ວັນທີ 8 ຜ່ານມາ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມສະຫຼຸບຖອດຖອນບົດຮຽນກ່ຽວກັບການຈັດຕັ້ງປະຕິບັດວຽກງານວາງສະແດງສິນຄ້າພາຍໃນ ແລະ ຕ່າງປະເທດຂຶ້ນຢູ່ກະຊວງດັ່ງກ່າວ ໂດຍພາຍໃຕ້ການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸຸດສາຫະກຳ ແລະ ການຄ້າ, ມີບັນດາຫົວໜ່ວຍທຸລະກິດ ແລະ ພາກສ່ວນທີ່ກ່ຽວຂ້ອງຕ່າງໆເຂົ້າຮ່ວມ.
ທ່ານ ນາງ ເຂັມມະນີ ພົນເສນາ ໄດ້ກ່າວວ່າ: ຈຸດປະສົງໃນການຈັດກອງປະຊຸມຄັ້ງນີ້ ກໍເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກໃຫ້ປາກົດຜົນເປັນຈິງ ແລະເພື່ອສະຫຼຸບຖອດຖອນບົດຮຽນກ່ຽວກັບການຈັດຕັ້ງປະຕິບັດວຽກງານວາງສະແດງສິນຄ້າພາຍໃນ ແລະຕ່າງປເທດ, ໃນໄລຍະຜ່ານມາ ແລະ ຕໍ່ໜ້າ, ເພື່ອໃຫ້ມີໃບໜ້າຕໍ່ວຽກງານເສດຖະກິດ-ສັງຄົມຂອງຊາດ ກໍຄືການກຳນົດນະໂຍບາຍຂອງລັດຖະບານໃນການເຊື່ອມໂຍງກັບສາກົນ, ເວົ້າລວມເວົ້າສະເພາະກະຊວງອຸດສາຫະກຳ ແລະ ການຄ້າກຳລັງຂຸ້ນຂ້ຽວກະກຽມກອງປະຊຸມອາຊຽນ ແລະ ເພື່ອກຽມຄວາມພ້ອມຮັບມືໃນການເປັນປະຊາຄົມເສດຖະກິດອາຊຽນ ແລະເປີດການຄ້າເສລີ, ໃນນັ້ນເຫັນວ່າ ຕໍ່ກັບບັນຫາດັ່ງກ່າວທາງພາກລັດຖະບານກໍຄືກະຊວງອຸດສາຫະກຳ ແລະການຄ້າ ແມ່ນຈະຕ້ອງໄດ້ສູ້ຊົນຍາດແຍ່ງການສະໜັບສະໜູນຈາກບັນດາປະເທດໃນພາກພື້ນ ແລະສາກົນ ເພື່ອສ້າງໂອກາດ, ເວທີ ແລະກິດຈະກຳຕ່າງໆ ເພື່ອຊ່ວຍໃຫ້ພາກທຸລະກິດໄດ້ໂຄສະນາໝາກຜົນຂອງການພັດທະນາເສດຖະກິດ-ສັງຄົມຂອງລາວ ແລະເພື່ອເປັນການດຶງດູດການຄ້າ, ການລົງທຶນ ແລະການທ່ອງທ່ຽວໃຫ້ຮັບມືນັບ ເຕີບໃຫຍ່ຢ່າງຕໍ່ເນື່ອງ.
ຢ່າງໃດກໍດີ ໄລຍະຜ່ານມາ ກະຊວງອຸດສາຫະກຳ ແລະ ການຄ້າ ໄດ້ກຳນົດນະໂຍບາຍຕ່າງໆເພື່ອເຮັດໃຫ້ການສົ່ງເສີມພາກທຸລະກິດມີຜົນງານຢ່າງເປັນຮູບປະທຳຄື ນະໂຍບາຍເພື່ອກະຕຸ້ນການຜະລິດເຂົ້າໃສ່ຜູ້ປະກອບການຂະໜາດ ໃຫຍ່, ຂະໜາດກາງ ແລະນ້ອຍ ເພື່ອສະໜອງກັບຄວາມຕ້ອງການຂອງຜູ້ຊົມໃຊ້ ພາຍໃນ ແລະສົ່ງອອກໄປຍັງຕ່າງປະ ເທດ, ພ້ອມດຽວກັນນັ້ນກໍໄດ້ເອົາໃຈໃສ່ຊຸກຍູ້ສົ່ງເສີມສິນຄ້າທີ່ເປັນທ່າແຮງຂອງ ລາວໄປສູ່ຕະຫຼາດເປົ້າໝາຍ ເພື່ອຊອກຫາຄູ່ຄ້າຍາວນານດ້ວຍຫຼາຍຮູບການ ແລະໃຫ້ສາມາດແຂ່ງຂັນກັບສິນຄ້າຂອງ ປະເທດອຶ່ນໆໃນຍຸກເຊື່ອມໂຍງ, ໃນນັ້ນ ເລີ່ມແຕ່ປີ 2000 ເປັນຕົ້ນມາ ເຫັນວ່າ ການສົ່ງເສີມການເຂົ້າຮ່ວມຕະຫຼາດດ້ວຍການຈັດງານ ແລະນຳພາທຸລະກິດທີ່ມີເງື່ອນໄຂໄປຮ່ວມງານວາງສະແດງສິນຄ້າທາງພາຍໃນ ແລະຕ່າງປະເທດທີ່ຢູ່ ໃນລະດັບພາກພື້ນ ແລະ ສາກົນ ຊຶ່ງເຫັນວ່າ ແຕ່ລະປີລັດຖະບານລາວກໍໄດ້ຊຸກຍູ້ ສົ່ງເສີມໃຫ້ຫົວໜ່ວຍທຸລະກິດຂອງລາວ ທີ່ມີທ່າແຮງໄດ້ເຂົ້າຮ່ວມ ເພື່ອເປັນການຊອກຫາໂອກາດໃນການນຳສະເໜີສິນຄ້າຂອງຕົນ, ຈັບຄູ່ທຸລະກິດ ແລະເປັນເວທີໃນການເຈລະຈາຊື້-ຂາຍສິນຄ້າຮ່ວມກັນ.
ທີ່ມາ: