ຜູ້ຊາຍບາງຄົນມັກມີເລື່ອງເວົ້າຕົວະເມຍ ແຕ່ເມຍເອງກໍ່ມີບາງເລື່ອງທີ່ບອກຄວາມຈິງກັບຜົວບໍ່ໄດ້ເຊັ່ນດຽວກັນ. ເອີ!!! ຄືວ່າຄົງຈະບໍ່ມີໃຜໃນໂລກນີ້ທີ່ບໍ່ເຄີຍມີຄວາມລັບແມ່ນບໍ່? ແລະ ຢາກຮູ້ບໍ່ວ່າບັນດາເມຍທັງຫຼາຍນິຍົມມັກເວົ້າຕົວະຜົວສຸດທີ່ຮັກຫຼາຍທີ່ສຸດແມ່ນເລື່ອງໃດ ຢາກຮູ້?… ເຮົາມາອ່ານກັນເລີຍ
- ເລື່ອງເສື້ອຜ້າ, ເຄື່ອງສຳອາງ, ເຄື່ອງປະດັບ, ເກີບ ປະເພດນີ້ ສ່ວນຫຼາຍແມ່ຍິງມັກຈະຊື້ເຄື່ອງຂອງພວກນີ້ເປັນຊີວິດຈິດໃຈ ແລະ ມັກຈະປ່ຽນເຄື່ອງນຸ່ງໃໝ່ເປັນປະຈຳ ຖ້າງາມຖືກໃຈລາຄາແພງກໍ່ສູ້ ແຕ່ຖ້າຈະບອກຄວາມຈິງກັບຜູ້ເປັນຜົວກໍ່ຢ້ານຖືກຜົວຕຳນິ ສະນັ້ນຈິງມັກປົກປິດເລື່ອງລາຄາ ແລະ ຈຳນວນເຄື່ອງນຸ່ງທີ່ຊື້ຕົວຈິງໃນແຕ່ລະເດືອນ
- ນໍ້າໜັກຕົວຂອງແມ່ຍິງຄືສິ່ງທີ່ທ່ານຈະບໍ່ໄດ້ຮູ້ຄວາມຈິງແນ່ນອນ ສ່ວນຫຼາຍແມ່ຍິງຈະຮູ້ສຶກອາຍ ແລະ ຂາດຄວາມໝັ້ນໃຈທີ່ຈະບອກນໍ້າໜັກຕົວຈິງຂອງຕົວເອງໃຫ້ຄົນອື່ນຮູ້ ເຖິງຈະແມ່ນຜູ້ເປັນຜົວກໍ່ຕາມ
- ໄລຍະເວລາການແຕ່ງຕົວ ແມ່ຍິງບາງຄົນຈະໃຊ້ເວລາໃນການແຕ່ງຕົວດົນ ແຕ່ໃຜລະທີ່ຈະບອກວ່າຕົວເອງແຕ່ງຕົວດົນສໍ່າໃດແທ້ ເພາະຢ້ານອີກຝ່າຍໜຶ່ງລຳຄານ ຫຼື ທົນລໍຖ້າບໍ່ໄດ້
- ວັນຄົບຮອບວັນແຕ່ງງານ, ວັນເກີດ ຫຼື ວັນສຳຄັນຕ່າງໆ ບໍ່ມີຂອງຂວັນກໍ່ໄດ້: ເຖິງປາກຈະບອກວ່າບໍ່ຢາກໄດ້ ຫຼື ບໍ່ມີກໍ່ໄດ້ຂອງຂວັນ ແຕ່ໃນໃຈແນ່ນອນວ່າແອບລຸ້ນຢູ່ເລິກໆ ຖ້າຫາກບໍ່ໄດ້ຕາມທີ່ຄິດ ກໍ່ຄົງມີຄິດເລັກຄິດນ້ອຍແນ່ນອນ
