ຄວາມຮັກທຳອິດກໍຫວານຈົນມີຄຳໜຶ່ງເວົ້າວ່າ “ນໍ້າຕົ້ມຜັກກໍວ່າຫວານ” ແຕ່ເມື່ອເຮົາຄົບກັນດົນໄປ ຄວາມສຳພັນກໍເລີ່ມຈາງລົງ ຈົນເຮັດໃຫ້ຫຼາຍຄູ່ຕ້ອງຈົບຄວາມສຳພັນລົງດ້ວຍການເລີກລາ, ເຊິ່ງສັນຍານເບື້ອງຕົ້ນທີ່ບົ່ງບອກໃຫ້ຮູ້ວ່າ ຄວາມຮັກຂອງເຈົ້າຄັ້ງນີ້ ອາດຕ້ອງຈົບລົງ
- ເບິ່ງອີກຝ່າຍໃນແງ່ຮ້າຍ: ແຕ່ກ່ອນອາດຄິດວ່າ ເມື່ອອີກຝ່າຍເຮັດຫຍັງ ເຈົ້າກໍພ້ອມທີ່ຈະເຂົ້າໃຈ ແລະໃຫ້ອະໄພຢູ່ສະເໝີ, ແຕ່ມາຮອດທຸກວັນນີ້ ເຈົ້າ ແລະເຂົາຕ່າງຕັ້ງແງ່ຮ້າຍ ແລະຈັບຜິດອີກຝ່າຍຕະຫຼອດເວລາ ເຊິ່ງສຸດທ້າຍກໍຕ້ອງຈົບລົງດ້ວຍການເລີກລາ
- ຄິດເຫັນຕອນຕົນເອງໂສດ: ຢູ່ດີໆກໍຄິດເຫັນເວລາທີ່ເຈົ້າໂສດຂຶ້ນມາຕະຫຼອດ, ທັງໆທີ່ເຈົ້າກໍມີຄົນຢູ່ຂ້າງກາຍ, ເຊິ່ງນີ້ອາດເປັນການບອກວ່າ ເຈົ້າໝົດຮັກ ແລະໝົດເຍື່ອໃຍຄວາມສຳພັນ ກັບແຟນເຈົ້າແລ້ວ ຫຼືບໍ່, ເຈົ້າລອງເຊັກຄວາມສຳພັນຄັ້ງນີ້ດີໆ ກ່ອນທີ່ຈະຈົບລົງ
- ບໍ່ສົນໃຈກັນ ແລະກັນ: ຄວາມຮັກຂອງເຈົ້າສອງຄົນ ປຽບເໝືອນແມ່ເຫຼັກຕ່າງຂົ້ວທີ່ດຶງດູດເຂົ້າຫາກັນ, ແຕ່ເມື່ອໃດທີ່ເຈົ້າຮູ້ສຶກວ່າເຈົ້າ ແລະເຂົາ ເປັນແມ່ເຫຼັກຂົ້ວດຽວກັນ ເຊິ່ງນັ້ນສະແດງໃຫ້ເຫັນວ່າ ເມື່ອເຈົ້າຢູ່ໃກ້ກັນກໍຈະຍູ້ກັນໃຫ້ຫ່າງກັນຫຼາຍເທົ່ານັ້ນ, ຖ້າອີກຝ່າຍເຮັດຫຍັງ ເຈົ້າກໍເລືອກທີ່ຈະເສີຍໆ, ບໍ່ສົນໃຈ, ເຮັດຄືບໍ່ເຫັນ, ບໍ່ໃສ່ໃຈ ນັ້ນເປັນພຶດຕິກຳທີ່ຊັດເຈນແລ້ວວ່າ ເຈົ້າອາດບໍ່ຢາກໃຫ້ເຂົາເຂົ້າມາໃນຊີວິດອີກຕໍ່ໄປ
- ເອົາເລື່ອງອະດີດມາເປັນບັນຫາ: ເພາະອະດີດເປັນເລື່ອງທີ່ບໍ່ສາມາດກັບໄປແກ້ໄຂໄດ້, ເຊິ່ງແຕ່ກ່ອນເຈົ້າສາມາດໃຫ້ອະໄພເຂົາໄດ້ ແຕ່ມາຮອດປະຈຸບັນເຈົ້າກັບເອົາເລື່ອງອະດີດນັ້ນມາເປັນບັນຫາເຮັດໃຫ້ຜິດກັນ ເຊິ່ງຖ້າເປັນແບບນີ້ຕະຫຼອດຄວາມສຳພັນຕ້ອງຂາດສະບັ້ນອາດຈົບລົງໄດ້
- ຄົບກັນດົນຍິ່ງບໍ່ເປັນຕົວຂອງຕົວເອງ: ການເປັນຕົວຂອງຕົວເອງ ເປັນສິ່ງສຳຄັນຂອງຄວາມຮັກ ເພາະຖ້າເຈົ້າເປັນຕົວເຈົ້າເອງ ຈະເຮັດໃຫ້ເຈົ້າສະບາຍໃຈ ແລະຮູ້ສຶກບໍ່ຝືນທີ່ຈະເຮັດ, ຖ້າຫາກມື້ໃດໜຶ່ງ ເຈົ້າຫາກອຶດອັດບໍ່ເປັນຕົວເອງ ນັ້ນສະແດງໃຫ້ເຫັນວ່າ ຄວາມຮັກຂອງເຈົ້າເດີນທາງມາໃກ້ຈຸດຈົບ ເຈົ້າລອງເຊັກສະຖານະຄວາມຮູ້ສຶກຕົວເອງໃຫ້ດີກ່ອນຕັດສິນໃຈໄປ
ສິ່ງທີ່ກ່າວມາຂ້າງເທິງນັ້ນ ເປັນສັນຍານເຕືອນເບື້ອງຕົ້ນ ທີ່ບອກໃຫ້ເຮົາຮູ້ວ່າຮັກຄັ້ງນີ້ໃກ້ເດີນທາງມາຮອດຈຸດຈົບແລ້ວ ແລະຖ້າຫາກເຈົ້າບໍ່ຢາກໃຫ້ຮັກຄັ້ງນີ້ຕ້ອງຈົບລົງ, ເຈົ້າຕ້ອງຮຽນຮູ້ຫາທາງແກ້ໄຂ ແລະປັບຕົວໃຫ້ຄວາມສຳພັນດີຂຶ້ນ