ຕອນເຊົ້າ 5 ໂມງ ຂອງວັນທີ 2 ມິຖຸນາ 2015 ຫຼັງຈາກວັນທີປູກຕົ້ນໄມ້ແຫ່ງຊາດພຽງ 5 ຊົ່ວໂມງ ລົດໂດຍສານຫວຽດປ້າຍລາວ ຄັນໜຶ່ງແລ່ນຈາກເມືອງທ່າແຂກ ໄປຕາມເສັ້ນທາງເລກທີ 12 ໃກ້ຈະເຖິງດ່ານ ນາເພົ້າ-ຈໍຫຼໍ ອອກສູ່ແຂວງກວາງບິງ ສສ ຫວຽດນາມ ພຽງ 15 ກິໂລແມັດ ໄດ້ເກີດລະເບີດຂຶ້ນຢ່າງແຮງເຮັດໃຫ້ມີຜູ້ເສຍຊີວິດທັນທີ 8 ຄົນ ແລະເສຍຊີວິດຢູ່ໂຮງໝໍ 1 ຄົນ ພ້ອມທັງມີຜູ້ບາດເຈັບ 5 ຄົນ ເຊິ່ງເປັນແຮງງານຊາວຫວຽດນາມ ເຫດການດັ່ງກ່າວຊ່າງເກີດຂຶ້ນພາຍຫຼັງທີ່ທ່ານ ນາຍົກອອກຄຳສັ່ງເລກທີ 15/ນຍ ທີ່ອອກໃນວັນທີ 13 ພຶດສະພາ 2016.
ຫາງສຽງທີ່ຟົດຟື້ນທີ່ສຸດບັນຫາໜຶ່ງ ໃນໄລຍະຫຼາຍປີທີ່ຜ່ານມານັ້ນ ແມ່ນການທີ່ລັດບໍ່ສາມາດຄວບຄຸມຫຼືຫັກຫ້າມການສົ່ງອອກໄມ້ທ່ອນໄປຍັງຕ່າງປະເທດ ເບິ່ງຄືວ່າຄຳສັ່ງຫ້າມທີ່ອອກມານັ້ນຄົນບໍ່ພ້ອມຜີບໍ່ພຽງເທວະດາບໍ່ສົນ ປະໃຫ້ກາຍເປັນບັນຫາຊ້ຳເຮື້ອທີ່ແກ້ບໍ່ຕົກມາເປັນເວລາຍາວນານຫຼາຍປີ.
ພາຍຫຼັງ ທ່ານ ປອ ທອງລຸນ ສີສຸລິດ ໄດ້ຮັບໜ້າທີ່ ນາຍົກລັດຖະມົນຕີ ທ່ານໄດ້ເລັ່ງແກ້ໄຂບັນຫາດັ່ງກ່າວຢ່າງຮີບດ່ວນ ໂດຍໄດ້ອອກຄຳສັ່ງເລກທີ 15/ນຍ ເມື່ອວັນທີ 13 ພຶດສະພາ 2016 ແມ່ນໃຫ້ຢຸດຕິການສົ່ງອອກໄມ້ທຸກປະເພດ ທີ່ບໍ່ແມ່ນຜະລິດຕະພັນໄມ້ສຳເລັດຮູບ ແລະ ເຄື່ອງປ່າຂອງດົງທີ່ບໍ່ຖືກຕ້ອງຕາມກົດໝາຍ ຜ່ານ ສປປ ລາວ ໄປຕ່າງປະເທດຢ່າງເດັດຂາດ. ແຕ່ກໍຍັງມີຂ່າວຄາວເລັດລອດ ຖືກຕີແພ່ຜ່ານສື່ສັງຄົມອອນລາຍວ່າ ຍັງມີການລັກລອບຂົນໄມ້ທ່ອນຢູ່ໃນບາງເຂດ. ສົ່ງຜົນໃຫ້ຫ້ອງວ່າການສຳນັກງານນາຍົກລັດຖະມົນຕີ ຕ້ອງອອກແຈ້ງການ ເລກທີ 769/ຫສນຍ, ລົງວັນທີ 01/06/2016 ເລື່ອງ: ການຜັນຂະຫຍາຍ ແລະ ການຈັດຕັ້ງປະຕິບັດຄຳສັ່ງ ເລກທີ 15/ນຍ, ລົງວັນທີ 13 ພຶດສະພາ 2016.
ແຕ່ບໍ່ພໍທໍ່ໃດຊົ່ວໂມງກໍເກີດເຫດບໍ່ຄາດຄິດຂຶ້ນ ເມື່ອລົດຂົນສົ່ງໂດຍສານຫວຽດນາມ ທີ່ເດິນທາງອອກຈາກເມືອງທ່າແຂກ ແຂວງຄຳມ່ວນ ໃນຕອນເຊົ້າມືດຂອງວັນທີ 2 ມິຖຸນາ 2016 ໄດ້ເກີດລະເບີດຂຶ້ນຢ່າງຮຸນແຮງໃນລະຫວ່າງການເດິນທາງ ໃກ້ກັບດ່ານ ນາເພົ້າ-ຈໍຫຼໍ ອອກສູ່ແຂວງກວາງບິ່ງ ສສຫວຽດນາມ ເຮັດໃຫ້ເປັນໂສກນາຕະກຳທີ່ມີຜູ້ເສຍຊີວິດທັນທີຈຳນວນ 8 ຄົນ, ບາດເຈັບຈຳນວນໜຶ່ງ ແລະພົບວ່າໃນລົດຄັນດັ່ງກ່າວ ເຕັມໄປດ້ວຍໄມ້ຕັບຈຳນວນຫຼວງຫຼາຍ.
ເຫດການດັ່ງກ່າວນັ້ນເປັນການທ້າທາຍຕໍ່ ການຈັດຕັ້ງປະຕິບັດຄຳສັ່ງ ເລກທີ 15/ນຍ, ລົງວັນທີ 13 ພຶດສະພາ 2016 ແລະແນ່ນອນວ່າເຫດການນີ້ຈະຖືກສືບສວນຫາຕົ້ນປາຍສາເຫດ ຫາຜູ້ຮັບຜິດຊອບຕໍ່ຊີວິດແລະຊັບສິນຂອງຜູ້ເດິນທາງ ເຊັ່ນ ແມ່ນໃຜເປັນເຈົ້າຂອງລົດ, ແມ່ນໃຜເປັນເຈົ້າຂອງໄມ້, ໄມ້ໄດ້ຮັບອະນຸຍາດເຄື່ອຍຍ້າຍຕາມກົດໝາຍຫຼືບໍ່, ມີເຈົ້າໜ້າທີ່ຮູ້ເຫັນເປັນໃຈຫຼືບໍ່ ແລະເຫດລະເບີດເກີດຂຶ້ນໄດ້ຈັ່ງໃດ? ຍັງເປັນວຽກໜັກທີ່ເຈົ້າໜ້າທີ່ກຳລັງດຳເນີນໄປຕາມຂັ້ນຕອນຂອງກົດໝາຍຢ່າງແນ່ນອນ.
