ລັດວິສາຫະກິດໄຟຟ້າລາວ ໄດ້ຄົ້ນຄວ້າ ແລະ ແຕ່ງຕັ້ງຄະນະກຳມະການທວງໜີ້ຢ່າງເປັນລະບົບ ໃນການເກັບ
ຄືນໜີ້ຄ້າງຈ່າຍທີ່ສູງເຖິງ 400 ຕື້ກວ່າກີບ ຈາກຜູ້ຊົມໃຊ້ທີ່ສ່ວນໃຫຍ່ແມ່ນນຳພາກລັດຢູ່ນະຄອນຫຼວງວຽງຈັນ
ຕົວເລກຫຼາຍກວ່າເຄິ່ງໜຶ່ງຂອງໜີ້ທັງໝົດ.
ທ່ານ ວົງມະນີ ສອນເກດສຸລິນ ຮອງຜູ້ອຳນວຍການລັດວິສາຫະກິດໄຟຟ້າລາວ ກ່າວຕໍ່ສື່ມວນຊົນບໍ່ດົນມານີ້ວ່າ:
ຢາກໃຫ້ພໍ່ແມ່ປະຊາຊົນເຂົ້າໃຈເຫດຜົນທີ່ 2 ເດືອນທາງລັດວິສາຫະກິດໄຟຟ້າລາວ ລົງໄປທວງຄ່າຊົມໃຊ້ກະແສ
ໄຟຟ້າ ເຊຶ່ງບໍ່ໄດ້ເຮັດໂດຍພາລະການ ແຕ່ໄດ້ມີແຈ້ງເຕືອນໃຫ້ຜູ້ຊົມໃຊ້ຮັບຊາບລ່ວງໜ້າ ທັງໄດ້ເຮັດໃບທວງໜີ້
ໄປຫາບ້ານແຕ່ລະບ້ານ ເພື່ອໃຫ້ປະກາດທາງໂທລະໂຄ່ງໃຫ້ຜູ້ຊົມໃຊ້ຮັບຮູ້ແລ້ວ ຖ້າບໍ່ມາຈ່າຍຈິ່ງຕ້ອງປະຕິບັດ
ມາດຕະການເດັດຂາດ ຄືຕັດໄຟຈົນກວ່າຈະໄດ້ຮັບການຊຳລະຄ່າກະແສໄຟຟ້າກ່ອນຈິ່ງຕໍ່ໃຫ້ຄືນ.
ໂດຍປະຈຸບັນທົ່ວປະເທດໄຟຟ້າລາວ ມີໜີ້ຄ້າງຂອງລູກຄ້າ 400 ກ່ວາຕື້ກີບ ໃນນັ້ນສ່ວນຫຼາຍແມ່ນສຳນັກງານ
ຫ້ອງການຂອງລັດຢູ່ນະຄອນຫຼວງວຽງຈັນ ກວມອັດຕາຫຼາຍກວ່າເຄິ່ງໜື່ງຂອງໜີ້ທັງໝົດ, ທ່ານ ວົງມະນີ ສອນ
ເກດສຸລິນ ກ່າວ.
ດັ່ງນັ້ນ ທາງລັດວິສາຫະກິດໄຟຟ້າລາວ ຈິ່ງໄດ້ຈັດກອງປະຊຸມ 6 ເດືອນຕົ້ນປີຂຶ້ນ ເອີ້ນເອົາ 18 ແຂວງ ລວມທັງນະ
ຄອນຫຼວງວຽງຈັນເຂົ້າມາຫາລື ພ້ອມແຕ່ງຕັ້ງຄະນະກຳມະການລົງທວງໜີ້ ໃຫ້ເປັນລະບົບຢ່າງຕໍ່ເນື່ອງໃນການ
ເກັບເງິນໃຫ້ວິສະຫະກິດໄຟຟ້າລາວ ແລະ ຍັງໄດ້ແຕ່ງຕັ້ງຫົວໜ້າສາຂາແຕ່ລະສາຂາຂອງແຂວງ ແລະ ມອບໃຫ້
ເລຂາຄະນະພັກແຕ່ລະໜ່ວຍ ໃຫ້ເອົາໃຈໃສ່ໃນການລົງເກັບເງິນຄ່າໄຟ ເພື່ອເອົາເງິນຈຳນວນດັ່ງກ່າວໄປສ້າງຕະ
ຂ່າຍໄຟຟ້າໃຫ້ປະຊາຊົນ ແຕ່ລະທ້ອງຖິ່ນທີ່ຍັງບໍ່ທັນມີໄຟຟ້າໃຊ້ໄດ້ມີແສງສະຫວ່າງຢ່າງທົ່ວເຖິງ.
ທ່ານຮອງຜູ້ອຳນວຍການວິສາຫະກິດໄຟຟ້າລາວກ່າວຕື່ມວ່າ: ລັດວິສາຫະກິດໄຟຟ້າລາວນອກຈາກເອົາໃຈໃສ່
ເກັບລາຍຮັບຕາມພາລະໜ້າທີ່ແລ້ວ ຍັງໄດ້ຈັດຝຶກອົບຮົມໃຫ້ແກ່ພະນັກງານຈົດກົງເຕີ້ໄຟ ເພື່ອໃຫ້ຖືກຕ້ອງ
ຕາມຕົວເລກຂອງກົງເຕີ້ ແລະ ບໍ່ໃຫ້ມີການຄາດເດົາ ເດັ່ນໄປກວ່ານັ້ນໄດ້ແຕ່ງຕັ້ງຫົວໜ້າແຕ່ລະສາຂາຂອງ
ເມືອງທີ່ຂຶ້ນກັບນະຄອນຫຼວງ ລົງເກັບເງິນຄ່າໄຟນຳແຕ່ລະກະຊວງທີ່ຍັງຄ້າງ ເຮັດໃຫ້ບັນຫາໜີ້ສິນ ຫຼຸດໜ້ອຍ
ຖອຍລົງ.
ແຫຼ່ງຂ່າວ: ເສດຖະກິດ – ສັງຄົມ