ຖ້າເວົ້າເຖິງຜະລິດຕະພັນທີ່ເປັນເຄື່ອງດື່ມໃນຕະຫຼາດລາວໃນປັດຈຸບັນແມ່ນມີຫຼາກຫຼາຍຊະນິດທັງເປັນຜະລິດຕະພັນຂອງພາຍໃນ (ຍີ່ຫໍ້ຂອງລາວ) ແລະ ຜະລິດຕະພັນນຳເຂົ້າ (ຍີ່ຫໍ້ຕ່າງປະເທດ) ທີ່ມີການແຂ່ງຂັນດ້ານຕະຫຼາດກັນສູງ ແລະ ສັງເກດເຫັນວ່າຈະມີຜະລິດຕະພັນທີ່ເປັນເຄື່ອງດື່ມແມ່ນໄດ້ມີບໍລິສັດຕັ້ງໃໝ່ຜະລິດອອກມາຍີ່ຫໍ້ໃໝ່ຕະຫຼອດ ເພື່ອເປັນການຕອບສະໜອງໃນຄວາມຕ້ອງການຂອງຜູ້ບໍລິໂພກໃນມີຫຼາຍທາງເລືອກເຊິ່ງໄດ້ເຮັດໃຫ້ມີການແຂ່ງຂັນດ້ານການຕະຫຼາດກັນສູງພໍສົມຄວນ ໂດຍສະເພາະການໂຄສະນາໃນຮູບແບບຕ່າງໆນາ ເພື່ອດຶງດູດເອົາລູກຄ້າກໍ່ຄືຕະຫຼາດຜູ້ບໍລິໂພກ. ແຕ່ສິນຄ້າດັ່ງກ່າວຈະມີການຕອບຮັບດີ ຫຼື ບໍ່ນັ້ນແມ່ນຜູ້ບໍລິໂພກເປັນຜູ້ຕັດສິນ.
ບໍລິສັດ ລານທຽນ ຈຳກັດ ເປັນບໍລິສັດ ທີ່ຜະລິດນ້ຳດື່ມ ຍີ່ຫໍ້ ໄອເດຍລີ (ideally) ທີ່ຫຼາຍໆຄົນຄຸ້ນເຄີຍ ແລະ ຮູ້ຈັກກັນມາແຕ່ດົນເກືອບເຖິງ 10 ປີໂດຍມີຄຳຂວັນຂອງບໍລິສັດທີ່ວ່າ: “ຄວາມສຸກທີ່ສົດໃສກັບຜະລິຕະພັນ ໄອເດຍລີ” ເຊິ່ງເປັນນ້ຳດື່ມ ຍີ່ຫໍ້ດັ່ງກ່າວນີ້ເປັນນ້ຳດື່ມທີ່ສະອາດ, ຖືກຕ້ອງຕາມຫຼັກສຸຂະອະນາໄມ ແລະ ຜ່ານການຮັບຮອງຈາກກົມອາຫານ ແລະ ຢາ (ອຢ) ແລະ ມີຫຼາຍຂະໜາດໄວ້ຄອຍຕອບສະໜອງລູກຄ້າ, ເພື່ອເປັນການຮັບມື ແລະ ຫັນປ່ຽນກົນລະຍຸດດ້ານການຕະຫຼາດໃນຍຸກເຊື່ອມໂຍງນີ້ ປັດຈຸບັນບໍລິສັດໄດ້ຫັນມາຜະລິດເຄື່ອງດື່ມນ້ຳຫວານກິ່ນໝາກໄມ້ 5 ຊະນິດອີກຕື່ມ ເພື່ອຫວັງບຸກຕະຫຼາດເຄື່ອງດື່ມໃນ ສປປ ລາວ ໂດຍອີງໃສ່ທ່າແຮງທີ່ໄດ້ປຽບຄືເນັ້ນທີ່ລາຄາຖືກ ແລະ ຄຸນນະພາບດີ, ປັດຈຸບັນທາງບໍລິສັດກໍ່ໄດ້ມີການກະກຽມຂະຫຍາຍຕະຫຼາດຈຳໜ່າຍ, ເພີ່ມເຄື່ອງຈັກທີ່ນຳໃຊ້ໃນການຜະລິດຕຸກ ແລະ ຂະຫຍາຍຖານການຜະລິດເພີ່ມຂຶ້ນ ເພື່ອຕອບສະໜອງຄວາມຕ້ອງການຂອງຕະຫຼາດໃຫ້ວ່ອງໄວທັນໃຈກັບຄວາມຕ້ອງການຕະຫຼາດ.
