ເລື່ອງບັນຫາຄ່າໄຟຟ້າທີ່ແພງຂຶ້ນຜິດປົກກະຕິຖືວ່າເປັນບັນຫາເຄັ່ງຮ້ອນທີ່ສັງຄົມພາຍໃນປະເທດໃຫ້ຄວາມສົນໃຈ ແລະຕິດຕາມຢ່າງໃກ້ຊິດເຖິງແມ່ນວ່າຜ່ານມາທາງຝ່າຍປະຕິບັດການໄຟຟ້າ ນະຄອນຫຼວງວຽງຈັນ ແລະລັດວິສາຫະ ກິດໄຟຟ້າລາວ ຈະອອກມາຖະແຫຼງຂ່າວ ສະແດງຄວາມຮັບຜິດຊອບຕໍ່ຫາງສຽງ ຄ່າໄຟຟ້າແພງແລ້ວ ກໍຕາມແຕ່ບັນຫາດັ່ງ ກ່າວກໍຍັງເປັນທີ່ສົນໃຈຂອງສັງຄົມຢ່າງຕໍ່ເນື່ອງ ຈາກສະພາບແນວນັ້ນນາຍົກລັດ ຖະມົນຕີ ຈິ່ງໄດ້ອອກຄຳສັ່ງເຖິງກະຊວງ ພະລັງງານ ແລະບໍ່ແຮ່, ລັດວິສາຫະກິດ ໄຟຟ້າລາວໃຫ້ກວດກາຄືນພ້ອມຄົ້ນຄວ້າປັບປຸງຄືນໃໝ່ລາຄາໄຟຟ້າແລະແກ້ໄຂຄວາມເດືອດຮ້ອນຂອງຜູ້ຊົມ ໃຊ້ໄຟຟ້າຫາກບິນໃດບໍ່ຖືກຕ້ອງໃຫ້ສົ່ງ ເງິນຄືນ.
ຂະນະທີ່ພະນັກງານຜູ້ກະທຳຜິດໃຫ້ ກະຊວງຊີ້ນຳໄຟຟ້າສຶກສາອົບຮົມ ແລະປະຕິບັດວິໄນທັງປັບປຸງຊັບຊ້ອນໜ້າວຽກໃຫ້ສອດຄ່ອງກັບຄວາມຮັບຜິດຊອບ.
ວັນທີ 1 ມິຖຸນາ 2016 ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ອອກຄຳສັ່ງເຖິງທ່ານ ລັດຖະມົນ ຕີກະຊວງ ພະລັງງານ ແລະບໍ່ແຮ່, ຄະນະອຳນວຍການບໍລິສັດໄຟຟ້າລາວ ວ່າດ້ວຍການກວດກາຄືນລາຄາໄຟຟ້າ ແລະແກ້ໄຂ ຄວາມເດືອດຮ້ອນຂອງຜູ້ຊົມໃຊ້ໄຟຟ້າ ສະບັບເລກທີ 18/ນຍ ລົງວັນທີ 1 ມິຖຸນາ 2016 ເພື່ອເພີ່ມທະວີການກວດກາ ລາຄາ ແລະການຊົມໃຊ້ໄຟຟ້າໃຫ້ຖືກຕ້ອງ ສອດຄ່ອງກັບຕົວຈິງ, ໃຫ້ຄວາມຍຸຕິທຳແກ່ທຸກຝ່າຍ, ສະກັດກັ້ນປາກົດການຫຍໍ້ທໍ້ ແລະຄວາມຜິດພາດບໍ່ໃຫ້ເກີດຂຶ້ນໃນສັງຄົມ ພ້ອມທັງຍົກສູງຄວາມຮັບຜິດຊອບຂອງພະນັກງານໃນການປະຕິບັດໜ້າທີ່ຢູ່ຂົງເຂດການບໍລິການໄຟຟ້າໃຫ້ ສູງຂຶ້ນ.
