ເມື່ອຕອນເວລາ 14:00 ໂມງ ຂອງຕອນບ່າຍມື້ນີ້ ທີ່ສະຖາບັນວິຈິດສິນແຫ່ງຊາດໄດ້ມີ ການເປີດກອງປະຊຸມຖອກຖອນບົດຮຽນ “ການໃຫ້ທຶນນັກສຶກສາ” ຂອງຄະນະຮັບຜິດຊອບທຶນການສຶກສາຂອງບໍລິສັດເບຍລາວ ແລະຄະນະຮັບຜິດຊອບກອງທຶນການສຶກສາ ມະຫາວິທະຍາໄລແຫ່ງຊາດ ແລະສະຖາບັນວິຈິດສິນແຫ່ງຊາດ ປະຈຳສົກປີ 2015-2016 ຄັ້ງວັນທີ 24, ມິຖຸນາ, ປີ 2016 ເຊິ່ງໃຫ້ກຽດເຂົ້າຮ່ວມໂດຍທ່ານ ສີທົນ ດີມາກ ຮອງຜູ້ອຳນວຍການສະຖາບັນວິຈິດສິນແຫ່ງຊາດ, ທ່ານ ສົນທະນີ ຫລວງໄຊຊະນະ ຮອງປະທານກອງທຶນການສຶກສາມະຫາວິທະຍາໄລແຫ່ງຊາດ ແລະທ່ານບຸນກັນ ກຸນລະບຸດ ຜູ້ອຳນວຍການ ຝ່າຍປະຊາສຳພັນບໍລິສັດເບຍລາວ ພ້ອມດ້ວຍພະນັກງານຄູອາຈານ ທີ່ຮັບຜິດຊອບທຶນການສຶກສາຈາກບໍລິສັດເບຍລາວ ແລະນັກສຶກສາທີ່ໄດ້ຮັບທຶນການສຶກສາຈາກສອງສະຖາບັນດັ່ງກ່າວ ກໍໄດ້ເຂົ້າຮ່ວມຮັບຟັງການຢ່າງພ້ອມພຽງຮຽງໜ້າ.
ຈຸດປະສົງຂອງງານດັ່ງກ່າວ ເຊິ່ງເປັນການແລກປ່ຽນບົດຮຽນເຊິ່ງກັນແລະກັນ ລະຫວ່າງພາກສ່ວນຜູ້ໃຫ້ທຶນ ແລະຜູ້ໄດ້ທຶນ. ບໍລິສັດເບຍລາວ ແມ່ນບໍລິສັດໜຶ່ງທີ່ໃຫ້ການຊ່ວຍເຫລືອສັງຄົມຢ່າງຈິງຈັງ ແລະຫລວງຫລາຍມາຕະຫລອດ ນອກນັ້ນ ຍັງໄດ້ທີໂຄງການທຶນການສຶກສາ ທີ່ຊ່ວນເຫລືອນັກສຶກສາທີ່ທຸກຍາກ ແລະຮຽນດີ ແກ່ນັກສຶກສາສະຖາບັນວິຈິນສິນແຫ່ງຊາດ ແລະນັກສຶກສາມະຫາວິທະຍາໄລແຫ່ງຊາດ ມາເປັນເວລາ 6 ປີ. ສະນັ້ນ ເພື່ອເປັນການທົບທວນບັນດາຜົນງານ ແລະເພື່ອເຮັດໃຫ້ການຊ່ວຍເຫລືອໃຫ້ທຶນການສຶກສານີ້ ບັນລຸຕາມຈຸດປະສົງ, ຄາດໝາຍ ແລະມີຄຸນນະພາບດີຍີິ່ງໆຂຶ້ນ ຈຶ່ງໄດ້ມີກອງປະຊຸມຖອດຖອນບົດຮຽນການໃຫ້ທຶນແກ່ນັກສຶກສາ ຂອງຄະນະຮັບຜິດຊອບທຶນການສຶກສາຂອງບໍລິສັດເບຍລາວ ແລະຄະນະຮັບຜິດຊອບກອງທຶນການສຶກສາມະຫາວິທະຍາໄລແຫ່ງຊາດ ປະຈຳສົກສຶກສາ 2015-2016 ນີ້ຂຶ້ນ.
ສຸດທ້າຍຂອງງານ ມີການມອບຂອງຂວັນເຊິ່ງກັນແລະກັນ ລະຫວ່າງສອງສະຖາບັນ ແລະບໍລິສັດເບຍລາວ ກອງປະຊຸມໄດ້ປິດລົງຢ່າງເປັນຜົນສຳເລັດ.