ຝຣັ່ງເປີດສາກເທສະການບານເຕະຊີງແຊ໋ມແຫ່ງຊາດຢູໂຣບ ຫຼື ຢູໂຣ 2016 ດ້ວຍຄອນເສີດກາງແຈ້ງທີ່ບໍລິເວນຫໍໄອເຟລໃນນະຄອນຫຼວງປາຣີ ໃນຂະນະທີ່ປະທານາທິບໍດີຟຣອງຊົວ ໂອລລອງ ປະກາດໃຫ້ຄຳໝັ້ນວ່າ ການແຂ່ງຂັນບານເຕະທີ່ຝຣັ່ງເປັນເຈົ້າພາບໃນຄັ້ງນີ້ຈະດຳເນີນໄປແບບລຽນໄຫຼເຖິງຈະເກີດເຫດປະທ້ວງ.
ທາງການຝຣັ່ງໃຊ້ມາດຕະການຮັກສາຄວາາມປອດໄພຢ່າງເຂັ້ມງວດໃນລະຫວ່າງການສະແດງຄອນເສີດທ່າມກາງແຟນເພງປະມານ 80.000 ຄົນ ຊຶ່ງຖືເປັນການທົດສອບຄັ້ງສຳຄັນດ້ານການເບິ່ງແຍງຄວາມປອດໄພກ່ອນການແຂ່ງຂັນບານເຕະຢູໂຣ 2016 ຈະເລີ່ມຕົ້ນຂຶ້ນໃນມື້ນີ້ ໂດຍທີມຊາດຝຣັ່ງຈະລົງເຕະເປີດສະໜາມກັບໂຣມາເນຍ ທີ່ສະໜາມສະຕາດເດິຟຣອງ ໃນຂະນະທີ່ແຟນບານເລີ່ມເດີນທາງມາຍັງນະຄອນຫຼວງປາຣີ ການຢຸດງານປະທ້ວງຂອງພະນັກງານລົດໄຟໃນຝຣັ່ງຍັງຄົງດຳເນີນຕໍ່ໄປເປັນວັນທີ 9 ແລະຂີ້ເຫຍື້ອຈຳນວນຫຼາຍກໍຍັງບໍ່ມີການເກັບມ້ຽນ ແລະ ຖືກປະໄວ້ຕາມຖະໜົນ ໂດຍພະນັກງານລົດໄຟຂູ່ທີ່ຈະຢຸດງານບໍລິເວນລົດໄຟສາຍທີ່ໄປຍັງສະໜາມສະຕາດເດິຟຣອງໃນມື້ນີ້ ທາງດ້ານປະທານາທິບໍດີໂອລລອງກ່າວເຕືອນວ່າ ລັດຖະບານກຽມທີ່ຈະດຳເນີນມາດຕະຖານທີ່ຈຳເປັນໃນການອຳນວຍຄວາມສະດວກ ແລະ ໃຫ້ບໍລິການເດີນທາງແກ່ແຟນບານ ໂດຍຢືນຢັນວ່າຈະຕ້ອງມີການບໍລິການລົດສາທາລະນະໃຫ້ແກ່ຜູ້ຊົມບານເຕະ ໃນຂະນະດຽວກັນ ດ້ວຍຄວາມວິຕົກເລື່ອງການໂຈມຕີຈາກກຸ່ມກໍ່ການຮ້າຍ ທາງການຝຣັ່ງໄດ້ກຽມຕຳຫຼວດ ແລະ ເຈົ້າໜ້າທີ່ຮັກສາຄວາມປອດໄພ 90.000 ຄົນ ເພື່ອດູແລຄວາມປອດໄພຕະຫຼອດການແຂ່ງຂັນບານເຕະໃນຄັ້ງນີ້.
