ມື້ນີ້, ວັນທີ 2 ມິຖຸນາ 2017 ຫ້ອງການທະນາຄານແຫ່ງສປປລາວ ໄດ້ອອກແຈ້ງການເລກທີ 334/ຫກ ລົງວັນທີ 2 ມິຖຸນາ 2017 ເລື່ອງ ບໍ່ໃຫ້ຫຼົງເຊື່ອຕໍ່ການໂຄສະນາຂອງບໍລິສັດພີເອັສ

ແຈ້ງການລະບຸວ່າ ໃນໄລຍະຜ່ານມາຈົນຮອດປັດຈຸບັນ ບໍລິສັດພີເອັສແມ່ນໄດ້ດຳເນີນການລະດົມທຶນດ້ວຍຫຼາຍຮູບແບບໂດຍບໍ່ຖືກຕ້ອງຕາມລະບຽບກົດໝາຍ ເຊິ່ງໃນຜ່ານມາບໍລິສັດດັ່ງກ່າວໄດ້ຖືກຂະແໜງການທີ່ກ່ຽວຂ້ອງກ່າວເຕືອນແລະປັບໃໝຫຼາຍຄັ້ງ ແຕ່ບໍລິສັດກໍຍັງສືບຕໍ່ພິກປິ້ນຮູບແບບການລະດົມທຶນຈາກພໍ່ແມ່ປະຊາຊົນດ້ວຍຮູບແບບບໍ່ຖືກຕ້ອງຢູ່. ສະນັ້ນ, ເພື່ອປ້ອງກັນການເສຍຫາຍທີ່ອາດເກີດຂຶ້ນກັບປະຊາຊົນ, ພະນັກງານ, ທະຫານ, ຕຳຫຼວດ ໃນຂອບເຂດທົ່ວປະເທດ ທະນາຄານແຫ່ງ ສປປ ລາວ ຈຶ່ງອອກແຈ້ງການມາຍັງພາກສ່ວນຕ່າງໆ ດັ່ງນີ້:

1. ບໍ່ໃຫ້ຫຼົງເຊື່ອຕໍ່ການໂຄສະນາ ໃຫ້ເຂົ້າຮ່ວມທຶນໂດຍຫວັງຈະໄດ້ຮັບຄ່າຕອບແທນຈາກການລົງທຶນທີ່ສູງ ແລະການໂຄສະນາຊວນເຊື່ອໃນທຸກໆຮູບແບບ ຂອງບໍລິສັດພີເອັສ ສົ່ງເສີມກະສິກຳ ແລະອຸດສາຫະກຳຄົບວົງຈອນ ຂາອອກ-ຂາເຂົ້າ ຈຳກັດຜູ້ດຽວ.
2. ທະນາຄານແຫ່ງ ສປປ ລາວ ແລະຂະແໜງການອື່ນໆຂອງລັດ ຈະບໍ່ຊ່ວຍຮັບຜິດຊອບທາງການເງິນໃດໆ ທີ່ບໍລິສັດພີເອັສສ້າງຂຶ້ນໂດຍບໍ່ຖືກຕ້ອງ. ທຸກບັນຫາທາງການເງິນ ທີ່ບໍລິສັດພີເອັສ ໄດ້ກໍ່ຂຶ້ນກັບສະມາຊິກ ໃນໄລຍະທີ່ຜ່ານມາ ແລະໃນຕໍ່ໜ້າ ແມ່ນເປັນຄວາມຮັບຜິດຊອບຂອງບໍລິສັດ ພີເອັສ ທັງໝົດ.
3. ຖ້າຫາກຜູ້ຮ່ວມທຶນ ຫຼືສະມາຊິກ ຫາກໄດ້ຮັບຄວາມອັບປະໂຫຍດ ແມ່ນໃຫ້ສະເໜີຫາສານປະຊາຊົນ ຫຼືເຈົ້າໜ້າທີ່ຕຳຫຼວດເສດຖະກິດ ໃນທ້ອງຖິ່ນຂອງທ່ານ ເພື່ອດຳເນີນການແກ້ໄຂ.ເຊິ່ງແຈ້ງການສະບັບດັ່ງກ່າວນີ້ແມ່ນເຊັນແທນຫົວໜ້າຫ້ອງການ ທະນາຄານແຫ່ງ ສປປ ລາວ ໂດຍທ່ານ ໄຊລືຊາ ຜຸຍຍະວົງ

ໃນຂະນະທີ່ກ່ອນໜ້ານີ້ ຄືວັນທີ 27 ເມສາ 2017 ທະນາຄານແຫ່ງ ສປປ ລາວ ກໍໄດ້ອອກແຈ້ງການເລກທີ 252/ຫກ ເລື່ອງ: ການເພິ່ມຄວາມມີສະຕິລະວັງຕົວເພື່ອຫຼີກລ້ຽງການຕົກເລ່ກົນການໂຄສະນາຊວນເຊື່ອກ່ຽວກັບການລະດົມເງິນຝາກ ແລະປ່ອຍສິນເຊື່ອທີ່ໄດ້ຮັບຜົນຕອບແທນສູງ ຂອງບັນດາບໍລິສັດແລະບຸກຄົນທີ່ບໍ່ຫວັງດີ. ອ່ານຂ່າວດັ່ງກ່າວຢູ່ລີ້ງນີ້: http://www.laopost.com/2017/05/09/89693