ລັດຖະມົນຕີການທ່ອງທ່ຽວ ແລະ ຜູ້ວ່າການທະນາຄານຈາກ 4 ປະເທດ (ກຳປູເຈຍ, ລາວ, ມຽນມາ ແລະ ຫວຽດນາມ) ໄດ້ເຫັນດີ ທີ່ຈະເພີ່ມທະວີສົ່ງເສີມການທ່ອງທ່ຽວ ໃຫ້ກາຍເປັນຈຸດໝາຍປາຍທາງການທ່ອງທ່ຽວໜຶ່ງດຽວ ແລະ ເສີມຂະຫຍາຍການຮ່ວມມືໃນຂະແໜງການທະນາຄານໃຫ້ເຂົ້າສູ່ລວງເລິກ,ຊຶ່ງໄດ້ຮັບການຕົກລົງເຫັນດີ ໃນກອງປະຊຸມເຊື່ອມຕໍ່ການທ່ອງທ່ຽວ ແລະ ການຮ່ວມມືຂະແໜງການທະນາຄານທີ່ມີຈຸດໝາຍປາຍທາງໜຶ່ງດຽວລະຫວ່າງ 4 ປະເທດດັ່ງກ່າວ ເຊິ່ງຈັດຂຶ້ນໃນວັນທີ 31 ກໍລະກົດນີ້, ທີ່ສະຫະພາບມຽນມາ. ໂດຍເປັນກຽດເຂົ້າຮ່ວມຂອງ ທ່ານ U Henry Van Thioຮອງປະທານນາທິບໍດີ ສະຫະພາບມຽນມາ, ມີທ່ານຮອງນາຍົກລັດຖະມົນຕີຂອງກຳປູເຈຍ, ສປປ ລາວ ແລະ ສສ ຫວຽດນາມ, ລັດຖະມົນຕີການທ່ອງທ່ຽວ, ຜູ້ວ່າການທະນາຄານ ແລະ ເຈົ້າໜ້າທີ່ກ່ຽວຂ້ອງເຂົ້າຮ່ວມຫລາຍກວ່າ 800 ທ່ານ.

ໃນກອງປະຊຸມ ລັດຖະມົນຕີການທ່ອງທ່ຽວທັງ 4 ປະເທດ ກໍໄດ້ເນັ້ນເຖິງຄວາມສຳຄັນໃນການຮັດແໜ້ນການປະສານງານ, ການຮ່ວມມືໃນການພັດທະນາຜະລິດຕະພັນທ່ອງທ່ຽວ ໃຫ້ມີຄວາມຫລາກຫລາຍ, ການເຊື່ອມໂຍງກິດຈະກໍາທ່ອງທ່ຽວກັບພາກພື້ນ ແລະ ສາກົນ, ການສົ່ງເສີມການຕະຫລາດ, ການສົ່ງເສີມການລົງທຶນພາຍໃນຂະແໜງການທ່ອງທ່ຽວ, ການພັດທະນາບຸກຄະລາກອນ, ການອໍານວຍຄວາມສະດວກ ໃນການເດີນທາງໄປມາຫາສູ່ກັນ ລະຫວ່າງ 4 ປະເທດ ແລະ ການແບ່ງປັນນັກທ່ອງທ່ຽວສາກົນໃຫ້ກັນ ແລະ ກັນ.

ຂະນະດຽວກັນ, ຜູ້ວ່າການທະນາຄານແຫ່ງຊາດຂອງ  4 ປະເທດ ກໍເຫັນດີໃນການເພີ່ມທະວີການຮ່ວມມື ແລະ ການຮັດແໜ້ນການເຊື່ອມໂຍງໃນຂະແໜງການຂອງຕົນ ໃຫ້ເຂົ້າສູ່ລວງເລິກໂດຍສະ ເພາະການຮ່ວມມືທາງດ້ານການເງິນ, ດ້ານລະບຽບການ ແລະ ດ້ານວິຊາການ.

ໃນປີ 2015 ໄດ້ມີນັກທ່ອງທ່ຽວສາກົນ ເຂົ້າມາທ່ຽວໃນ 4 ປະເທດດັ່ງກ່າວຫລາຍກວ່າ 22 ລ້ານຄົນ,ເພີ່ມຂຶ້ນ 11,4% ເມື່ອທຽບກັບປີ 2014 ແລະ ຄາດວ່າໃນປີ 2016 ນີ້ ຈະມີນັກທ່ອງທ່ຽວເຂົ້າມາປະມານ 24 ລ້ານຄົນ ເນື່ອງຈາກວ່າ ໃນ 5 ເດືອນຕົ້ນປີ 2016 ມີນັກທ່ອງທ່ຽວເດີນທາງເຂົ້າມາທ່ອງທ່ຽວຫລາຍກວ່າ 11 ລ້ານຄົນ ແລະ ຄາດວ່າຈະມີນັກທ່ອງທ່ຽວເຂົ້າມາເຖິງ 28,5 ລ້ານຄົນໃນປີ 2018.