ບໍ່ວ່າໃຜໆ ກໍຕ້ອງມີເກີບແຕະໄວ້ໃນຄອບຄອງກັນນຳ ຢ່າງນ້ອຍກໍຄົນລະ 1 ຄູ່ ຍິ່ງເປັນສາວໆ ກໍຈະມີເກີບແຕະແບບແຟເຊິນກັນອີກຄົນລະຫລາຍຄູ່ (ເຊິ່ງສ່ວນໃຫຍ່ພື້ນຮອງເກີບມັກຈະບາງ ແລະແຂງ) ບາງຄົນກໍມີກຽມໄວ້ທີ່ຫ້ອງການ ສຳລັບໃສ່ສະຫລັບກັບເກີບສົ້ນສູງທີ່ໃສ່ໄປເຮັດວຽກ ເພື່ອຈະໄດ້ຍ່າງໄປໃດມາໃດໄດ້ສະດວກກວ່າ ແຕ່ຖ້າຫາກວ່າ ທ່ານເປັນຄົນໜຶ່ງທີ່ໃສ່ເກີບແຕະ ໄປໃສມາໃສເປັນປະຈຳ ບາງທີຄວາມຄິດທີ່ວ່າ ມັນໃສ່ງ່າຍໃສ່ສະບາຍ ການໃສ່ເກີບແຕະເປັນປະຈຳ ແລະ ໃສ່ຕິດຕໍ່ກັນຍາວນານເກີນໄປ ກໍສາມາດເກີດໂທດໄດ້ເຊັ່ນກັນ ແຕ່ຈະເປັນຢ່າງໃດນັ້ນ ມາເບິ່ງກັນເລີຍ
1. ເກີບແຕະ ຮອງຮັບຕີນໄດ້ບໍ່ດີບໍ່
ພື້ນເກີບແຕະ ມັກຈະພື້ນລຽບ ຊຶ່ງບໍ່ເຂົ້າກັບສີລະຕາມທຳມະຊາດຂອງຝາຕີນ ມັນຈຶ່ງບໍ່ສາມາດຮອງຮັບຝາຕີນໄດ້ດີພຽງພໍ ທັງວັດຖຸສ່ວນໃຫຍ່ທີ່ໃຊ້ຍັງເຮັດມາຈາກຢາງທີ່ບໍ່ເອື້ອອໍານວຍໃຫ້ເກີດຄວາມຮູ້ສຶກສະບາຍຕີນເທົ່າໃດ ຈຶ່ງສົ່ງຜົນໃຫ້ເກີດອາການເຈັບຝ່າຕີນ ແລະ ສົ້ນຕີນຕາມມາໄດ້
2. ການໃສ່ເກີບແຕະ ມັນເປືອຍຕີນທ່ານຫລາຍເກີນໄປ
ເກີບແຕະ ເບິ່ງຄືໃສ່ງ່າຍ ສະບາຍໆ ເພາະມັນເປືອຍຕີນຂອງທ່ານ ແຕ່ຂະນະດຽວກັນມັນກໍເຮັດໃຫ້ຕີນໄດ້ສຳຜັດກັບ ສິ່ງສົກກະປົກໄດ້ເຕັມທີ່ນໍາອີກ ບໍ່ວ່າຈະເປັນຝຸ່ນ ຂີ້ຕົມ ຫລື ນ້ຳຂັງ ຈາກພື້ນຖະໜົນ ເຮັດໃຫ້ອະໄວຍະວະທີ່ຮອງຮັບນ້ຳໜັກ ແລະ ພາທ່ານຍ່າງໄປໃສມາໃສ ສ່ຽງຕໍ່ແບັກທີເລຍ ທີຫລາຍກວ່າ 15, 000 ຊະນິດ ແລະ ຫາກມີບາດແຜ ຫລື ຮອຍຂີດຂ່ວນເກີດຂຶ້ນທີ່ຕີນກໍຈະຍິ່ງໄປກັນໃຫ່ຍ
3. ເຮັດໃຫ້ມີໂອກາດສ່ຽງຈະປະສົບອັນຕະລາຍສູງຂຶ້ນ
