ເຮືອບິນຂັບໄລ່ຂອງກອງທັບອີຕາລີ 2 ລຳ ຕຳກັນເທິງອາກາດ ກ່ອນຕົກລົງໃນເຂດພູສູງທາງພາກຕາເວັນອອກຂອງ
ປະເທດ ເບື້ອງຕົ້ນມີຜູ້ສູນຫາຍ 4 ຄົນ.
ສຳນັກຂ່າວຕ່າງປະເທດລາຍງານ ໃນມື້ນີ້ (20 ສິງຫາ) ວ່າ ເກີດເຫດເຮືອບິນຂັບໄລ່ ” ທໍນາໂດ ” 2 ລຳ ຈາກຖານທັບ
ເມືອງເກດີ ທາງພາກຕາເວັນຕົກສ່ຽງເໜືອຂອງອີຕາລີ ຕຳກັນກາງອາກາດໃນລະຫວ່າງເຝິກຊ້ອມການບິນ ຫ່າງຈາກ
ເມືອງອັສໂຄລີ ໃນເຂດມາເຊ ທາງພາກຕາເວັນອອກຂອງປະເທດປະມານ 30 ກິໂລແມັດ ກ່ອນຈະຕົກລົງໄປໃນປ່າ ໃນ
ເບື້ອງຕົ້ນແມ່ນເຊື່ອວ່າມີຜູ້ສູນຫາຍ 4 ຄົນ ໄດ້ແກ່ນັກບິນ ແລະ ຜູ້ຊ່ວຍຂອງນັກບິນຂອງເຮືອບິນທັງສອງລຳ.
ລາຍງານຂ່າວ ອ້າງຄຳໃຫ້ສຳພາດຂອງ ທ້າວ ຟາບິໂອ ວາເລຣີ ຜູ້ເຫັນເຫດການດັ່ງກ່າວ ຜ່ານສະຖານີໂທລະພາບຊ່ອງ
Sky TG24 ຂອງອີຕາລີວ່າ ເກີດລູກໄຟຂະໜາດໃຫຍ່ລອຍຢູ່ກາງອາກາດປະມານ 5 ວິນາທີ ກ່ອນທີ່ມັນຈະຕົກລົງໄປ
ໃສ່ໜ່ວຍພູ ໃນຂະນະທີ່ຊາວບ້ານໃນໝູ່ບ້ານ ໂອລິບຣາ ແລະ ເວນາຣັອດຕາ ເຊິ່ງຢູ່ໃກ້ໆກັບຈຸດເກີດເຫດກໍໄດ້ເປີດເຜີຍ
ວ່າ ໄດ້ຍິນສຽງລະເບີດກ່ອນທີ່ຈະເກີດໄຟລຸກໄໝ້ໃນປ່າ.
ທັງນີ້ ປະຕິບັດການຄົ້ນຫາຜູ້ລອດຊີວິດ ຍັງຄົງດຳເນີນຕໍ່ໄປ ໂດຍເຈົ້າໜ້າທີ່ດັບເພີງ ແລະ ຕຳຫຼວດທ້ອງຖິ່ນເປີດເຜີຍ
ວ່າ ພົບເສດຊາກເຮືອບິນທີ່ຕົກແລ້ວ ໃນຂະນະທີ່ສື່ທ້ອງຖິ່ນລາຍງານວ່າ ມີຜູ້ພົບເຫັນນັກບິນຂອງເຮືອບິນທັງ 2 ລຳ
ດີດໂຕອອກຈາກເຮືອບິນ ແຕ່ລາຍງານນີ້ຍັງບໍ່ທັນໄດ້ຮັບການຢືນຢັນຢ່າງເປັນທາງການເທື່ອ.