ລັດຖະບານອັງກິດສົ່ງເຈົ້າໜ້າທີ່ທະຫານຕິດອາວຸດ ປະຈຳການຕາມຈຸດສຳຄັນໃນແຫລ່ງທ່ອງທ່ຽວ ແລະ ແຫຼ່ງຊຸມນຸມຕ່າງໆ ທົ່ວປະເທດ ຫຼັງທ່ານ ນາງ ເທເຣຊາ ເມ ນາຍົກລັດຖະມົນຕີ ສັ່ງຍົກລະດັບການເຝົ້າລະວັງໄພການກໍ່ການຮ້າຍຈາກລະດັບຮຸນແຮງເປັນລະດັບສູງສຸດ ເຊິ່ງເປັນຜົນມາຈາກເຫດລະເບີດກາງຄອນເສີດຂອງສີລະປິນຊື່ດັງຊາວອາເມລິກັນ ເມື່ອຄືນວັນຈັນທີ່ຜ່ານມາ ເຮັດໃຫ້ມີຄົນເສຍຊີວິດ 22 ຄົນ ແລະ ບາດເຈັບ 60 ຄົນ ຜູ້ນຳອັງກິດຍອມຮັບວ່າ ການຍົກລະດັບໃນເທື່ອນີ້ ເພື່ອກຽມຮັບມືການໂຈມຕີທີ່ອາດເກີດຂຶ້ນ ແລະ ເປັນການຄຸມເຂັ້ມ ກ່ອນການເລືອກຕັ້ງທົ່ວໄປຂອງຊາວອັງກິດ ໃນວັນທີ 8 ມິຖຸນາ 2017 ທີ່ຈະມາຮອດນີ້.
ສ່ວນຄວບຄືບໜ້າເຫດລະເບີດ ຕຳຫຼວດເຜີຍຊື່ ແລະ ປະຫວັດມືລະເບີດແລ້ວ ແມ່ນ ທ້າວ ຊັລມານ ອະເບດີ ໄວອາຍຸ 22 ປີ ຊາວອັງກິດ ເຊື້ອສາຍລີເບຍ ເປັນບຸກຄົນທີ່ມີລາຍຊື່ໃນກຸ່ມທີ່ເຈົ້າໜ້າທີ່ເຝົ້າລະວັງການກໍ່ການຮ້າຍ ໂດຍເຂົາໄດ້ລົງມືກໍ່ເຫດ ດ້ວຍການນຳລະເບີດໃສ່ໃນກະເປົາເດີນທາງ ກ່ອນຈູດສະນວນບໍລິເວນຫ້ອງດ້ານນອກ ລະຫວ່າງທີ່ແຟນເພງກຳລັງທະຍອຍຍ່າງອອກສະໜາມ ຫຼັງຈົບຄອນເສີດ.
ຕອນນີ້ ເຈົ້າໜ້າທີ່ຍັງຢູ່ໃນລະຫວ່າງການຂະຫຍາຍຜົນວ່າຄົນຮ້າຍລົງມືພຽງຄົນດຽວ ຫຼື ມີຜູ່ຮ່ວມຂະບວນການ ຮວມເຖິງຈະກວດສອບຢ່າງລະອຽດວ່າກຸ່ມໄອເອສຢູ່ເບື້ອງຫຼັງເຫດການດັ່ງກ່າວນີ້ ຫຼື ບໍ່ ສ່ວນບັນຍາກາດໃນອັງກິດຍັງມີປະຊາຊົນຈຳນວນຫຼາຍມາຮວມໄວ້ອາໄລຕໍ່ຜູ່ສູນເສຍຢ່າງຕໍ່ເນື່ອງ.