ເປັນເລື່ອງປົກກະຕິທີ່ຄູ່ແຕ່ງງານ ຈະຕ້ອງພົບບັນຫາທີ່ໄດ້ຜິດຖຽງກັນ ເພາະການທີ່ຄົນສອງຄົນມາຈາກຕ່າງຄອບຄົວ ຕ່າງພໍ່ແມ່ ມາອາໄສຮ່ວມກັນ ຍ່ອມບໍ່ແມ່ນເລື່ອງງ່າຍ ຊ່ວງທຳອິດຂອງຊີວິດແຕ່ງງານ ຈຶ່ງເປັນເລື່ອງຂອງການປັບຕົວເຂົ້າຫາກັນ, ມື້ນີ້ເຮົາຈະມາຮູ້ຈັກກ່ຽວກັບບັນຫາ ທີ່ຄູ່ແຕ່ງງານທຸກຄູ່ຕ້ອງພົບຕະຫຼອດ ເພື່ອປ້ອງກັນບໍ່ໃຫ້ຊີວິດຄູ່ຂອງຕົວເອງຕ້ອງພົບກັບບັນຫາ
- ເລື່ອງເງິນ: ເປັນເລື່ອງທີ່ສ້າງບັນຫາ ໃຫ້ກັບຄູ່ຮັກເປັນອັນດັບຕົ້ນໆ ສ່ວນຫຼາຍເກີດຈາກການໃຊ້ຈ່າຍທີ່ບໍ່ກົງກັນ ໂດຍສະເພາະບັນຫາໜີ້ສິນຂອງອີກຝ່າຍ ເຊິ່ງເຮັດໃຫ້ຫຼາຍຄູ່ເຖິງຂັ້ນຜິດກັນ ແລະຢ່າຮ້າງກັນໄປ, ດັ່ງນັ້ນ ກ່ອນແຕ່ງງານ ເຈົ້າແລະແຟນຄວນມີການຕົກລົງເລື່ອງການບໍລິຫານເງິນຢ່າງຊັດເຈນ ເພື່ອບໍ່ໃຫ້ເກີດບັນຫາ
- ການຫຶງຫວງ: ມັກເກີດຈາກການບໍ່ເຊື່ອໃຈກັນ, ຄວາມຮູ້ສຶກບໍ່ໝັ້ນຄົງ ທາງຄວາມຮູ້ສຶກ
- ເລື່ອງຄອບຄົວຂອງອີກຝ່າຍ: ບັນຫານີ້ເປັນບັນຫາທີ່ຍາວນານ ອາດຈະເກັບມາດົນຕັ້ງແຕ່ບໍ່ທັນແຕ່ງງານ ສ່ວນຫຼາຍແລ້ວ ມັກເປັນເລື່ອງຂອງຄວາມເຂົ້າກັນບໍ່ໄດ້ ຫຼືບໍ່ກໍ່ຄອບຄົວຂອງອີກຝ່າຍເຂົ້າມາຫຍຸ້ງກ່ຽວຊີວິດສ່ວນຕົວຂອງຄອບຄົວຫຼາຍເກີນໄປ
- ເລື່ອງວຽກເຮືອນ: ຜູ້ຊາຍຫຼາຍຄົນ ມັກຄິດວ່າວຽກເຮືອນ ເປັນໜ້າທີ່ຂອງຜູ້ຍິງ ແລະເອົາໜ້າທີ່ດັ່າງກ່າວໄປໃຫ້ຜູ້ຍິງ, ໃຜທີ່ບໍ່ເຄີຍເຮັດວຽກເຮືອນ ຮັບຮອງຕ້ອງບໍ່ຮູ້ເຖິງຄວາມອິດເມື່ອຍ ດັ່ງນັ້ນລອງຫັນມາເຮັດຊ່ວຍກັນ ຫຼືຕົກລົງກັນດີກວ່າວ່າ ໃຜຈະຮັບຜິດຊອບຫຍັງ ແລະສິ່ງໃດທີ່ຈະຊ່ວຍກັນເຮັດ ແບບນີ້ດີກວ່າກັນຫຼາຍ
- ເລື່ອງຄວາມຕຶງຄຽດ: ເລື່ອງນີ້ ເປັນເລື່ອງໃກ້ຕົວທີ່ບໍ່ຄວນປະມາດ ຫຼາຍຄູ່ມີຄວາມຕຶງຄຽດສະສົມແບບບໍ່ຮູ້ຕົວ ຈາກນັ້ນກັບມາກໍມາໃຊ້ອາລົມກັບອີກຄົນແລ້ວ, ທຳອິດອີກຝ່າຍອາດທົນໄດ້ ແຕ່ບໍ່ມີໃຜທີ່ຈະທົນໄດ້ແບບນີ້ຕະຫຼອດໄປ ຖ້າເຈົ້າທັງສອງບໍ່ຮູ້ຈັກການປັບຕົວ ແລະປັບອາລົມໃຫ້ຖືກຈຸດ