ນາຍົກລັດຖະມົນຕີຍີ່ປຸ່ນ​ເປີດ​ເຜີຍ​ກຽມ​ຈັດ​ສັນ​ງົບປະມານ 28 ພັນ​ຕື້​ໂດ​ລາ​ສະຫະລັດ​ຂອງ​ປະ​ເທດ ທີ່​ກຳລັງ​ປະສົບ​ບັນຫາ​ເງິນ​ເຢນ​ແຂງ​ຄ່າ ຊຶ່ງ​ເປັນ​ຜົນ​ຈາກ​ພາວະ ​ເບຣັກຊິດ.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ວ່າ: ທ່ານ ຊິນ​ໂຊ ອາ​ເບະ ນາຍົກ​ລັດຖະມົນຕີ​ຍີ່ປຸ່ນ ຖະ​ແຫຼ​ງ​ໃນ​ວັນ​ທີ 27 ກໍລະກົດ​ທີ່​ຜ່ານ​ມາ​ ລະຫວ່າງ​ລົງ​ພື້ນ​ທີ່​ເມືອງ​ຟຸກຸ​ໂອ​ກະ​ວ່າ ລັດຖະບານ​ກຽມ​ແຜນ​ງົບປະມານ​ເສີມ​ສະພາບ​ຄ່ອງ​ໃຫ້​ແກ່​ເສດຖະກິດ​ຂອງ​ຍີ່ປຸ່ນ​ມູນ​ຄ່າ 28 ພັນ​ຕື້​ເຢນ ​ໂດຍ​ຈຳນວນ​ນີ້ 13 ພັນ​ຕື້​ເຢນຈະ​ເປັນ​ມາດຕະຖານ​ການ​ຊ່ວຍ​ເຫຼືອ​ສຳລັບ​ພາກ​ລັດ ທີ່​ລວມ​ເຖິງ​ໂຄງການ​ປ່ອຍ​ສິນ​ເຊື່ອ​ໃຫ້​ແກ່​ພະນັກງານລັດ, ຢ່າງ​ໃດ​ກໍ​ຕາມ ທ່ານ ອາ​ເບະ ບໍ່​ເປີດ​ເຜີຍ​ເພີ່ມ​ຕື່ມ ຊຶ່ງ​ທ່ານຕ້ອງການ​ໃຫ້​ທີ່​ປະຊຸມ​ຄະນະ​ລັດຖະມົນຕີ​ອະນຸມັດ​ມາດ​ຕະການ​ດັ່ງກ່າວ​ຢ່າງ​ເປັນ​ທາງ​ການ​ກ່ອນ ຂະນະ​ທີ່​ທະນາຄານ​ກາງ​ຍີ່ປຸ່ນ (ບີ​ໂອ​ເຈ) ກຽມ​ປະກາດ​ມາດ​ຕະການ​ກະ​ຕຸ້ນ​ເສດຖະກິດ​ຂອງ​ຕົນ​ເອງ​ໃນ​ວັນ​ທີ 28 ກໍລະກົດ.

ທັງ​ນີ້ ​ເສດຖະກິດ​ຂອງ​ຍີ່ປຸ່ນ​ຊຶ່ງ​ມີ​ຂະໜາດ​ໃຫຍ່​ອັນ​ດັບ 3 ຂອງ​ໂລກ​ຮອງ​ຈາກ​ອາ​ເມ​ລິ​ກາ ​ແລະ ຈີນ ​ໄດ້​ຮັບ​ຜົນ​ກະທົບ​ຢ່າງ​ໜັກ​ຈາກ​ພາວະ​ເບຣັກ​ຊິດ ຫຼື​ການ​ກຽມ​ອອກ​ຈາກ​ສະຫະພາບ​ເອີຣົບ (ອີ​ຢູ) ຂອງ​ອັງກິດ ຊຶ່ງ​ສົ່ງ​ໃຫ້​ເງິນ​ເຢນ​ແຂງ​ຄ່າ​ຢ່າງ​ໜັກ​ຕໍ່າ​ກວ່າ 100 ​ເຢນຕໍ່ 1 ​ໂດ​ລາ​ເປັນ​ເທື່ອ​ທຳ​ອິດ​ໃນ​ຮອບ​ຫຼາຍ​ປີ ກ່ອນ​ປັບ​ຕົວ​ຂຶ້ນ​ມາ​ເລັກ​ໜ້ອຍ​ຫຼັງ​ສະຖານະ​ການ​ເລີ່​ມສະ​ຫງົບ.