ທ່ານ ສັນຕິໄຊ ສະນິດນາ ຜູ້ຈັດການທົ່ວໄປ ບໍລິສັດ ລານທຽນ ໃຫ້ສຳພາດວ່າ: ບໍລິສັດ ລານທຽນ ໄດ້ສ້າງຕັ້ງຂຶ້ນມາແຕ່ວັນທີ 1 ສິງຫາ ປີ 2007 ມາຮອດປັດຈຸບັນ 9 ປີກວ່າແລ້ວ, ເປັນການລົງທຶນຮ່ວມກັນລະຫວ່າງ ນັກທຸລະກິດລາວ ແລະ ນັກທຸລະກິດຈີນ ໃນຮູບແບບການລົງທຶນ ວິສາຫະກິດ (ໂດຍນັກທຸລະກິດ ລາວຖືຮຸ້ນ 30% ແລະ ນັກທຸລະກິດ ຈີນຖືຮຸ້ນ 70%) ໂດຍທຳອິດການສ້າງເປັນໂຮງງານນ້ຳດື່ມຊື່ວ່າ: ໄອເດຍລີ (ideally) ຕັ້ງຢູ່ບ້ານ ໄຜ່ລ້ອມ ເມືອງໄຊທານີ ນະຄອນຫຼວງວຽງຈັນ, ຖະໜົນປາກຊາບ. ພວກເຮົາຜະລິດນ້ຳດື່ມຈຳໜ່າຍສູ່ທ້ອງຕະຫຼາດໄປຢ່າງກວ້າງຂວາງ ເຊິ່ງປັດຈຸບັນກວມເອົາເກືອບທົ່ວທຸກແຂວງຂອງປະເທດເປັນເວລາມາເກືອບ 10 ປີແລ້ວ, ພວກເຮົາໄດ້ມີສາງເກັບສິນຄ້າຢູ່ທີ່ແຂວງຊຽງຂວາງອີກດ້ວຍ, ຜ່ານການຈຳໜ່າຍໃນໄລຍະຜ່ານມາກໍເຫັນວ່າ ນ້ຳດື່ມ ໄອເດຍລີ ໄດ້ຮັບການຮັບຈາກບັນດາລູກຄ້າໄດ້ດີພໍສົມຄວນ, ໂດຍສະເພາະແມ່ນລະດູຮ້ອນຄວາມຕ້ອງການຂອງຕະຫຼາດແມ່ນມີຈຳນວນເພີ່ມຂຶ້ນເກືອບເປັນເທົ່າຕົວ ໃນໄລຍະດັ່ງກ່າວພວກເຮົາກໍ່ໄດ້ເລັ່ງຜະລິດສິນຄ້າທັງກາງເວັນ ແລະ ກາງຄືນແຕ່ກໍຍັງບໍ່ພຽງພໍກັບຄວາມຕ້ອງການຂອງຜູ້ບໍລິໂພກໄດ້ດີ, ປັດຈຸບັນກຳລັງການຜະລິດນ້ຳດື່ມພວກເຮົາໃນມື້ໜຶ່ງແມ່ນສາມາດຜະລິດໄດ້ 1 ພັນແກັດເທົ່ານັ້ນ, ຢ່າງໃດກໍ່ຕາມບໍລິສັດພວກເຮົາມີແຜນຈະຂະຫຍາຍເຄື່ອງຈັກໃນການເພີ່ມກຳລັງການຜະລິດຂຶ້ນຕື່ມເພື່ອໃຫ້ທ່ວງທັນກັບຄວາມຕ້ອງການຂອງຕະຫຼາດ ແລະ ສິ່ງທີ່ເປັນຈຸດເດັ່ນຂອງຜະລິດຕະພັນນ້ຳດື່ມຂອງໂຮງງານເຮົາແມ່ນມີຫຼາຍຂະໜາດແຕກຕ່າງກັນເພື່ອຕອບສະໜອງ ແລະ ອຳນວຍຄວາມສະດວກໃຫ້ຜູ້ບໍລິໂພກໄດ້ທຸກຮູບແບບບໍ່ວ່າຈະເປັນຄອບຄົວໃຫຍ່, ໂຮງຈັກ, ໂຮງງານ, ຮ້ານຄ້າ ແລະ ຄົນທົ່ວໄປ ຄື: ຕຸກຂະໜາດ 20 ລິດ, 1.5 ລິດ, 500 ມລ, 350 ມລ, 250 ມລ ຕາມຄວາມຕ້ອງການຂອງຜູ້ບໍລິໂພກ.