ວັນທີ 17 ມິຖຸນາ ຜ່ານມາ ລັດວິສາຫະກິດນ້ຳປະປາ ນະຄອນຫຼວງວຽງຈັນ ໄດ້ຈັດພິມີວາງສິລາລືກ ໂຄງການກໍ່ສ້າງໂຮງງານຜະລິດນ້ຳປະປາ ແສນດິນໄລຍະ 1 ຂຶ້ນທີ່ບ້ານແສນດິນ ເມືອງນາ ຊາຍທອງ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ຄຳເຜີຍ ວົງສາຄຳຜຸຍ ຜູ້ອຳນວຍການລັດວິສາ ຫະກິດນ້ຳປະປານະຄອນຫຼວງວຽງຈັນ, ທ່ານ ສີຫຸນ ສິດທິລືໄຊ ຮອງເຈົ້າຄອງ ນະຄອນຫຼວງວຽງຈັນ, ທ່ານ ພຶດສະພາພົມມະສັກ ອຳນວຍການບໍລິສັດເອເຊຍ ລົງທຶນພັດທະນາ ແລະກໍ່ສ້າງ ຈຳກັດ ຜູ້ ດຽວ ພ້ອມດ້ວຍບັນດາເຈົ້າເມືອງ ແລະ ຫົວໜ້າກົມ, ຮອງກົມຈາກພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້ທ່ານ ຄຳເຜີຍ ວົງສາຄຳ ຜຸຍ ກ່າວວ່າ: ປະຈຸບັນ ລັດວິສາຫະກິດນ້ຳປະປານະຄອນຫຼວງ (ນວ) ມີໂຮງງານຜະລິດນ້ຳ 4 ແຫ່ງ, ມີກຳລັງການ ຜະລິດທັງໝົດ 280.000 ແມັດກ້ອນຕໍ່ມື້ ແຕ່ຄວາມຕ້ອງການຕົວຈິງ ຂອງປະຊາ ຊົນທີ່ອາໄສຢູ່ເຂດ ນວ ໂດຍສະເພາະການຊົມໃຊ້ນ້ຳຂອງປະຊາຊົນທີ່ນັບມື້ເພີ່ມຂຶ້ນເຫັນວ່າຍັງບໍ່ທັນພຽງພໍ ດັ່ງນັ້ນ ໂຄງການກໍ່ສ້າງໂຮງງານຜະລິດນ້ຳປະປາ ແສນດິນ ຈິ່ງເປັນໂຄງການໜຶ່ງທີ່ຈະຜະລິດ ແລະສະໜອງນ້ຳປະປາໃຫ້ແກ່ປະຊາຊົນຊາວເມືອງນາຊາຍທອງ, ສ່ວນການກໍ່ສ້າງແມ່ນມອບໃຫ້ບໍລິສັດເເອເຊຍລົງທຶນພັດທະນາ ແລະກໍ່ສ້າງ ຈຳກັດຜູ້ ດຽວລົງທຶນກ່ອນໃນຮູບແບບການດຳ ເນີນກິດຈະການສຳປະທານ (BOT) ຊຶ່ງໂຄງການກໍ່ສ້າງໂຮງງານນີ້ມີກຳລັງການຜະລິດໃນໄລຍະທີ 1 ແມ່ນ 24 ພັນແມັດກ້ອນຕໍ່ມື້, ພາຍຫຼັງສຳເລັດຈະຜະລິດ ແລະສະໜອງນ້ຳປະປາໃຫ້ແກ່ປະ ຊາຊົນຊາວເມືອງນາຊາຍທອງ ແລະ ເຊື່ອມຕໍ່ລະບົບທໍ່ເກົ່າໂຮງງານນ້ຳປະປາເກົ້າລ້ຽວຢູ່ບໍລິເວນອ່າງນ້ຳເມືອງນາຊາຍທອງເພື່ອສະໜອງນ້ຳໃຫ້ຕົວເມືອງ ເນື່ອງ ຈາກປະຈຸບັນ ລັດວິສາຫະກິດນ້ຳປະປາ ນວ ສາມາດສະໜອງນ້ຳໃຫ້ປະຊາຊົນໄດ້ພຽງ 8085% ແລະຕາມແຜນການ ເມື່ອຮອດປີ 2020 ຈະຕ້ອງໃຫ້ມີການບໍລິການນ້ຳໃຫ້ໄດ້ຢ່າງໜ້ອຍ 95%.
ໂອກາດດຽວກັນທ່ານ ພຶດສະພາ ພົມມະສັກ ກ່າວວ່າ: ບໍລິສັດຂອງພວກເຮົາສັນຍາວ່າຈະສ້າງ ແລະຜະລິດນ້ຳປະປາ ທີ່ດີ ໄດ້ຄຸນນະພາບສະໜອງເພື່ອໃຫ້ກັບ ປະຊົນ, ພ້ອມທັງ ຈະເລັ່ງດຳເນີນກໍ່ສ້າງ ໂຮງງານຜະລິດນ້ຳປະປາແຫ່ງນີ້ໃຫ້ສຳເລັດຕາມກຳນົດພາຍໃນ 16 ເດືອນ (ທ້າຍເດືອນກັນຍາ 2017 ຈະໃຫ້ເປີດ ສະໜອງນ້ຳໃຫ້ປະຊາຊົນຊົມໃຊ້), ໂດຍໂຄງການດັ່ງກ່າວມີມູນຄ່າການກໍ່ສ້າງ ທັງໝົດ 15 ລ້ານໂດລາ ຫຼື ປະມານ 120 ຕື້ກວ່າກີບ, ຊຶ່ງຜ່ານການຈັດຕັ້ງປະຕິບັດ ໃນໄລຍະຜ່ານມາ ເຫັນວ່າ ພວກເຮົາສາມາດປະຕິບັດສຳເລັດບາງໜ້າວຽກ ເປັນຕົ້ນ ວຽກປັບປຸງເສັ້ນທາງເຂົ້າຫາໂຄງ ການ, ປັບພື້ນທີ່, ອະນາໄມເຂດອ່າງພັກນ້ຳ ແລະສັ່ງຊື້ອຸປະກອນໃນການກໍ່ ສ້າງ, ບໍລິສັດພວກເຮົາໃຫ້ຄຳໝັ້ນສັນຍາ ວ່າຈະເລັ່ງສ້າງໂຄງການໃຫ້ສຳເລັດຕາມກຳນົດ ເພື່ອເປັນການສະໜອງນ້ຳທີ່ສະອາດໃຫ້ປະຊາຊົນເມືອງນາຊາຍທອງ, ເມືອງສີໂຄດ ແລະເມືອງຈັນທະບູລີ.
ທີ່ມາ: ນສພ ເສດຖະກິດ-ສັງຄົມ