ກະຊວງຖະແຫຼງຂ່າວວັດທະນະທຳແລະທ່ອງທ່ຽວ ໄດ້ຮັບກຽດເປັນເຈົ້າພາບກອງປະຊຸມສຳມະນາລະດັບພາກພື້ນ ບັນດາປະເທດລຸ່ມແມ່ນໍ້າຂອງ ຫຼື CLMV+T ກອງປະຊຸມດັ່ງກ່າວໄດ້ຈັດຂຶ້ນໃນວັນທີ ເມື່ອວັນທີ 3 ພຶດສະພາ 2017 ທີ່ຜ່ານມາ ໂດຍການເປັນປະທານຂອງທ່ານ ສະຫວັນຄອນ ຣາຊມົນຕຣີ ຮອງລັດຖະມົນຕີກະຊວງ ຖະແຫຼງຂ່າວ ວັດທະນະທຳ ແລະທ່ອງທ່ຽວ ໂດຍໃຫ້ກຽດເຂົ້າຮ່ວມໂດຍ ທ່ານ ມິຊາເອວ ເກຣົາ ເອກອັກຄະລັດຖະທູດເຢຍລະມັນປະຈຳລາວ ແລະຜູ້ແທນກອງປະຊຸມຈາກບັນດາປະເທດ CLMV+Thai.
ທ່ານ ສະຫວັນຄອນ ຣາຊມົນຕຣີ ໄດ້ໃຫ້ກຽດຂຶ້ນກ່າວເປີດງານ ໂດຍເນື້ອໃນບາງຕອນທ່ານກ່າວວ່າ ບັນດາປະເທດ ກູປູເຈຍ, ລາວ, ມຽນມາ, ຫວຽດນາມ ແລະ ໄທ ແມ່ນມີທ່າແຮງທາງດ້ານການທ່ອງທ່ຽວ ເພາະມີແຫຼ່ງທ່ອງທ່ຽວຢ່າງອຸດົມສົມບູນ ທັງປະຫວັດສາດ, ວັດທະນະທຳ ແລະທຳມະຊາດ ໃນແຕ່ລະປີມີນັກທ່ອງທ່ຽວຈາກທົ່ວໂລກເດິນທາງເຂົ້າມາທ່ອງທ່ຽວໃນຂົງເຂດນີ້ຈຳນວນມະຫາສານ ໃນປີ 2016 ສະເພາະແຕ່ປະເທດລາວກໍມີນັກທ່ອງທ່ຽວເດິນທາງເຂົ້າມາທ່ອງທ່ຽວເຖິງ 4,200,000 ຄົນ ແລະສ້າງລາຍໄດ້ເຖິງ 724 ລ້ານໂດລາສະຫະລັດ.
ແນວໃດກໍຕາມ, ວຽກງານດັ່ງກ່າວນີ້ ຍັງຈຳເປັນຕ້ອງໄດ້ຮັບການຮ່ວມມືລະຫວ່າງ 5 ປະເທດ ແລະຈຳເປັນຕ້ອງໄດ້ຮັບການສະໜັບສະໜູນຈາກພາກເອກະຊົນ ຈຶ່ງຈະເຮັດໃຫ້ວຽກງານນີ້ມີຄວາມຈະເລີນກ້າວໜ້າຢ່າງບໍ່ຢຸດຢັ້ງ.
