ພໍ່ແມ່ທຸກຄົນຮູ້ບໍວ່າ ສິ່ງສຳຄັນທີ່ລູກໆທຸກຄົນຢາກໄດ້ ຈາກພໍ່ແມ່ຫຼາຍທີ່ສຸດອາດບໍ່ແມ່ນເງິນຄຳ ຫຼືສິ່ງຂອງທີ່ມີຄ່າ ແຕ່ລູກຕ້ອງການຄວາມຮັກ, ຄວາມຫ່ວງໄຍຈາກພໍ່ແມ່ຫຼາຍກວ່າ, ເຊິ່ງນີ້ເປັນ 7 ຄຳເວົ້າທີ່ລູກໆຢາກໄດ້ຍິນ ຈາກພໍ່ແມ່, ບໍ່ວ່າລູກຈະຢ່ໃນສະຖານະການທີ່ດີ ຫຼືບໍ່ດີ ສິ່ງດຽວທີ່ລູກຕ້ອງການນັ້ນຄື ກຳລັງໃຈຈາກພໍ່ແມ່

1. ພໍ່ແມ່ຮັກລູກ: ການບອກຮັກລູກເປັນຄຳເວົ້າທີ່ມີຄວາມໝາຍທີ່ສຸດ ເພາະຄວາມຮັກທີ່ດີທີ່ສຸດຄືການເລີ່ມຕົ້ນຈາກຄອບຄົວ, ຫາກລູກບໍ່ເຄີຍໄດ້ຍິນຄຳວ່າ “ຮັກ” ຈາກພໍ່ແມ່ຈັກເທື່ອ ກໍບໍ່ຮູ້ວ່າລູກຈະໄດ້ຍິນຄຳນີ້ຈາກໃຜ
2. ພໍ່ແມ່ພູມໃຈໃນຕົວລູກ: ການໃຫ້ຄຳຍ້ອງຍໍລູກ ເປັນສິ່ງທີ່ດີງາມ ເປັນລາງວັນທີ່ດີທີ່ສຸດຫຼາຍກວ່າການຊື້ຂອງຂວັນເປັນການຕອບແທນ ເພາະຈະເຮັດໃຫ້ລູກເກີດຄວາມພູມໃຈໃນຕົວເອງ ແລະພະຍາຍາມເຮັດສິ່ງທີ່ຕັ້ງໃຈຢ່າງປະສົບຄວາມສຳເລັດ
3. ເວົ້າຄຳວ່າ “ຂໍໂທດ” ແບບບໍ່ຕ້ອງອາຍ: ໃຜກໍສາມາດເຮັດຜິດໄດ້ ການເວົ້າວ່າ “ຂໍໂທດ” ໃນເວລາພໍ່ແມ່ເຮັດຜິດ ຖືເປັນຕົວຢ່າງທີ່ດີໃຫ້ລູກ ເພາະລູກຈະໄດ້ຮຽນຮູ້ວ່າ ການເຮັດສິ່ງໃດໜຶ່ງທີ່ເຮັດຜິດໂດຍຕັ້ງໃຈ ຫຼືບໍ່ຕັ້ງໃຈ ການຂໍໂທດ ຄືສິ່ງທຳອິດທີ່ຄວນເຮັດ
4. ການໃຫ້ອະໄພລູກ: ເດັກນ້ອຍເລີ່ມໃຫຍ່ ຍິ່ງເລີ່ມມີຄວາມຜິດເປັນຂອງຕົວເອງ ແລະການເຮັດໃນສິ່ງທີ່ຕົນບໍ່ຮູ້ ເຊິ່ງອາດເຮັດໃຫ້ພໍ່ແມ່ໃຈຮ້າຍ ແຕ່ແນວໃດລູກ ກໍເປັນລູກ ພໍ່ແມ່ຍິນດີທີ່ຈະ “ໃຫ້ອະໄພລູກ” ແລະໃຫ້ເຫດຜົນຕໍ່ລູກ ເຮັດໃຫ້ລູກຮຽນຮູ້ເຫດຜົນ ແລະພະຍາຍາມບໍ່ເຮັດຜິດອີກ
5. ແມ່ຮັບຟັງລູກສະເໝີ: ເມື່ອລູກກຳລັງເລີ່ມເຂົ້າສູ່ໄວລຸ້ນ ເລີ່ມມີໂລກສ່ວນຕົວ ແລະເປັນຕົວຂອງໂຕເອງ ພໍ່ແມ່ອາດບໍ່ສາມາດບັງຄັບລູກເຮັດນັ້ນນີ້ໄດ້ອີກຕໍ່ໄປ ແຕ່ພໍ່ແມ່ເຮັດໄດ້ດີທີ່ສຸດຄື ການຕັ້ງຄຳຖາມໃຫ້ລູກຄິດ ແລະພ້ອມທີ່ຈະຮັບຟັງລູກທຸກເລື່ອງ
6. ນີ້ຄືສິ່ງທີ່ລູກຕ້ອງຮັບຜິດຊອບດ້ວຍຕົວເອງ: ພໍ່ແມ່ບໍ່ຄວນຊ່ວຍລູກແກ້ໄຂບັນຫາທຸກເລື່ອງ ເພາະຖ້າເຮົາໄປແກ້ໄຂບັນຫາໃຫ້ລູກທຸກເລື່ອງ ຈະເຮັດໃຫ້ລູກບໍ່ມີຄວາມຮັບຜິດຊອບ, ດັ່ງນັ້ນ ພໍ່ແມ່ຄວນໃຫ້ລູກແກ້ໄຂບັນຫາໃນສິ່ງທີ່ລູກເຮັດຜິດ ຫຼືສິ່ງທີ່ຄວນຮັບຜິດຊອບ
7. ລູກຢາກເປັນຫຍັງກໍໄດ້ໃນສິ່ງທີ່ລູກຢາກເປັນ: ການທີ່ລູກໃຫຍ່ມາຈະເປັນຫຍັງ ເປັນສິ່ງທີ່ພໍ່ແມ່ຫຼາຍຄົນ ມັກຄາດຫວັງ ແລະຕັ້ງຄວາມຫວັງໄວ້ໃນຕົວລູກ ແຕ່ສິ່ງສຳຄັນຄື ການຮັບຮູ້ໃນຄວາມສາມາດ ແລະເຊື່ອໝັ້ນໃນຕົວລູກ ຫຼາຍກວ່າການທີ່ພໍ່ແມ່ຕ້ອງການໃຫ້ເປັນ, ເມື່ອຮອດເວລາ ເຮົາສາມາດສອນລູກໄດ້ວ່າ “ລູກຢາກເປັນຫຍັງກໍໄດ້ໃນສິ່ງທີ່ລູກຢາກເປັນ” ພໍ່ແມ່ຈະເປັນຄົນທີ່ສະໜັບສະໜູນໃນສິ່ງທີ່ລູກຢາກເປັນ ເພື່ອໃຫ້ເຂົາສາມາດກຽມຕົວ ແລະກຽມຄວາມພ້ອມປະເຊີນກັບສະຖານະການຕໍ່ໄປ