ໃນຕອນເຊົ້າຂອງວັນທີ 27 ມັງກອນ 2017 ຜ່ານມານີ້ ທີ່ສໍານັກງານນາຍົກລັດຖະມົນຕີ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບອໍາລາຂອງ ທ່ານ ກ່ວນ ຮົວ ປິ່ງ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປ ຈີນ ປະຈໍາລາວ ພ້ອມດ້ວຍຄະນະ ໃນໂອກາດສໍາເລັດການປະຕິບັດ ໜ້າທີ່ທາງການທູດຢູ່ ສປປ ລາວ.

ໃນໂອກາດນີ້ ທ່ານນາຍົກ ກໍ່ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ ທ່ານ ກ່ວນ ຮົວ ປິ່ງ ທີ່ເຮັດສໍາເລັດໜ້າທີ່ທາງການທູດຢູ່ ສປປ ລາວ ຕະຫຼອດໄລຍະ 3 ປີກວ່າທີ່ຜ່ານມາ, ອັນເປັນການປະກອບສ່ວນສໍາຄັນ ໃຫ້ແກ່ການຮັດແໜ້ນ ສາຍພົວພັນຮ່ວມມືທີ່ເປັນມູນເຊື້ອ ລະຫວ່າງ ສອງພັກ, ສອງລັດ ກໍ່ຄື ປະຊາຊົນຂອງສອງຊາດ ລາວ-ຈີນ ໃຫ້ນັບມື້ນັບສູງຂຶ້ນເລື້ອຍໆ, ເຊິ່ງຕະຫຼອດໄລຍະທີ່ຜ່ານມາ ການປະຕິບັດໜ້າທີ່ຂອງສະຖານທູດ ສປ ຈີນ ປະຈໍາລາວ ໄດ້ເຮັດໜ້າທີ່ເປັນຜູ້ປະສານງານ ແລະ ໄດ້ກາຍເປັນຂົວຕໍ່ທີ່ສໍາຄັນ ປະກອບສ່ວນເຂົ້າໃນການພົວພັນຮ່ວມມື ຂອງສອງປະເທດ ໂດຍສະເພາະແມ່ນ ການເຄື່ອນໄຫວຢ້ຽມຢາມ ການນໍາຂັ້ນສູງສຸດຂອງສອງປະເທດ, ການຊຸກຍູ້ຊ່ວຍເຫຼືອໃນດ້ານຕ່າງໆ ໂດຍສະເພາະ ການປະກອບສ່ວນ ທາງດ້ານວັດຖຸອຸປະກອນ, ທຶນຮອນ ອັນເຮັດໃຫ້ ສປປ ລາວ ເຮັດລ້ອນໜ້າທີ່ໃນການເປັນເຈົ້າພາບ ຈັດກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມປິ່ນອ້ອມຕ່າງໆ ທີ່ຜ່ານມາ.
ໂອກາດດຽວກັນນີ້, ທ່ານເອກອັກຄະລັດຖະທູດວິສາມັນ ຜູ້ມີອໍານາດເຕັມແຫ່ງ ສປ ຈີນ ປະຈໍາລາວ ກໍ່ໄດ້ສະແດງຄວາມຂອບອົກຂອບໃຈ ຕໍ່ທ່ານນາຍົກລັດຖະມົນຕີ ທີ່ໄດ້ໃຫ້ການຕ້ອນຮັບ ຢ່າງອົບອຸ່ນ ພ້ອມທັງ ຂໍຂອບໃຈມາຍັງພັກ-ລັດຖະບານ ກໍ່ຄື ປະຊາຊົນລາວ ທີ່ໄດ້ໃຫ້ການຮ່ວມມື, ຊຸກຍູ້, ຊ່ວຍເຫຼືອ ແລະ ອໍານວຍຄວາມສະດວກ ໃນດ້ານຕ່າງໆຕະຫຼອດມາ ພ້ອມທັງ ໃຫ້ຄໍາໝັ້ນສັນຍາວ່າ ຈະສືບຕໍ່ຊຸກຍູ້ ແລະ ປະກອບສ່ວນ ໃຫ້ການຮ່ວມມືຂອງສອງປະເທດ ນັບມື້ນັບໄດ້ຮັບການຂະຫຍາຍຕົວ ຢ່າງບໍ່ຢຸດຢັ້ງ.

ແຫຼ່ງຂ່າວ: ຫ້ອງວ່າການສໍານັກງານນາຍົກລັດຖະມົນຕີ, ກົມປະຊາສໍາພັນ.