ປີດສາກລົງຢ່າງເປັນທາງການແລ້ວ ງານມະຫາກຳກິລານັກຮຽນມັດທະຍົມສຶກສາທົ່ວປະເທດຄັ້ງທີ 6 ຫຼື ນົກກົກຄຳ ເກມ 2017 ທີ່ແຂວງບໍລິຄຳໄຊ ລະຫວ່າງວັນທີ 1-9 ກຸມພາ 2017. ຂະນະທີ່ນະຄອນຫຼວງວຽງຈັນ ຍັງຄອງເຈົ້າຫຼຽນຄໍາ ເປັນສະໄໝທີ 5 ໂດຍກວາດມາໄດ້ 26 ຫຼຽນຄຳ, 23 ຫຼຽນເງິນ ແລະ 29 ຫຼຽນທອງ ລວມ 78 ຫຼຽນ. ສ່ວນເຈົ້າພາບຄັ້ງຕໍ່ໄປ (ຄັ້ງທີ 7) ແມ່ນແຂວງສາລະວັນ ໃນປີ 2020.
ເມື່ອວັນທີ 9 ກຸມພາ ຜ່ານມາ ທີ່ສະໜາມກິລາ ມສ ສີທ່ານາໄຊ ເມືອງປາກຊັນ ແຂວງບໍລິຄຳໄຊ ໄດ້ມີພີທີປິດສາກງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 6 ຢ່າງເປັນທາງການ ໂດຍໃຫ້ກຽດເຂົ້າຮ່ວມກ່າວປີດງານຂອງພະນະທ່ານ ພັນຄໍາ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ, ມີທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ ເຈົ້າແຂວງບໍລິຄຳໄຊ,ປະທານຈັດງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 6, ທ່ານ ນາງ ແສງເດືອນ ຫຼ້າຈັນທະບູນ ກຳມະການສູນກາງພັກ ລັດຖະມົນຕີກະຊວງສຶກສາທິການ ແລະ ກິລາ, ພ້ອມດ້ວຍບັນດາການນຳພັກ-ລັດຂັ້ນສູນກາງ, ລັດຖະມົນຕີ, ເຈົ້າແຂວງ, ຮອງລັດຖະມົນຕີ, ຮອງເຈົ້າແຂວງ, ຄະນະຮັບຜິດຊອບຈັດງານ, ຄະນະນໍານັກກິລາ, ນັກກິລາ ແລະ ບັນດາແຂກທີ່ຖືກເຊີນເຂົ້າຮ່ວມ.
ໃນໂອກາດດັ່ງກ່າວ, ທ່ານ ປອ. ກອງແກ້ວ ໄຊສົງຄາມ ໄດ້ກ່າວລາຍງານສະຫຼຸບຜົນສຳເລັດໃນການຈັດງານດັ່ງກ່າວ ວ່າ: ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 6 ໄດ້ທຳການແຂ່ງຂັນກັນຢ່າງເປັນທາງການແຕ່ວັນທີ 1 ກຸມພາ 2017, ເຊິ່ງໄດ້ທຳການແຂ່ງຂັນໃນ 12 ປະເພດກິລາ. ຜ່ານການແຂ່ງຂັນກັນ 9 ວັນ ສາມາດສະຫຼຸບຜົນງານຂອງນັກກິລາແຕ່ລະແຂວງ ໂດຍສະເພາະແມ່ນນັກກິລາ
- ນະຄອນຫຼວງວຽງຈັນ ຍັງຄອງເຈົ້າຫຼຽນຄຳ ເປັນສະໄໝທີ 5 ໂດຍຍາດມາໄດ້ 26 ຫຼຽນຄຳ, 23 ຫຼຽນເງິນ ແລະ 29 ຫຼຽນທອງ ລວມ 78 ຫຼຽນ;
- ແຂວງ ສະຫວັນນະເຂດ ຍາດໄດ້ 21 ຫຼຽນຄຳ, 24 ຫຼຽນເງິນ ແລະ 14 ຫຼຽນທອງ ລວມ 59 ຫຼຽນ
