ເພື່ອເປັນການແກ້ໄຂບັນຫາການສັນຈອນຕາມທ້ອງຖະໜົນໃນໄລຍະບຸນນະມັດສະການພະທາດຫຼວງ ທາງເຈົ້າໜ້າທີ່ກໍເຫັນເຖິງຄວາມສໍາຄັນໃນການໄປ-ມາຂອງພໍ່ແມ່ປະຊາຊົນ ໂດຍສະເພາະຊາວນະຄອນຫຼວງວຽງຈັນ ໂດຍໄດ້ຈັດວາງກໍາລັງລະບາຍລົດຕາມຈຸດຕ່າງໆ ໃນໄລຍະນີ້ 400 ສະຫາຍ.
ໃນວັນທີ 8 ພະຈິກຜ່ານມາ ພະແນກຕໍາຫຼວດຈະລາຈອນ ນະຄອນຫຼວງວຽງຈັນ ໄດ້ຈັດກອງປະຊຸມແຜນວາງກຳລັງຄຸມເຂັ້ມບຸນນະມັດສະການພະທາດຫຼວງ ໂດຍເຂົ້າຮ່ວມເປັນປະທານຂອງທ່ານ ພັນເອກ ຄຳຖະຫວາຍ ເພັດອຸໄທ ຫົວໜ້າກົມຕຳຫຼວດຈະລາຈອນ ພ້ອມດ້ວຍບັນດາອ້າຍນ້ອງພະນັກງານພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດນີ້ ທ່ານ ພັນໂທ ຢຸດຕະພົງ ສຸວັນນະສິງ ກໍໄດ້ລາຍງານແຜນການເຄື່ອນໄຫວການຄຸມເຂັ້ມນະມັດສະການພະທາດຫຼວງວ່າ: ເພື່ອເປັນການຮັບປະກັນຄວາມສະຫງົບ, ຄວາມປອດໄພຮອບດ້ານໃຫ້ແກ່ການນຳພັກ-ລັດ ແລະມວນຊົນນັກທ່ອງທ່ຽວພາຍໃນ ແລະຕ່າງປະເທດທີ່ມາທ່ຽວຫຼິ້ນບຸນປະເພນີບ້ານເຮົາມີຄວາມບີກບານມ່ວນຊື່ນທີ່ເຕັມໄປດ້ວຍຄວາມສະຫງົບປອດໄພທາງດ້ານຊີວິດ ແລະຊັບສິນ ແລະການສັນຈອນມີຄວາມສະດວກ ແລະຄອງຄົວທາງເຈົ້າໜ້າທີ່ຕໍາຫຼວດຈະລາຈອນນະຄອນຫຼວງວຽງຈັນ ຈິ່ງສ້າງແຜນການປ້ອງກັນໂດຍໃຊ້ກຳລັງທັງໝົດ 400 ສະຫາຍ ໃນນີ້ປະກອບຢູ່ 8 ຕົວເມືອງ.
ສໍາລັບຈັດເສັ້ນທາງໃນໄລຍະບຸນລົດຂົນສົ່ງມວນຊົນ, ຕຸກໆ, ຈຳໂບ້ລົດຂົນສົ່ງໂດຍສານອະນຸຍາດໃຫ້ຈອດຊົ່ວຄາວ ເພື່ອສົ່ງຄົນໂດຍສານລົງຕາມຈຸດທີ່ກໍານົດໄວ້ເຊັ່ນ: ເສັ້ນທາງຊ້າງເຜືອກເຂດບ້ານຮ່ອງໄກ່ແກ້ວ, ຕະຫຼາດທາດຫຼວງສີສັງວອນ-ໂພນໄຊ, ປະຕູໄຊ, ໂພນສະອາດ ແລະຮ່ອມໂຮງຮຽນມັດທະຍົມໜອງສ້າງທໍ່, ສະເພາະລົດຍົນ, ລົດຈັກສາມລໍ້ທີ່ມີຈຸດປະສົງໄປທ່ຽວງານບຸນ ແມ່ນໃຫ້ຈອດຕາມສະຖານທີ່ຈອດລົດທີ່ທາງຄະນະກຳມະການຈັດວາງໄວ້.