ມື້ນີ້, ເວລາປະມານ 11:00 ນາທີ (ວັນທີ 21 ສິງຫາ 2017) ໄດ້ເກີດເຫດເຄືອຂ່າຍໂທລະສັບ ຂອງລັດວິສາຫະກິດລາວໂທລະຄົມ ຫຼື M-Phone ລົ້ມ ເຮັດໃຫ້ຜູ້ໃຊ້ເຄືອຂ່າຍດັ່ງກ່າວ ບໍ່ສາມາດໂທເຂົ້າ-ໂທອອກໄດ້ເລີຍ ທັງເບີຫຼັກ 020 ແລະ 030 ແຕ່ວ່າສັນຍານເນັດແມ່ນຍັງໃຊ້ໄດ້ຢູ່.

ຜູ້ສື່ຂ່າວລາຍງານວ່າ ເຈົ້າໜ້າທີ່ຜູ້ໜຶ່ງ ຂອງບໍລິສັດລັດວິສາຫະກິດລາວໂທລະຄົມ ທີ່ບໍ່ປະສົງອອກນາມ ໄດ້ບອກວ່າໄດ້ເກີດບັນຫາຄືດັ່ງກ່າວແທ້ ແລະພາກສ່ວນເຕັກນິກທີ່ກ່ຽວຂ້ອງຍັງພວມຂຸ້ນຂ້ຽວສ້ອມແປງຢູ່ ເຊິ່ງຄາດວ່າຈະກັບມາໃຊ້ໄດ້ປົກກະຕິໃນໄວໆ ນີ້.

ທີມຂ່າວພວກເຮົາພະຍາຍາມທົດລອງດ້ວຍການ ເອົາເບີເຄືອຂ່າຍອື່ນໂທຫາເບີລາວໂທລະຄົມ, ເອົາເບີລາວໂທລະຄົມໂທຫາເບີລາວໂທລະຄົມ ແລະເອົາເບີລາວໂທລະຄົມໂທຫາສູນຂອງລາວໂທລະຄົມ ກໍບໍ່ສາມາດຕິດຕໍ່ໄດ້ເຊັ່ນກັນ. ເຫດການດັ່ງກ່າວນີ້ ເປັນທົ່ວປະເທດ ຫຼືເປັນບາງຈຸດເທົ່ານັ້ນ.

ຫຼ້າສຸດເວລາປະມານ 14:30 ລາວໂທລະຄົມໄດ້ອອກຂໍ້ຄວາມຂໍອະໄພມາຍັງລູກຄ້າຂອງຕົນຢ່າງເປັນທາງການ ແລະວ່າສັນຍານໄດ້ກັບມາໃຊ້ໄດ້ເປັນປົກກະຕິແລ້ວ.