ເຖິງເຈົ້າຈະບໍ່ມີໃບປະກາດຈັກໃບ ຊີວິດຂອງເຈົ້າກໍບໍ່ມີມື້ທຸກຍາກ.

ບົດຄວາມຫຼ້າສຸດ

ການຈັດການຂີ້ເຫຍື້ອທີ່ດີ ຄືຄວາມປອດໄພຕໍ່ສະພາບແວດລ້ອມ ແລະ ສັງຄົມ

ການຈັດການຂີ້ເຫຍື້ອ ຍັງເປັນສິ່ງທີ່ທ້າທ້າຍໃນແຕ່ລະຂົງເຂດ ຕັ້ງແຕ່ເຮືອນຊານ, ຫ້າງຮ້ານ, ບໍລິສັດ ຈົນໄປເຖິງບັນດາໂຮງງານຜະລິດຕ່າງໆ. ເນື່ອງຈາກເປັນໄປບໍ່ໄດ້ທີ່ຈະຫຼີກລ່ຽງບໍ່ໃຫ້ມີການສ້າງຂີ້ເຫຍື້ອເລີຍ. ເຊິ່ງບາງຄັ້ງຍັງພົບເຫັນການທຳລາຍ ແລະ ຈັດການຂີ້ເຫຍື້ອຢ່າງບໍ່ຖືກວິທີ ທີ່ສົ່ງຜົນເສຍຕໍ່ສິ່ງແວດລ້ອມ ແລະ ສ້າງຄວາມເປີເປື້ອນໃຫ້ສັງຄົມ ເຊັ່ນ:...

ຮູ້ຫຼືບໍ່? ທີ່ໄປທີ່ມາຂອງຊື່ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່

ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່ ມາຮູ້ຄຳຕອບມື້ນີ້ ພາຍຸວິພາ, ພາຍຸຄາຈິກິ ໄດ້ມາຈາກໃສ ໃນໄລຍະນີ້ເຫັນວ່າມີພາຍຸກໍ່ໂຕຂຶ້ນມາຕະຫຼອດ ແລະມີຫຼາຍຄົນອາດຈະສົງໃສວ່າ ໃນການຕັ້ງຊື່ພາຍຸແຕ່ລະລູກ ແມ່ນໃຜເປັນຄົນຕັ້ງ ແລະຄໍາຕອບກໍຄື ຊື່ຂອງພາຍຸແມ່ນໄດ້ຖືກຕັ້ງຂຶ້ນຈາກປະເທດຕ່າງໆໃນທົ່ວໂລກ. ສຳລັບພາຍຸທີ່ສາມາດຕັ້ງຊື່ໄດ້ນັ້ນ ຕ້ອງແມ່ນພາຍຸລະດັບໂຊນຮ້ອນຂຶ້ນໄປ...

ແຈ້ງເຕືອນພາຍຸລູກໃໝ່ ທີ່ອາດຈະສົ່ງຜົນກະທົບຕໍ່ປະເທດລາວ ໃນວັນທີ 30/08/2025 – 02/09/2025

ກຽມຮັບມືພາຍຸລູກໃໝ່ ຫວຽດນາມອອກແຈ້ງເຕືອນພາຍຸລູກໃໝ່ ອາດສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ ຫວຽດນາມອອກແຈ້ງເຕືອນພາຍຸລູກໃໝ່ ທີ່ຄາດວ່າຈະໃຊ້ຊື່ວ່າພາຍຸໜອງຟ້າ ຫຼື ຟ້າໃສ ທີ່ຕັ້ງຊື່ໂດຍປະເທດລາວ ຄາດອິດທິພົນຂອງພາຍຸລູກນີ້ຈະສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ...

ຜົນສໍາເລັດ ກອງປະຊຸມໃຫຍ່ ຜູ້ແທນສະມາຊິກພັກ ຄັ້ງທີ III ຂອງ ອົງຄະນະພັກ ກະຊວງເຕັກໂນໂລຊີ ແລະ ການສື່ສານ

ເອກະສັນຮັບເລືອກ ສະຫາຍ ປອ. ສັນຕິສຸກ ສິມມາລາວົງ ເປັນເລຂາຄະນະພັກ ກະຊວງເຕັກໂນໂລຊີ ແລະ ການສື່ສານ (ຊຸດໃໝ່) ກະຊວງເຕັກໂນໂລຊີ ແລະ ການສື່ສານລາຍງານຜົນ ກອງປະຊຸມໃຫຍ່ ຜູ້ແທນສະມາຊິກພັກ...