ພາຍຫລັງ ພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ, ໄດ້ອອກແຈ້ງການ ໃຫ້ບັນດາແມ່ຄ້າຊາວຂາຍ ທີ່ຂາຍເຄື່ອງຢູ່ຕາມທາງຍ່າງ ຢູ່ຈຸດແຕ່ 4 ແຍກໄຟແດງທາດຝຸ່ນ ຫາ ໄຟແດງແພດສາດ ແລະ ໄຟແດງແພດສາດ ຫາ ເສັ້ນທາງຄູວຽງ ໃຫ້ຢຸດຂາຍເຄື່ອງ ແລະ ຈອດລົດທຸກຊະນິດ ໂດຍສະເພາະ ລົດສາມລໍ້, ລົດຕຸກໆ ຫ້າມຈອດຢູ່ເຂດດັ່ງກ່າວ, ມາຮອດວັນທີ 20 ມິຖຸນາ ນີ້, ພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ຮ່ວມກັບເຈົ້າໜ້າທີ່ຕຳຫລວດຈະລາຈອນ, ໜ່ວຍງານຈັດສັນ ເມືອງທີ່ກ່ຽວຂ້ອງ, ພະແນກອຸດສາຫະກຳ ແລະ ການຄ້ານະຄອນຫລວງ ແລະຫ້ອງການຄຸ້ມຄອງ ບໍລິຫານຕົວເມືອງວຽງຈັນ ໄດ້ປະຕິບັດງານ ຢ່າງເຂັ້ມງວດ ແລະ ເດັດຂາດ ເພື່ອຈັດສັນຫ້າມບໍ່ໃຫ້ມີ ການຈອດລົດ ແລະ ຂາຍເຄື່ອງທຸກປະເພດ ຢູ່ຈຸດດັ່ງກ່າວ.
ທ່ານ ຄຳພູທອງ ກັນລະຍາ ຫົວໜ້າຫ້ອງການ ໂຍທາທິການ ແລະ ຂົນສົ່ງ ເມືອງສີສັດຕະນາກ ນະຄອນຫລວງວຽງຈັນ, ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ໃນວັນທີ 20ມິຖຸນາ ນີ້ວ່າ: ປັດຈຸບັນ ການຄ້າຂາຍເຄື່ອງ ຕາມທາງຍ່າງ ຢູ່ນະຄອນຫລວງວຽງຈັນ ໄດ້ຮັບການແກ້ໄຂ ແລະ ຈັດສັນໃຫ້ເປັນລະບຽບຮຽບຮ້ອຍ, ມີຄວາມສະອາດງາມຕາ ເວົ້າສະເພາະ ຢູ່ເມືອງສີສັດຕະນາກ ຢູ່ເຂດ 4 ແຍກໄຟແດງທາດຝຸ່ນ ຫາ ໄຟແດງແພດສາດ ແລະ ໄຟແດງແພດສາດ ຫາ ເສັ້ນທາງຄູວຽງ ຊາວຄ້າຂາຍ ແມ່ນໄດ້ຫຍັບຍ້າຍ ອອກຈາກສະຖານທີ່ດັ່ງກ່າວແລ້ວ ພາຍຫລັງອຳນາດການປົກຄອງ ນະຄອນຫລວງວຽງຈັນ ໄດ້ອອກແຈ້ງການ ແລະ ເອົາໃຈໃສ່ຊີ້ນຳໆພາ, ປຸກລະດົມພໍ່ແມ່ປະຊາຊົນ ກໍຄືພໍ່ຄ້າຊາວຂາຍ ໃຫ້ເອົາໃຈໃສ່ຈັດຕັ້ງປະຕິບັດ ນະໂຍບາຍ 6 ສ ໂດຍສະເພາະ ສ ສະອາດ ໄປຄຽງຄູ່ກັບ ການພັດທະນາຕົວເມືອງ ໃຫ້ມີຄວາມສະອາດຈົບງາມ, ເປັນເມືອງທີ່ໜ້າຢູ່ ແລະ ເປັນທີ່ໜ້າພູມໃຈ ຂອງບັນດານັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ເຂົ້າມາທ່ຽວ ສປປ ລາວ.
ທ່ານ ຄຳພູທອງ ກັນລະຍາ ໃຫ້ຮູ້ຕື່ມວ່າ: ຖ້າຫາກບັນດາ ແມ່ຄ້າຊາວຂາຍ ຫລື ບຸກຄົນໃດ ບໍ່ປະຕິບັດ ຕາມແຈ້ງການ, ຍັງກັບມາຂາຍຢູ່ບ່ອນເກົ່າ ທາງໜ່ວຍງານກວດກາຜັງເມືອງ ແລະ ໜ່ວຍງານຈັດສັນ ຄວາມເປັນລະບຽບຮຽບຮ້ອຍ ຮ່ວມກັບເຈົ້າໜ້າທີ່ໆກ່ຽວຂ້ອງ ຈະໄດ້ສຶກສາອົບຮົມ, ກ່າວເຕືອນ, ປັບໃໝ 500.000-2.000.000 ກີບ, ພ້ອມດຳເນີນໄປຕາມ ຂະບວນການຍຸຕິທຳ ແລະ ລະບຽບກົດໝາຍຂອງ ສປປ ລາວ.