ສຳນັກຂ່າວເອເອຟຟີລາຍງານ ເມື່ອວັນທີ 16 ກຸມພາ 2017 ຜ່ານມາວ່າ ສະຖານະການໄຟໄໝ້ປ່າ ຢູ່ນິວຊີແລນໄດ້ໄໝ້ລາມມາຮອດພື້ນທີ່ໝູ່ບ້ານ ເຮັດໃຫ້ຕ້ອງໄດ້ອົບພະຍົບປະຊາຊົນ 1,000 ກວ່າຄົນ ອອກຈາກບ້ານເຮືອນໃນເມືອງໄຄຣສ໌ເຊິຣ໌ 400 ກວ່າຫຼັງຄາເຮືອນ, ເຊິ່ງຢ່າງໜ້ອຍມີ 11 ກວ່າຫຼັງຄາ ທີ່ຖືກໄຟໄໝ້ເສຍຫາຍແລ້ວ, ຄວັນໄຟໄດ້ກະຈາຍທົ່ວເມືອງ ຄວບຄຸມພື້ນທີ່ປະມານ 18 ຕາລາງກິໂລແມັດ
ໄຟປ່າເລີ່ມໄໝ້ຢູ່ທີ່ພໍຣ໌ຮິລ ເປັນພື້ນທີ່ ທີ່ເຂົ້າໄປຮອດຍາກ ຢູ່ທາງພາກຕາເວັນອອກຂອງເມືອງ ເຈົ້າໜ້າທີ່ດັບເພີງ 130 ກວ່າຄົນ ລະດົມກຳລັງເຂົ້າລະງັບເຫດ ລວມເຖິງເຮີລິຄອບເຕີ 14 ລຳ, ເຄື່ອງບິນອີກ 3 ລຳ
ໃນຂະນະດຽວກັນຍັງມີປະຊາຊົນຈຳນວນໜຶ່ງທີ່ຍັງຫ່ວງເຮືອນຕົນເອງ ເຮັດໃຫ້ຕຳຫຼວດອອກມາເຕືອນວ່າ ໄຟອາດລຸກໄໝ້ຢ່າງວ່ອງໄວ ດັ່ງນັ້ນຈຶ່ງມີເວລາໜ້ອຍທີ່ຈະໜີໄດ້ທັນ