ສື່ຕ່າງປະເທດລາຍງານເມື່ອວັນທີ 3 ມີນາ 2017 ຜ່ານມາວ່າ ປະເທດຈີນກຳລັງມີໂຄງການສ້າງອຸທະຍານແຫ່ງຊາດສຳລັບໝີແພນດ້າແຫ່ງທຳອິດ ເຊິ່ງຈະຕັ້ງຢູ່ທາງພາກຕາເວັນຕົກສ່ຽງໃຕ້ຂອງປະເທດ ເຊິ່ງເປັນບໍລິເວນທີ່ໝີແພນດ້າໃນທຳມະຊາດອາໄສຢູ່

ອຸທະຍານແຫ່ງຊາດດັ່ງກ່າວ ມີເນື້ອທີ່ທັງໝົດ 27,134 ຕາລາງແມັດ ເຊິ່ງປະກອບດ້ວຍເນື້ອທີ່ຈາກມົນທົນເສສວນ ທີ່ເປັນບ້ານຂອງບັນດາໝີແພນດ້າ 20,177 ຕາລາງແມັດ, ມົນທົນການຊູ່ 2,571 ຕາລາງແມັດ ແລະມົນທົນສ່ານຊີ 4,400 ຕາລາງແມັດ

ກົມປ່າໄມ້ຂອງມົນທົນສ່ານຊີເວົ້າວ່າ ໝີແພນດ້າ ທີ່ອາໄສຢູ່ຕາມທຳມະຊາດໃນ 3 ມົນທົນນີ້ ຕ້ອງອາໄສຢູ່ພາຍໃຕ້ປັດໄຈທຳມະຊາດ ເຊິ່ງເຊື່ອວ່າການເຂົ້າມາບໍລິຫານຈັດການ ເຊິ່ງອາໄສເຕັກນິກຕ່າງໆ ທີ່ມີມາດຕະຖານ ຈະຊ່ວຍຫຼຸດຄວາມສ່ຽງຂອງການສູນພັນຂອງໝີແພນດ້າໄດ້

ໂຄງການນີ້ຫາກສຳເລັດ ຈະເປັນແຫຼ່ງທ່ອງທ່ຽວທີ່ດຶງດູດນັກທ່ອງທ່ຽວ ແລະຍັງເປັນບໍລິເວນສຳລັບອະນຸລັກໝີແພນດ້ານຳອີກ, ເຊິ່ງໃນປະຈຸບັນຍັງບໍ່ທັນມີອຸທະຍານສຳລັບໝີແພນດ້າໃນປະເທດຈີນ ແຕ່ກໍຍັງມີສູນວິທະຍາສາດທີ່ວິໄຈ ແລະປະສົມພັນເພື່ອເພີ່ມຈຳນວນແພນດ້າຫຼາຍບ່ອນ, ແຕ່ໝີແພນດ້າອາໄສຢູ່ບ່ອນທີ່ຈັດໄວ້ໃຫ້ ບໍ່ໄດ້ອາໄສຢູ່ຕາມທຳມະຊາດ

ກອງທຶນສັດປ່າໂລກສາກົນລາຍງານວ່າ ໃນປີ 2014 ຜ່ານມາ ມີໝີແພນດ້າ ທີ່ອາໄສຢູ່ຕາມທຳມະຊາດ ໃນປະເທດຈີນ 1,864 ໂຕ ເພີ່ມຂຶ້ນ 16,8% ຈາກປີ 2004