ເພາະມັນເປັນເກີບທີ່ບໍ່ໄດ້ຕິດແໜ້ນຢູ່ກັບຕີນຄືກັບເກີບຫຸ້ມສົ້ນ ເກີບແຕະຈຶ່ງສາມາດເລື່ອນຫລື ຫລຸດຈາກຕີນໄປໄດ້ງ່າຍໆ ຊຶ່ງນັ້ນເຮັດໃຫ້ທ່ານມີໂອກາດສ່ຽງ ທີ່ຈະມີອາການບາດເຈັບຂອງຕີນ ແລະ ຍັງສ່ຽງຕໍ່ບາງອຸບັດເຫດທີ່ຮ້າຍແຮງນໍາອີກ ເຊັ່ນ ເມື່ອເກີບຫລຸດ ຂະນະຂ້າມຫົນທາງ ຂະນະ ກຳລັງຂຶ້ນລົງຂັ້ນໄດ ຂະນະກຳລັງກ້າວຂຶ້ນລົດ ຫລື ເກີບຫລຸດ ຂະນະຂັບລົດ ເປັນຕົ້ນ
4. ເຮັດໃຫ້ເກີດອາການບາດເຈັບຂອງຂໍ້ຕີນ ກະໂພກ ແລະ ຫລັງ
ເນື່ອງຈາກພື້ນເກີບແຕະ ບໍ່ສາມາດຮອງຮັບຝ່າຕີນໄດ້ຢ່າງເໝາະສົມ ເຮັດໃຫ້ການວາງຕີນຂອງທ່ານຈຶ່ງບໍ່ເປັນໄປຕາມທຳມະຊາດ ເຮັດໃຫ້ຕ້ອງຈັງຕີນ ຫລື ຍ່າງດ້ວຍການວາງຕີນທີ່ຜິດຮູບ ແລະ ເມື່ອເຮັດຕິດຕໍ່ກັນເປັນເວລາດົນ ກໍ່ໃຫ້ເກີດອາການບາດເຈັບຂອງຂໍ້ຕີນ ແລະ ກະໂພກໄດ້ ນອກຈາກນີ້ຍັງອາດປະສົບບັນຫາປວດຫລັງນໍາອີກ
5. ເກີດອາການປວດສົ້ນນ່ອງ
ພື້ນທີ່ຄ່ອນຂ້າງແຂງ ຂອງເກີບແຕະ ເຮັດໃຫ້ເກີດແຮງກົດຫລາຍທີ່ຝ່າຕີນ ແລະ ສົ້ນຕີນ ນອກຈາກເຮັດໃຫ້ເຈັບຝ່າຕີນ ແລະ ຮູ້ສຶກເມື່ອຍທີ່ສົ້ນແລ້ວ ຍັງເຮັດໃຫ້ເກີດອາການປວດສົ້ນນ່ອງໄດ້ເກີບແຕະ ອາດຈະເບິ່ງມີສີສັນ ຕາມແຟເຊິນ ແລະ ໃສ່ງ່າຍສະບາຍຕີນ ແຕ່ຫາກທ່ານໃສ່ມັນເປັນປະຈຳ ແລະ ໃສ່ຕິດຕີນຕະຫລອດເວລາແລ້ວ ມັນກໍສ່ຽງທີ່ຈະເຮັດໃຫ້ທ່ານເກີດອາການບາດເຈັບຂອງຝ່າຕີນ ສົ້ນຕີນ ນ່ອງ ແອວ ແລະ ຫລັງ ຕາມມາໄດ້ ນອກຈາກນີ້ຍັງສ່ຽງກໍ່ໃຫ້ເກີດອຸບັດເຫດຮ້າຍແຮງບາງປະການນໍາອີກ
ຫາກຕ້ອງການໃສ່ເກີບແຕະ ຄວນເລືອກເກີບທີ່ສົ້ນບໍ່ບາງ ບໍ່ອ່ອນ ຫລື ແຂງເກີນໄປ ມີພື້ນເກີບທີ່ນຸ້ມເຂົ້າກັບສີ ເພື່ອຮັບແຮງກົດຂອງຝ່າຕີນໄດ້ດີ ນອກຈາກນີ້ກໍຄວນສະຫລັບສັບປ່ຽນກັບການໃສ່ເກີບປະເພດອື່ນ ທີ່ສາມາດຮອງຮັບຂອງຕີນ ແລະ ປົກປ້ອງຕີນໄດ້ດີກວ່າ