ໃນວັນທີ 2-3 ພະຈິກ 2016 ກົມສົນທິສັນຍາ ແລະກົດໝາຍ, ກະຊວງການຕ່າງປະເທດ ໄດ້ຈັດກອງປະຊຸມທາບທາມ ເພື່ອລະດົມຄວາມຄິດເຫັນໃສ່ຮ່າງກົດໝາຍວ່າດ້ວຍສົນທິສັນຍາ ແລະສັນຍາສາກົນຂຶ້ນທີ່ຫ້ອງວ່າການແຂວງບໍ່ແກ້ວ. ພາຍໃຕ້ການເປັນປະທານຂອງ ທ່ານນາງ ຄຳເພົາ ເອີນທະວັນ ຮອງລັດຖະມົນຕີກະຊວງການຕ່າງປະເທດ, ກອງປະຊຸມຄັ້ງນີ້ໃຫ້ກຽດເຂົ້າຮ່ວມ: ຫ້ອງວ່າການປົກຄອງ, ພະແນກການຕ່າງປະເທດແຂວງ ແລະພະແນກການຕ່າງໆທີ່ກ່ຽວຂ້ອງຈາກ 8 ແຂວງພາກເໜືອລວມມີ: ແຂວງບໍ່ແກ້ວ, ໄຊຍະບູລີ, ຊຽງຂວາງ, ຜົ້ງສາລີ, ຫົວພັນ, ຫຼວງນ້ຳທາ, ຫຼວງພະບາງ ແລະແຂວງອຸດົມໄຊ.
ທ່ານຮອງລັດຖະມົນຕີກະຊວງການຕ່າງປະເທດໄດ້ກ່າວວ່າ: ຈັດກອງປະຊຸມໃນຄັ້ງນີ້ແມ່ນເພື່ອນຳເອົາຮ່າງກົດໝາຍວ່າດ້ວຍສົນທິສັນຍາ ແລະສັນຍາສາກົນທີ່ໄດ້ຮ່າງສຳເລັດໃນເບື້ອງຕົ້ນມາທາບທາມ, ແລກປ່ຽນຄຳຄິດເຫັນກັບບັນດາທ່ານ ຊຶ່ງເປັນຕົວແທນ ຂອງອຳນາດການປົກຄອງ 8 ແຂວງພາກເໜືອ ພາຍຫຼັງການທາບທາມ ແລະແລກປ່ຽນຄຳຄິດເຫັນຄັ້ງນີ້ ແມ່ນຈະລົງໄປທາບທາມ ແລະແລກປ່ຽນຄໍາຄິດຄໍາເຫັນກັບອຳນາດການປົກຄອງບັນດາແຂວງພາກກາງ ແລະພາກໃຕ້ຕື່ມອີກແລ້ວຈິ່ງສັງລວມຄຳຄິດຄຳເຫັນເຫຼົ່ານັ້ນເພື່ອນຳໄປປັບປຸງຮ່າງກົດໝາຍສະບັບນີ້ໃຫ້ແທດເໝາະກັບຕົວຈິງ, ສົມບູນຍິ່ງຂຶ້ນ ແລະສາມາດປະຕິບັດໄດ້.
ຮ່າງກົດໝາຍສະບັບນີ້ຈະເປັນກົດໝາຍສະບັບທໍາອິດຂອງກະຊວງການຕ່າງປະເທດ, ກໍານົດຫຼັກການ, ລະບຽບການ ແລະຂັ້ນຕອນກ່ຽວກັບການສ້າງ ແລະການຈັດຕັ້ງປະຕິບັດສົນທິສັນຍາທີ່ສ້າງຂຶ້ນໃນນາມລັດ ແລະລັດຖະບານ, ສັນຍາສາກົນທີ່ສ້າງຂຶ້ນໃນນາມອົງການລັດຂັ້ນສູນກາງ, ຂະແໜງການ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະອົງການປົກຄອງທ້ອງຖິ່ນ ເພື່ອຄຸ້ມຄອງລັດກ່ຽວກັບວຽກງານສົນທິສັນຍາ ແລະສັນຍາສາກົນໃຫ້ມີຄວາມເປັນເອກະພາບກັນໃນຂອບເຂດທົ່ວປະເທດ ແນໃສ່ປະຕິບັດນະໂຍບາຍການຕ່າງປະເທດສັນຕິພາບ, ເອກະລາດ, ມິດຕະພາບ ແລະການຮ່ວມມືຕ່າງຝ່າຍຕ່າງມີຜົນປະໂຫຍດ, ສົ່ງເສີມຄວາມເປັນເຈົ້າການຂອງ ສປປ ລາວ ໃນການຮ່ວມມືກັບບັນດາປະເທດ ແລະເຊື່ອມໂຍງກັບພາກພື້ນ ແລະສາກົນ.
ການສ້າງກົດໝາຍວ່າດ້ວຍສົນທິສັນຍາ ແລະສັນຍາສາກົນກໍຄືນິຕິກໍາອື່ນໆ ໃນຂະແໜງການຕ່າງປະເທດເປັນກົດໝາຍທີ່ຈະອອກ ໂດຍສະພາແຫ່ງຊາດປະກອບສ່ວນອັນສຳຄັນເຂົ້າໃນການປະຕິບັດມະຕິ X ຂອງພັກໃນການສ້າງຄວາມໝັ້ນຄົງໃຫ້ແກ່ລັດປະຊາທິປະໄຕ.
ຂ່າວ: ເສດຖະກິດສັງຄົມ