ພະແນກແຜນການ-ການລົງທຶນ ແຂວງບໍລິຄຳໄຊສົມທົບກັບບໍລິສັດ SDC ທີ່ປຶກສາຈຳກັດ ເຊັນບົດບັນທຶກຄວາມ ເຂົ້າໃຈສຶກສາຄວາມເປັນໄປໄດ້ໃນການ ກໍ່ສ້າງເຂື່ອນໄຟຟ້ານ້ຳຕົກຂະໜາດນ້ອຍໃສ່ສາຍນ້ຳງອມຕອນເທິງເມືອງວຽງ ທອງແຂວງບໍລິຄຳໄຊ.
ພິທີລົງນາມດັ່ງກ່າວຈັດຂື້ນວັນທີ 6 ມິຖຸນາຜ່ານມາທີ່ພະແນກແຜນການ ແລະ ການລົງທຶນແຂວງຕາງໜ້າໃຫ້ແຂວງ ບໍລິຄຳໄຊເຊັນ ໂດຍທ່ານ ສົນທອງ ວີບຸນກວ້າງ ຮອງຫົວໜ້າພະແນກແຜນການ-ການລົງທຶນແຂວງ ແລະຕາງໜ້າບໍລິສັດເຊັນໂດຍທ່ານ ສຸລິຍາ ໄຊຍະວົງ ປະ ທານບໍລິສັດ SDC ທີ່ປຶກສາຈຳກັດ ໂດຍມີຫົວໜ້າພະແນກພະລັງງານ-ບໍ່ແຮ່ ແລະ ຮອງຫົວໜ້າພະແນກຊັບພະຍາກອນທຳມະຊາດ ແລະສີ່ງແວດລ້ອມແຂວງ ແລະ ທີ່ປຶກສາຂອງບໍລິສັດເຊັນຮ່ວມເປັນສັກຂີພະຍານ ໂດຍຊ້ອງໜ້າທ່ານ ກອງແກ້ວ ໄຊສົງຄາມ ເຈົ້າແຂວງໆບໍລິຄຳໄຊ ຫົວໜ້າພະແນກການທີ່ກ່ຽວຂ້ອງ, ພະນັກງານ, ວິຊາການທັງສອງຝ່າຍເຂົ້າຮ່ວມ.
ໂຄງການສຳຫຼວດສຶກສາຄວາມເປັນ ໄປໄດ້ໃນການພັດທະນາເຂື່ອນໄຟຟ້ານ້ຳຕົກຂະໜາດນ້ອຍສາຍນ້ຳດັ່ງກ່າວ ເປັນໂຄງການໜຶ່ງທີ່ນອນຢູ່ໃນທ່າແຮງຂອງແຂວງບໍລິຄຳໄຊ ເພື່ອຈັດຕັ້ງຜັນຂະຫຍາຍແຜນພັດທະ ນາເສດຖະກິດສັງຄົມໃຫ້ໄປຕາມທິດອຸດ ສາຫະກຳ ແລະທັນສະໄໝ, ເຮັດໃຫ້ໂຄງ ປະກອບເສດຖະກິດຄ່ອຍຫັນປ່ຽນຈາກຂົງເຂດກະສິກຳກວມອັດຕາສ່ວນຫຼາຍ ແລະເຂົ້າສູ່ຂົງເຂດອຸດສາຫະກຳ ແລະ ການບໍລິການເພີ່ມຂຶ້ນ.
ໂຄງການກໍ່ສ້າງເຂື່ອນໄຟຟ້ານ້ຳຕົກຂະໜາດນ້ອຍນ້ຳງອມຕອນເທິງເມືອງວຽງທອງ ແຂວງບໍລິຄຳໄຊ, ຄາດຄະເນຄວາມສາມາດໃນການຕິດຕັ້ງເຄື່ອງຈັກຜະລິດໄຟຟ້າໄດ້ປະມານ 15 ເມກາວັດ ໂດຍແມ່ນບໍລິສັດ SDC ທີ່ປຶກສາຈຳກັດ ເປັນຜູ້ລົງທືນໃນການລົງສຳຫຼວດເກັບ ກຳຂໍ້ມູນທາງດ້ານພູມີສາດ, ອຸທົກກະສາດ, ສັງຄົມ ແລະຄິດໄລ່ຜົນຕອບແທນ ທາງດ້ານເສດຖະກິດ ຖ້າມີຄວາມເປັນ ໄປໄດ້ບໍລິສັດດັ່ງກ່າວຈະສືບຕໍ່ລົງທຶນພັດທະນາໃນການກໍ່ສ້າງຕໍ່ໄປ ໂດຍໄລຍະໃນການຈັດຕັ້ງປະຕິບັດ (MOU) 18 ເດືອນ ສະນັ້ນເພື່ອໃຫ້ສອດຄ່ອງກັບກົດໝາຍວ່າດ້ວຍການສົ່ງເສີມການລົງທຶນ ແລະນິຕິກຳລະບຽບການຕ່າງໆທີ່ກ່ຽວຂ້ອງ ແລະເພື່ອເຮັດໃຫ້ການຈັດຕັ້ງປະຕິບັດໂຄງການຫັນສູ່ລະບຽບການນັ້ນຈິ່ງໄດ້ເຊັນສັນຍາໄວ້ເພື່ອເປັນຫຼັກຖານ.
ທີ່ມາ: 