ຂປລ. ປັດຈຸບັນການພົວພັນຮ່ວມມືທາງດ້ານການຄ້າ-ການລົງທຶນ ລະຫວ່າງ ສອງປະເທດ ລາວ-ໄທ ເວົ້າສະເພາະ ແຂວງບໍ່ແກ້ວ ແລະ ແຂວງຊຽງຮາຍ ກໍຄືເມືອງຊຽງຂອງ, ຊຽງແສນ ແລະ ເມືອງແມ່ສາຍ ແຫ່ງ ຣາຊະອານາຈັກໄທ ມີມູນຄ່າການຄ້າຊາຍແດນບັນລຸ 200 ກວ່າລ້ານໂດລາສະຫະລັດ.
ເມື່ອບໍ່ດົນມານີ້, ຢູ່ແຂວງບໍ່ແກ້ວ ໄດ້ມີພິທີເຊັນບົດບັນທຶກຄວາມເຂົ້າໃຈ ກ່ຽວກັບການຮ່ວມມືຊອກຫາຊ່ອງທາງ ເພື່ອພັດທະນາທາງດ້ານເສດຖະກິດ ແລະ ສ້າງເຄືອຂ່າຍຄູ່ຮ່ວມທາງທຸລະກິດ ໃນສາຂາການຄ້າ, ການລົງທຶນ, ການທ່ອງທ່ຽວໂລຈິສຕິກສ, ການພັດທະນາສິນຄ້າໂອດອບ-ໂອທອບ, ການພັດທະນາຊັບພະຍາກອນມະນຸດ ແລະ ອື່ນໆ ໂດຍການລົງນາມລະຫວ່າງ ທ່ານ ສີສຸພັນ ສິລິວົງ ປະທານສະພາການຄ້າ-ອຸດສາຫະກຳ ແຂວງບໍ່ແກ້ວ ກັບທ່ານ ອະນຸລັດ ອິນທອນ ປະທານຫໍການຄ້າ ແຂວງຊຽງຮາຍ ໂດຍມີພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ທ່ານ ສີສຸພັນ ສິລິວົງ ປະທານສະພາການຄ້າ-ອຸດສາຫະກຳ ແຂວງບໍ່ແກ້ວ ກ່າວວ່າ: ໃນການເຊັນບົດບັນທຶກດັ່ງກ່າວ, ເພື່ອເປັນກົນໄກສ້າງຄວາມຮ່ວມມືທາງເສດຖະກິດ ໃນລັກສະນະທີ່ໃກ້ຊິດ ແລະ ສ້າງເຄືອຂ່າຍທາງທຸລະກິດ, ເປັນການຊຸກຍູ້ ແລະ ຂະຫຍາຍຄວາມສຳພັນລະຫວ່າງ ລາວ-ໄທ ໃນດ້ານເສດຖະກິດການຄ້າ, ການລົງທຶນ, ການບໍລິການໃຫ້ແໜ້ນແຟ້ນຍິ່ງຂຶ້ນ. ປັດຈຸບັນເສດຖະກິດຂອງແຂວງບໍ່ແກ້ວ ພວມຂະຫຍາຍຕົວຢ່າງຕໍ່ເນື່ອງ ສະເລ່ຍ 9,7% ຕໍ່ປີ, ລາຍຮັບຕໍ່ຫົວຄົນ ບັນລຸໄດ້ 1.475 ໂດລາສະຫະລັດຕໍ່ຄົນຕໍ່ປີ, ໂຄງປະກອບເສດຖະກິດ ໄດ້ຜັນປ່ຽນຈາກ ຂະແໜງກະສິກຳປ່າໄມ້ ໄປສູ່ຂະແໜງອຸດສາຫະກຳ ແລະ ບໍລິການຫລາຍຂຶ້ນ ເປັນຕົ້ນຂະແໜງກະສິກຳ ແລະ ປ່າໄມ້ ເພີ່ມຂຶ້ນ 7,5% ກວມ 40,9% ຂອງ GDP, ຂະແໜງອຸດສາຫະກຳ ເພີ່ມຂຶ້ນ 8,7% ກວມ 21,1% ຂອງ GDP ແລະ ການບໍລິການເພີ່ມຂຶ້ນ 14,5% ກວມ 37,9% ຂອງ GDP ແລະ ອື່ນໆ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!