- ແຂວງ ບໍລິຄໍາໄຊ ເຈົ້າພາບ ຍາດໄດ້ 17 ຫຼຽນຄໍາ, 16 ຫຼຽນເງິນ ແລະ 22 ຫຼຽນທອງ ລວມ 55 ຫຼຽນ
- ແຂວງ ຈຳປາສັກ ຍາດໄດ້ 10 ຫຼຽນຄຳ, 15 ຫຼຽນເງິນ ແລະ 16 ຫຼຽນທອງ ລວມ 41 ຫຼຽນ
- ແຂວງ ອຸດົມໄຊ ຍາດໄດ້ 10 ຫຼຽນຄຳ, 9 ຫຼຽນເງິນ ແລະ 10 ຫຼຽນທອງ ລວມ 29 ຫຼຽນ
- ແຂວງ ຊຽງຂວາງ ຍາດໄດ້ 10 ຫຼຽນຄຳ 4 ຫຼຽນເງິນ ແລະ 13 ຫຼຽນທອງ ລວມ 27 ຫຼຽນ
- ແຂວງ ຫຼວງພະບາງ ຍາດໄດ້ 9 ຫຼຽນຄຳ, 6 ຫຼຽນເງິນ ແລະ 20 ຫຼຽນທອງ ລວມ 35 ຫຼຽນ
- ແຂວງ ບໍ່ແກ້ວ ຍາດໄດ້ 6 ຫຼຽນຄຳ, 3 ຫຼຽນເງິນ ແລະ 3 ຫຼຽນທອງ ລວມ 12 ຫຼຽນ
- ແຂວງ ຫົວພັນ ຍາດໄດ້ 6 ຫຼຽນຄຳ, 1 ຫຼຽນເງິນ ແລະ 8 ຫຼຽນທອງ ລວມ 15 ຫຼຽນ
- ແຂວງ ຄຳມ່ວນ ຍາດມາໄດ້ 4 ຫຼຽນຄຳ, 8 ຫຼຽນເງິນ ແລະ 14 ຫຼຽນທອງ ລວມ 26 ຫຼຽນ
- ແຂວງ ອັດຕະປື ຍາດໄດ້ 3 ຫຼຽນຄຳ, 4 ຫຼຽນເງິນ ແລະ 8 ຫຼຽນທອງ ລວມ 15 ຫຼຽນ
- ແຂວງ ໄຊຍະບູລີ ຍາດໄດ້ 2 ຫຼຽນຄຳ, 6 ຫຼຽນເງິນ ແລະ 7 ຫຼຽນທອງ ລວມ 15 ຫຼຽນ
- ແຂວງ ສາລະວັນ ຍາດໄດ້ 1 ຫຼຽນຄຳ, 1 ຫຼຽນເງິນ ແລະ 3 ຫຼຽນທອງ ລວມ 5 ຫຼຽນ
- ແຂວງ ໄຊສົມບູນ ຍາດໄດ້ 1 ຫຼຽນຄຳ ແລະ 1 ຫຼຽນທອງ ລວມ 2 ຫຼຽນ
- ແຂວງ ວຽງຈັນ ຍາດໄດ້ 3 ຫຼຽນເງິນ ແລະ 3 ຫຼຽນທອງ ລວມ 6 ຫຼຽນ
- ແຂວງ ຫຼວງນໍ້າທາ ຍາດໄດ້ 2 ຫຼຽນເງິນ ແລະ 2 ຫຼຽນທອງ ລວມ 4 ຫຼຽນ
- ແຂວງຜົ້ງສາລີ ຍາດໄດ້ 1 ຫຼຽນເງິນ ແລະ 2 ຫຼຽນທອງ ລວມ 3 ຫຼຽນ
- ແຂວງເຊກອງ ຍາດໄດ້ 1 ຫຼຽນທອງ
ຈາກການຊີງໄຊກັນທັງໝົດ 126 ຫຼຽນຄຳ, 126 ຫຼຽນເງິນ ແລະ 176 ຫຼຽນທອງ.
ຫຼັງຈາກນັ້ນ, ພະນະທ່ານ ພັນຄຳ ວິພາວັນ ກໍ່ໃຫ້ກຽດກ່າວປິດງານຢ່າງເປັນທາງການ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຜົນງານ, ຜົນສຳເລັດຂອງຄະນະຮັບຜິດຊອບຈັດງານ, ຄະນະພັກ, ອຳນາດການປົກຄອງ, ພີ່ນ້ອງປະຊາຊົນຊາວແຂວງບໍລິຄຳໄຊ, ບັນດາທ່ານຄະນະນຳນັກກິລາ, ຄູເຝິກ, ນັກກິລາ, ຜູ້ປະກອບການ, ຜູ້ໃຫ້ການອຸປະຖໍາ-ສະໜັບສະໜູນ ຕະຫຼອດຮອດ ຄູ-ອາຈານ ແລະ ພີ່ນ້ອງປະຊາຊົນບັນດາເຜົ່າ ທີ່ໄດ້ປະກອບສ່ວນເຂົ້າໃນງານຄັ້ງນີ້ ຈົນມີຜົນສຳເລັດຕາມຈຸດປະສົງ ແລະ ລະດັບຄາດໝາຍຢ່າງຈົບງາມ.
