ອີງຕາມການລາຍການຂອງສຳນັກຂ່າວຕ່າງປະເທດລາຍງານເມື່ອວັນທີ 3​ ພະຈິກຜ່ານມາວ່າ ຢູ່ຈັງຫວັດຄາລິງກ້າ ປະເທດຟີລິບປິນ ມີຊ່າງສັກລາຍທີ່ເກົ່າແກ່ທີ່ສຸດໃນໂລກຄົນໜຶ່ງ ທີ່ໄດ້ສືບສານການສັກລາຍບູຮານ ດ້ວຍຄ້ອນໜາມ, ລາວມີຊື່ວ່າ “Whang-od” ອາຍຸ 97 ປີ ບໍ່ເຄີຍໄດ້ແຕ່ງງານ, ລາວໄດ້ຮຽນສັກແບບບູຮານ ຕອນອາຍຸໄດ້ 10 ປີ ລາວໄດ້ສັກລາຍໃຫ້ປະຊາຊົນພາຍໃນບ້ານມາແຕ່ນັ້ນມາ ຈົນຮອດປັດຈຸບັນ

ໂດຍວິທີການສັກຂອງລາວນັ້ນ ແມ່ນມີຄວາມເຈັບປວດກວ່າ ການສັກໃນແບບປັດຈຸບັນຮອດ 20 ເທື່ອ, ໃຊ້ຖ່ານ ແລະນໍ້າເພື່ອເປັນນໍ້າເມິກ, ຈາກນັ້ນໄດ້ໃຊ້ຄ້ອນ ແລະໜາມທີ່ແຫຼມຄົມ ແທງລົງໄປເທິງຜິວໜັງ ເຊິ່ງໃນແຕ່ລະປີຈະມີນັກທ່ອງທ່ຽວຫຼາຍຮ້ອຍຄົນ ໄດ້ເຂົ້າໄປທ່ອງທ່ຽວໃນໝູ່ບ້ານທີ່ຫ່າງໄກສອກຫຼີກນີ້ ເພື່ອສຳຜັດກັບສິລະປະການສັກລາຍແບບບູຮານຂອງລາວ