ວັນທີ 31 ພຶດສະພາຜ່ານມາທີ່ນະຄອນຫຼວງວຽງຈັນສະຫະພັນກີລາຣັກບີ້ແຫ່ງຊາດລາວຈັດກິດຈະກຳທີ່ມີຊື່ວ່າ ”ກີລາຣັກບີ້ຈຳປາບານ” ຫຼື ກີລາຣັກບີ້ເດັກນ້ອຍ”
ເພື່ອສົ່ງເສີມເດັກນ້ອຍມາຫຼິ້ນກີລາຣັກບີ້ໃຫ້ຫຼາຍຂຶ້ນທັງເປັນການສ້າງຂະບວນການສະເຫຼີມສະຫຼອງວັນເດັກສາກົນ ແລະວັນປູກຕົ້ນໄມ້ແຫ່ງຊາດ ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງໃນປີ 2016 ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະມີຄວາມໝາຍຄວາມສຳຄັນ.
ໃຫ້ກຽດເຂົ້າຮ່ວມງານຄັ້ງນີ້ຂອງ ທ່ານ ວິລະຢຸດ ຣາທິກຸນ ປະທານສະຫະພັນກີລາຣັກບີ້ແຫ່ງຊາດລາວ ແລະທ່ານ ສົມສະໝຸກ ມີໄຊ ຮອງປະທານສະມາຄົມນັກຂ່າວແຫ່ງ ສປປ ລາວ ມີຜູ້ຕາງໜ້າບັນດາຜູ້ໃຫ້ການສະໜັບສະໜູນຄູອາຈານ, ນ້ອງນ້ອຍນັກກີລາ ແລະສື່ມວນຊົນເຂົ້າຮ່ວມ.
ທ່ານ ວິລະຢຸດ ຣາທິກຸນ ກ່າວວ່າ: ກິດຈະກຳໃນຄັ້ງນີ້ແມ່ນຈັດຂຶ້ນເພື່ອເປັນການສົ່ງເສີມນ້ອງໆນັກກີລາຣັກບີ້ ແລະເພື່ອເປັນການສ້າງຂະບວນການຕ້ອນຮັບວັນເດັກສາກົນ ແລະວັນປູກຕົ້ນໄມ້ແຫ່ງຊາດ (1 ມິຖຸນາ) ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງໃນປີ 2016 ໃຫ້ ມີບັນຍາກາດຟົດຟື້ນ, ເບີກບານມ່ວນຊື່ນ ແລະມີຄວາມໝາຍສຳຄັນດັ່ງນັ້ນທາງສະຫະພັນກີລາຣັກບີ້ແຫ່ງຊາດລາວຈິ່ງໄດ້ມີການຮ່ວມມືກັບ ບັນດາສະປອນເຊີຈັດກິດຈະກຳແບບນີ້ຂຶ້ນ ເພື່ອຕອບສະໜອງຄວາມຕ້ອງການ, ຄວາມມ່ວນຊື່ນ ແລະການມີສ່ວນຮ່ວມຂອງນ້ອງໆນັກຮຽນ ແລະນັກກີລາຫຼາຍໆສະຖານທີ່ໃຫ້ໄດ້ມີການພົບປະແລກປ່ຽນບົດຮຽນເຊິ່ງກັນ ແລະກັນຜ່ານໂຄງການຣັກບີ້ຈຳປາບານ.
ສຳລັບໂຄງການຫຼັກສູດຈຳປາບານແມ່ນໂຄງການທີ່ໄດ້ຜົນຮັບທີ່ດີຫຼາຍຢ່າງ ໂດຍສະເພາະແມ່ນແມ່ຍິງ ແລະເດັກນ້ອຍຜູ້ທີ່ຫຍຸ້ງວຽກຫຼາຍ ຫຼື ຖືກຫ້າມບໍ່ໃຫ້ຫຼິ້ນກີລາຣັກບີ້ນີ້ເນື່ອງຈາກຄິດວ່າເປັນກິດຈະກຳທີ່ໜັກເໝາະສຳລັບຜູ້ຊາຍແນວໃດກໍຕາມຜ່ານການນຳໃຊ້ກີລາຮູບແບບໃໝ່ ຂອງຣັກບີ້ພິສູດໃຫ້ເຫັນແລ້ວວ່າທຸກຄົນທຸກໄວແມ່ນສາມາດຫຼິ້ນໄດ້ເພາະບໍ່ສ່ຽງຕໍ່ອາການບາດເຈັບ ແລະບໍ່ມີການປະທະກັນແຕ່ຢ່າງໃດສຳລັບຫຼັກສູດຣັກບີ້ຈຳປາບານແມ່ນເປັນ ພຽງຫຼັກສູດການສົ່ງບານກັບ ແລະຫຼັກສູດການຫຼິ້ນກີລາຣັກບີ້ທີ່ມີເປົ້າໝາຍແນໃສ່ສ້າງຄວາມມ່ວນຊື່ນ ແລະການມີສ່ວນຮ່ວມໂດຍບໍ່ກ່ຽວຂ້ອງກັບພື້ນຖານທີ່ມາທັງຂະໜາດ, ເພດ ຫຼື ຄວາມສາມາດແຕ່ເປັນການພັດທະນາການສົ່ງບານ, ທັກສະຫຼົບຫຼີກ ແລະການດຶງຜ້າທີ່ຢູ່ແອວອອກຈາກຜູ້ທີ່ຄອບຄອງບານເທົ່ານັ້ນ
ທີ່ມາ: ເສດຖະກິດ-ສັງຄົມ