- ນາງຍິນດີເວລາທີ່ທ່ານຂໍອອກໄປສັງສັນຊຸມແຊວກັບໝູ່ເພື່ອນ: ແມ່ຍິງສ່ວນຫຼາຍມັກຈະບອກວ່າໄປໂລດບໍ່ເປັນຫຍັງ ແຕ່ເມື່ອຜູ້ເປັນຜົວອອກເຮືອນໄປແລ້ວພັດຈະໂທນຳຕະຫລອດ ຍາມໃດກໍ່ມັກຈະຖາມວ່າ ປານໃດຊິມາ, ປານໃດຊິກັບ ດ້ວຍຄຳຖາມປະເພດນີ້ ນັ້ນສະແດງວ່ານາງບໍ່ຢາກໃຫ້ທ່ານໄປນັ້ນເອງ
- ເລື່ອງຂະໜາດຂອງອະໄວຍະວະເພດຊາຍຂອງຜົວ: ຂໍ້ນີ້ກໍ່ວົນມາທີ່ເລື່ອງ 18+ ແມ່ຍິງສ່ວນຫຼາຍຈະບໍ່ມີການເວົ້າ ຫຼື ວິຈານໃດໆກ່ຽວກັບຂະໜາດຊ້າງນ້ອຍຂອງຜູ້ເປັນຜົວ ເຖິງແມ່ນວ່າຈະຖືກໃຈນາງ ຫຼື ບໍ່ຖືກໃຈນາງກໍ່ຕາມ ເພາະແມ່ຍິງຈະຮັກຜູ້ເປັນຜົວດ້ວຍຫົວໃຈ ແລະ ອົງປະກອບຫຼາຍສິ່ງຫຼາຍຢ່າງນອກເໜືອຈາກຂະໜາດຊ້າງນ້ອຍຂອງຜົວ ສະນັ້ນ ຜູ້ເປັນຜົວກໍ່ວາງໃຈໄດ້ເລີຍສຳລັບເລື່ອງນີ້
- ຍັງບໍ່ທັນພ້ອມທີ່ຈະມີລູກ: ແມ່ຍິງບາງຄົນເຖິງວ່າຕົນເອງຈະຮູ້ສຶກວ່າຍັງບໍ່ທັນຢາກໄດ້ລູກ ຫຼື ຍັງບໍ່ທັນຢາກມີລູກ ແຕ່ດ້ວຍປັດໄຈຕ່າງໆເຊັ່ນ: ເຫັນຜົວຢາກໄດ້ລູກແຮງ ຫຼື ທາງຝ່າຍຜູ້ໃຫຍ່ຢາກໄດ້ຫຼານແລ້ວ ບາງຄັ້ງນາງກໍ່ຕ້ອງເກັບຄວາມຮູ້ສຶກເອົາໄວ້ ແລະ ຕ້ອງປະຕິບັດຕາມຄວາມຕ້ອງການຂອງຜູ້ເປັນຜົວ ແລະ ຂອງຜູ່ໃຫຍ່ ສະນັ້ນ ແມ່ຍິງບາງຄົນກໍ່ເລືອກທີ່ຈະເກັບໄວ້ໃນໃຈບໍ່ບອກຜົວອອກໄປດີກວ່າ.
- ມັກຊື້ເລກ, ມັກຫຼິ້ນໄພ້: ການພະນັນຈຳພວກນີ້ແມ່ຍິງສ່ວນຫຼາຍຈະບໍ່ກ້າເປີດເຜີຍໃຫ້ຜູ້ເປັນຜົວໄດ້ຮູ້ຈັກ ໂດຍສະເພາະຖ້າຫາກໃຜໄດ້ຜົວທີ່ບໍ່ມັກໃຫ້ເມຍໄປຫຍຸ້ງກ່ຽວກັບການພະນັນເລີຍ
- ມັກເບິ່ງດວງ: ເລື່ອງແບບນີ້ຜູ້ຊາຍສ່ວນຫຼາຍກໍ່ບໍ່ມັກ ເພາະຄິດວ່າມັນເປັນເລື່ອງງົມງວາຍ ແລະ ນີ້ກໍ່ເປັນອີກເລື່ອງໜຶ່ງທີ່ແມ່ຍິງບາງກຸ່ມຄົນບໍ່ກ້າເລົ່າສູ່ຜົວຟັງເມື່ອເວລາໄປເບິ່ງດວງມາ.