ນອກຈາກນີ້, ຍັງໄດ້ມີການສວນສະໜາມຕ່າງໆ ພ້ອມທັງພິທີເຊີນທຸງຊາດ ແລະ ທຸງກິລາລົງຈາກຍອດເສົາ ແລະ ໄຟໃນອ່າງທວນໄຟກໍ່ຄ່ອຍໆມອດລົງ ກ່ອນທີ່ຈະມີພິທີມອບທຸງກິລາໃຫ້ແກ່ແຂວງສາລະວັນເປັນເຈົ້າພາບ ຄັ້ງທີ 7 ໃນປີ 2020 ໂດຍໃຫ້ກຽດຮັບຂອງທ່ານ ສີສຸວັນ ວົງຈອມສີເຈົ້າແຂວງສາລະວັນ, ເຊິ່ງທ່ານກໍ່ໄດ້ຕາງໜ້າໃຫ້ຄະນະພັກ-ອົງການປົກຄອງ ແລະ ປະຊາຊົນບັນດາເຜົ່າຊາວແຂວງສາລະວັນ ສະແດງຄວາມຮູ້ສຶກເປັນກຽດຢ່າງສູງ ແລະ ພາກພູມໃຈເປັນຢ່າງຍິງ ທີ່ລັດຖະບານ ກໍ່ຄື ກະຊວງສຶກສາທິການ ແລະ ກິລາ ໄດ້ມອບໝາຍໃຫ້ເປັນເຈົ້າພາບ ໃນປີ 2020, ເຊິ່ງເປັນພາລະກິດອັນໜັກໜ່ວງ ແລະ ມີກຽດສະຫງ່າ ທີ່ປຽບລົ້ນໄປດ້ວຍຄວາມເຊື່ອໝັ້ນ.
ສຳລັບລາຍການສະແດງສິລະປະວັນນະຄະດີ ໃນພີທີປິດດັ່ງກ່າວ, ແຂວງບໍລິຄຳໄຊ ເຈົ້າພາບ ໄດ້ຈັດສະແດງ 5 ລາຍ ການ ຄື: ລາຍການທີ 1 ແມ່ນ “ປິດສະໜາລຳສາລະວັນ” ສະແດງເຖິງຄວາມສາມັກຄີ, ວິຖີຊີວິດ ແລະ ຮີດຄອງປະເພນີ ທີ່ໄດ້ສືບທອດກັນມາແຕ່ບັນພະບູລຸດຂອງຊາວແຂວງສາວະວັນ, ລຳສາລະວັນ ສະແດງໂດຍນ້ອງນັກຮຽນ ຈຳນວນ 32 ຄົນ ຈາກ ມສ ສາລະວັນ ແລະ ມສ ອົງແກ້ວ; ລາຍການທີ 2 ເປັນບົດເພງ “ນັດພົບກັນປີ 2020” ສະແດງເຖິງການເຊີນຊວນນັກກິລາ ເຂົ້າຮ່ວມງານມະຫະກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 7 ປີ 2020 ສະແດງໂດຍນ້ອງນັກຮຽນຈຳນວນ 32 ຄົນ ຈາກ ມສ ສາລະວັນ ແລະ ມສ ອົງແກ້ວ; ລາຍການທີ 3 ເປັນບົດຟ້ອນ “ຮ່ວມໃຈສະຫຼອງໄຊ” ສະແດງເຖິງບັນດານັກຮຽນ, ຄູ-ອາຈານ, ທະຫານຕຳຫຼວດ, ພໍ່-ແມ່ປະຊາຊົນ, ແພດໝໍ ແລະ ທຸກຊັ້ນຄົນພາກັນມ່ວນຊື່ນສະຫຼອງຜົນສຳເລັດຂອງງານມະຫະກຳກິລານັກຮຽນໃນຄັ້ງນີ້ ສະແດງໂດຍນ້ອງນັກຮຽນຈຳນວນ 210 ຄົນ ຈາກໂຮງຮຽນ ມສ ສີທ່ານາໄຊ; ລາຍການທີ 4 ເປັນບົດຟ້ອນ “ລູກຫຼານລຸງ ສີສົມພອນ ລໍວັນໄຊ ຫ່າງໄກສິ່ງເສບຕິດ ເພື່ອສືບທອດພາລະກິດຂອງຊາດ” ສະແດງເຖິງຄວາມເຂັ້ມແຂງ, ແຂງ ແຮງ, ມີລະບຽບວິໃນຂອງນ້ອງນັກຮຽນ ທີ່ມີຄວາມມັກຮັກໃນສິລະປະປ້ອງກັນຕົວຂອງລາວ, ສະແດງໂດຍນ້ອງນັກຮຽນຈຳນວນ 210 ຄົນ ຈາກໂຮງຮຽນ ມສ ສີທ່ານາໄຊ ແລະ ປີດທ້າຍກັນທີບົດຟ້ອນ “ອະນາຄົດຂອງຊາດ” ສະແດງເຖິງພະລັງຄວາມສາມັກຄີຂອງບັນດານ້ອງນັກຮຽນທີ່ມັກຮັກໃນການຫຼິ້ນກິລາ ແລະ ເອົາໃຈໃສ່ໃນການຮ່ຳຮຽນ ເພື່ອກາຍເປັນໜໍ່ແໜງຂອງປະເທດຊາດ, ສະແດງໂດຍນ້ອງນັກຮຽນຈຳນວນ 420 ຄົນ ຈາກໂຮງຮຽນ ມສ ສີທ່ານາໄຊ.
(ໂດຍ ສັກດາວົງ) ຈາກ: ເກາະຕິດນົກກົກຄຳເກມ