ຂປລ. ທ່ານ ສະຕີບເວັນ ໂຈໂບ້ ລັດຖະມົນຕີກະຊວງການຄ້າ, ທ່ອງທ່ຽວ ແລະ ການລົງທຶນ ຂອງອົດສະຕາລີ ໄດ້ປະກາດໃຫ້ທຶນຊ່ວຍເຫລືອ ໃນການປັບປຸງສະພາບແວດລ້ອມ ໃນການດຳເນີນທຸລະກິດ, ມູນຄ່າ 4,1 ລ້ານໂດລາ ສະຫະລັດ ຫລື ເກືອບ 25 ຕື້ກີບ. ເຊິ່ງການປະກາດດັ່ງກ່າວ, ໄດ້ມີຂຶ້ນ ໃນງານລ້ຽງພົບປະນັກທຸລະກິດຊັ້ນນຳ ທັງພາຍໃນ ແລະ ຕ່າງປະເທດ ວັນທີ 4 ສິງຫາ 2016 ທີ່ນະຄອນຫລວງວຽງຈັນ, ພ້ອມລະບຸວ່າ: ກອງທຶນຂອງລັດຖະບານອົດສະຕາລີ ຈະເຮັດໃຫ້ ສປປ ລາວ ສາມາດເປີດປະຕູຂະແໜງການສຳຄັນ ດ້ານເສດຖະກິດໃຫ້ກວ້າງອອກ, ຫລຸດຜ່ອນມາດຕະການດ້ານພາສີ, ປັບປຸງຂະບວນການຈົດທະບຽນທຸລະກິດ ແລະ ສ້າງຄວາມເຂັ້ມແຂງ ໃນການເຈລະຈາ ຂອງພາກເອກະຊົນກັບພາກລັດ ລວມໄປເຖິງການເປີດເວທີພົບປະ ບັນດານັກທຸລະກິດຂອງລາວ ໃຫ້ມີບັນຍາກາດຫລາຍຂຶ້ນຕື່ມ.
ທ່ານ ໂຈໂບ້ ເນັ້ນຕື່ມວ່າ: ອົດສະຕາລີ ແລະ ສປປ ລາວ ໄດ້ເຮັດວຽກຮ່ວມກັນຢ່າງໃກ້ສິດ ດ້ານນະໂຍບາຍການຄ້າຕະຫລອດຫລາຍທົດສະວັດຜ່ານມາ. ແຕ່ຕະຫລາດພາຍໃນຂອງສອງປະເທດ ມີຂະໜາດນ້ອຍເກີນໄປ ທີ່ຈະປະຄອງການຂະຫຍາຍຕົວ ເຊິ່ງທັງສອງປະເທດ ຈຶ່ງຈຳເປັນຕ້ອງເຂົ້າເຖິງເງິນທຶນຂອງຄວາມຮັ່ງມີ, ຄູ່ຮ່ວມງານ, ລູກຄ້າ ແລະ ການບໍລິການ ທີ່ຢູ່ນອກຊາຍແດນ. ສ່ວນການປະຕິຮູບປັບປຸງດັ່ງກ່າວ, ຈະອຳນວຍຄວາມສະດວກ ໃຫ້ແກ່ບໍລິສັດທີ່ມີຄຸນນະພາບ ຈາກອົດສະຕາລີ ໃນການເຂົ້າມາລົງທຶນ, ການຄ້າ ແລະ ຂະຫຍາຍການ ດຳເນີນທຸລະກິດ ຂອງເຂົາເຈົ້າໃນ ສປປ ລາວ. ເມື່ອສະພາບແວດລ້ອມທາງທຸລະກິດ ໄດ້ຮັບການປັບປຸງ ມັນບໍ່ພຽງແຕ່ສົ່ງຜົນດີຕໍ່ ພາກທຸລະກິດເທົ່ານັ້ນ, ແຕ່ຍັງເປັນຜົນດີ ສຳລັບການພັດທະນາບຸກຄົນ ແລະ ປະເທດນຳອີກ.
ໄລຍະຜ່ານມາ ລັດຖະບານອົດສະຕາລີ ຍັງໄດ້ລົງທຶນໂດຍກົງ ເຂົ້າໃນການພັດທະນາຊັບພະຍາກອນມະນຸດ ໂດຍຜ່ານໂຄງການໃຫ້ທຶນການສຶກສາຢູ່ ສປປ ລາວ ທັງໝົດນີ້ ລ້ວນແຕ່ກ່ຽວຂ້ອງກັນ ເພື່ອການຂະຫຍາຍຕົວທາງດ້ານເສດຖະກິດ ແລະ ເພື່ອການພັດທະນາ. ປັດຈຸບັນ ທັງສອງປະເທດພວມເຮັດວຽກນຳກັນ ເພື່ອການເຊື່ອມໂຍງໃຫ້ມັນດີຂຶ້ນກວ່າເກົ່າ, ໃຫ້ມີຄວາມຈະເລີນຮຸ່ງເຮືອງ ໃນພາກພື້ນແມ່ນ້ຳຂອງ ແລະ ໃນອາຊຽນ ໃຫ້ຫລາຍຂຶ້ນ, ທັງມີບົດບາດທາງດ້ານການຄ້າ ທີ່ອີງຕາມລະບຽບການສາກົນທີ່ເປີດກວ້າງອອກ ແລະ ເຂັ້ມແຂງຂຶ້ນກວ່າເກົ່າ. ທັງໝົດນີ້ ແມ່ນການເພີ່ມໂອກາດ ສຳລັບການດຳເນີນທຸລະກິດຂອງສອງປະເທດ ອົດສະຕາລີ-ລາວ ລວມທັງທຸລະກິດ ຂະໜາດນ້ອຍ ແລະ ຂະໜາດກາງ ເພື່ອຊອກຊ່ອງຫວ່າງ ໃນລະບົບຕ່ອງໂສ້ອັນມີຄ່າຂອງໂລກ.
ແຫລ່ງຂ່າວ:
ຕິດຕາມຂ່າວເສດຖະກິດລາວ ກົດໄລຄ໌ເລີຍ!