​ໃນ​ວັນ​ທີ 9 ພະຈິກ​ນີ້ ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ​ ແຫ່ງ​ ສປປ ລາວ ພ້ອມ​ດ້ວຍ​ຄະນະ ​ໄດ້​ລົງ​ຊຸກຍູ້​ການ​ສຶກສາ​ຄົ້ນຄວ້າ ​ພັດທະນາ​ແນວ​ພັນ​ເຂົ້າ, ​ແນວ​ພັນ​ພືດ ​ແລະ ການນໍາ​ໃຊ້​ເຕັກນິກ​ວິຊາ​ການທີ່​ມີ​ປະສິດທິ​ຜົນ ​ເພື່ອ​​ຍົກສະມັດ​ຕະພາບ​ ການ​ຜະລິດ​ໃຫ້​ສູງ​ຂຶ້ນ ຢູ່ສູນ​ທົດ​ລອງແນວ​ພັນ​ພືດທີ່​ດີ ​ລາ​ວ-ຈີນ; ສະ​ຖາ​ບັນ​ຄົ້ນ​ຄວ້າກະ​ສີ​ກໍາ ​ແລະ ປ່າ​ໄມ້​ແຫ່ງ​ຊາດ ​ແລະ ສູນ​ຄົ້ນ​ຄ້ວາ​ກະ​ສິກໍາ​ນາ​ພອກ.

ນັກວິຊາການ​ປະຈຳສູນດັ່ງກ່າວ ໄດ້ໃຫ້​ຮູ້ວ່າ: ການ​​ນຳ​ໃຊ້​ແນວ​ພັນ​ເຂົ້າ​ພື້ນ​ເມືອງ​ລາວ​ ສາ​ມາດ​ຄັດ​ໄດ້ 12 ແນວ​ພັນ ມີເຂົ້າຫອມ​ນາງ​ນວນ, ​​ເຂົ້າໄກ່​ນ້ອຍ​ເຫລືອງ, ​ເຂົ້າຈ້າວ 5 ​ແນວ​ພັນ, ​ເຂົ້າ​ກ່ຳ​ໜຽວຫອມ 2 ​ແນວ​ພັນ, ​ເຂົ້າກ່ຳຈ້າວຫອມ ​2 ແນວ​ພັນ ແລະ ​ເຂົ້າກ່ຳຈ້າວ 1 ​ແນວ​ພັນ. ຄຽງ​ຄູ່​ກັນ​ນັ້ນ, ​​ຍັງ​ໄດ້​ຄົ້ນຄ້ວາພົບເຂົ້າພື້ນເມືອງ 10 ​ແນວ​ພັນ ທີ່​ທົນ​ທານ​ຕໍ່ພະຍາດໃບ​ໄໝ້​, ມີ 2 ​ແນວ​ພັນ​ ທົນ​ທານ​ຕໍ່​ແຫ້ງ​ແລ້ງ ແລະ ຄັດເລືອກເຂົ້າຈ້າວຫອມພື້ນເມືອງໄດ້ 3 ​ແນວ​ພັນ; ທັງ​ໝົດ​ແມ່ນ​ເປັນ​ທ່າ​ແຮງ​ນຳ​ໃຊ້ ​​ເຂົ້າໃນ​ການ​ປັບປຸງ​ ແນວ​ພັນ​​ເຂົ້າຂອງ​ລາວ​ເຮົາ. ສ່ວນ​ການຄົ້ນຄວ້າທົດລອງນັບ​ແຕ່ ປີ 1991-2016 ມີແນວພັນປັບປຸງອອກສູ່ການຜະລິດ 30 ແນວພັນ. ນອກ​ນັ້ນ, ​ກໍ​ສາມາດ​ເກັບ​ຕົວຢ່າງ​ເຂົ້າ (ນາ ແລະ ໄຮ່) ຄື: 14,238 ຕົວຢ່າງ, ສາລີ 55 ຕົວຢ່າງ, ມັນ​ຕົ້ນ 108 ຕົວຢ່າງ, ມັນ​ດ້າງ 22 ຕົວຢ່າງ, ຖົ່ວ 88ຕົວຢ່າງ, ເຂົ້າຝ້າງ, 280 ຕົວຢ່າງ, ອ້ອຍປ່າ ແລະ ເລົາ 87 ຕົວຢ່າງ.

ຂະນະ​ດຽວ​ກັນ, ກໍຜະລິດແນວພັນສາລີ ລູກປະສົມມາເຖິງປັດຈຸບັນ ໄດ້ 210 ກ່ວາໂຕນ ຜະລິດແນວພັນສາລີ ເຂົ້າໜຽວໄດ້ 11 ໂຕນ, ຜະລິດແນວພັນຖົ່ວເຫລືອງ, ຖົ່ວຂຽວ, ຖົ່ວດິນ ແລະ ຖົ່ວອື່ນໆ ໄດ້ຈໍານວນໜຶ່ງ. ຜະລິດແນວພັນ ມັນຕົ້ນຈຳນວນ 150,000 ທ່ອນ ຕອບສະໜອງ ໃຫ້ຊາວກະສິກອນ ເພື່ອຂະຫຍາຍພັນຕໍ່ໄປຢູ່ເຂດເມືອງແກ່ນທ້າວ, ເມືອງປາກລາຍ. ສ້າງແນວພັນສາລີ ລູກປະສົມໄດ້ 1 ແນວພັນ.ແນວພັນສາລີ ເຂົ້າໜຽວໄດ້ 1 ແນວພັນ. ແນວພັນຖົ່ວເຫລືອງ 1 ແນວພັນ (ກໍາລັງສາທິດ), ແນວພັນມັນຕົ້ນ 1 ແນວພັນ, ສົ່ງເສີມນໍາໃຊ້ ຢູ່ເຂດເມືອງແກ່ນທ້າວ ​ແລະ ​ເມືອງປາກລາຍ .

ແຫລ່ງຂ່າວ:

ຕິດຕາມເຮົາທາງFacebook ກົດຖືກໃຈເລີຍ!