ວັນທີ 8 ກໍລະກົດ 2016 ທີ່ຜ່ານມາ ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການເຖິງ ກະຊວງກະສິກຳແລະປ່າໄມ້ ແລະກະຊວງອຸດສາຫະກຳແລະການຄ້າ ເລື່ອງການສົ່ງອອກຜະລິດຕະພັນໄມ້ສຳເລັດຮູບ.
ແຈ້ງການລະບຸວ່າໃຫ້ກະຊວງກະສິກຳແລະປ່າໄມ້ ສົມທົບກັບກະຊວງອຸດສາຫະກຳແລະການຄ້າ ກວດກາຄືນລະຫັດຂອງໄມ້ຝານແລະໄມ້ປອກທີ່ຍັງຕົກຄ້າງຢູ່ຕາມໂຮງຈັກໂຮງງານ ເພືື່ອຂໍອະນຸມັດສົ່ງອອກ ແຕ່ຈະອະນຸຍາດໃຫ້ສົ່ງອອກສະເພາະທີ່ຕົກຄ້າງໃນໂຮງງານເທົ່ານັ້ນ. ສ່ວນຕໍ່ໜ້າໃຫ້ຫັນມາປຸງແຕ່ງເປັນຜະລິດຕະພັນພາຍໃນ. ພ້ອມທັງໃຫ້ກະຊວງອຸສາຫະກຳແລະການຄ້າ ກວດກາຄືນລະຫັດໄມ້ສຳເລັດຮູບໃຫ້ສອດຄ່ອງກັບຄຳສັ່ງເລກທີ 15/ນຍ ເພື່ອອຳນວຍຄວາມສະດວກໃຫ້ແກ່ໂຮງງານປຸງແຕ່ງໄມ້ທີ່ໄດ້ມາຕະຖານແລະຖືກຕ້ອງຕາມຄວາມຕ້ອງການຂອງຕະຫຼາດໄດ້ສົ່ງອອກ. ແລະໃຫ້ກວດກາແລະຂຶ້ນບັນຊີໄມ້ທ່ອນທີ່ຕົກຄ້າງຕາມສະໜາມລາຍງານແກ່ລັດຖະບານເພື່ອຄົ້ນຄວ້າປະມູນຂາຍຕາມຄວາມເໝາະສົມ.
ສ່ວນໄມ້ປູກແມ່ນໃຫ້ກະຊວງກະສິກຳແລະປ່າໄມ້ ສົມທົບກັບ ກະຊວງອຸດສາຫະກຳແລະການຄ້າ ຄົ້ນຄວ້າຄືນໃໝ່ ເຊິ່ງປັດຈຸບັນນີ້ຍັງບໍ່ອະນຸຍາດໃຫ້ສົ່ງອອກເດັດຂາດ.
ອ່ານຂ່າວອື່ນໆ ທີ່ໜ້າສົນໃຈທີ່ນີ້ :www.laopost.com