ໂດຍເນື້ອໃນຄຳສັ່ງດັ່ງກ່າວລະບຸວ່າໃຫ້ກະຊວງພະລັງງານ ແລະບໍ່ແຮ່ ອະທິບາຍ ແລະຢັ້ງຢືນຄືນນະໂຍບາຍທີ່ຖືກຕ້ອງເປັນທຳຂອງລັດຖະບານກ່ຽວກັບການພັດທະນາພະລັງງານ ແລະການນຳໃຊ້ພະລັງງານເພື່ອຮັບໃຊ້ຊີວິດການເປັນຢູ່ຂອງປະຊາຊົນໃນໄລຍະຜ່ານມາ ແລະປະຈຸບັນເພື່ອໃຫ້ສັງຄົມໄດ້ຮັບຮູ້ ແລະເຂົ້າໃຈຢ່າງຖືກຕ້ອງ ພ້ອມທັງໃຫ້ກະຊວງພະລັງງານ ແລະບໍ່ແຮ່ສົມທົບກັບພາກສ່ວນທີ່ກ່ຽວຂ້ອງກວດກາຄືນມາດຕະຖານເຕັກນິກ ແລະຊອກຫາສາເຫດຕົວຈິງທີ່ພາໃຫ້ເກີດມີຄວາມຜິດພາດໃນການອອກໃບບິນໄຟຟ້າ ແລະຄົ້ນຄວ້າ ແກ້ໄຂບັນຫາດັ່ງກ່າວໃຫ້ໄວ, ບິນໄຟຟ້າໃດທີ່ບໍ່ຖືກຕ້ອງໃຫ້ແກ້ໄຂພ້ອມທັງສົ່ງເງິນຄືນ ຫຼື ຮັກສາໄວ້ຊຳລະຄ່າກະແສໄຟ ຟ້າໃຫ້ຜູ້ຊົມໃຊ້ໃນເດືອນຕໍ່ໄປ.
ພ້ອມດຽວກັນນີ້ໃຫ້ກະຊວງພະລັງງານ ແລະບໍ່ແຮ່ ຊີ້ນຳບໍລິສັດໄຟຟ້າລາວກວດກາຄືນການປະຕິບັດໜ້າທີ່ຂອງພະນັກງານທີ່ກ່ຽວຂ້ອງສຶກສາອົບຮົມ ແລະ ປະຕິບັດວິໄນຕໍ່ຜູ້ກະທຳຜິດຕາມລະບຽບກົດໝາຍ, ປັບປຸງຊັບຊ້ອນພະນັກງານໃຫ້ສອດຄ່ອງກັບໜ້າວຽກຄວາມຮັບຜິດຊອບເພື່ອສະກັດກັ້ນບໍ່ໃຫ້ປາກົດການຫຍໍ້ທໍ້ເກີດຂຶ້ນອີກ.
ທັງນີ້ ໃຫ້ບໍລິສັດໄຟຟ້າລາວຕັ້ງສູນຮັບຂໍ້ຂັດຂ້ອງ ແລະຂໍ້ຂ້ອງໃຈຂອງຜູ້ຊົມໃຊ້ໄຟຟ້າ ແລະລົງກວດກາແຕ່ລະກໍລະນີ ໃຫ້ລະອຽດດ້ວຍຄວາມຮັບຜິດຊອບສູງເພື່ອໃຫ້ຄວາມຍຸຕິທຳຕໍ່ຜູ້ຊົມໃຊ້ຢ່າງແທ້ຈິງນອກນັ້ນໃຫ້ກະຊວງພະລັງງານ ແລະບໍ່ແຮ່ຄົ້ນຄວ້າປັບປຸງລາຄາໄຟຟ້າຄືນໃໝ່ໃຫ້ສອດຄ່ອງກັບພື້ນຖານເສດຖະກິດ ແລະການພັດທະນາຕົວຈິງຂອງປະເທດສະເໜີໃຫ້ລັດຖະບານເພື່ອພິຈາລະນາ.
ສຳລັບການຄິດໄລ່ຄ່າກະແສໄຟຟ້າແມ່ນຕາມຂັ້ນໄດ 3 ຂັ້ນຄື: ໜຶ່ງລາຄາແຕ່ 0-25 ກິໂລວັດໂມງແມ່ນ 348 ກີບຕໍ່ກິໂລວັດໂມງ, ສອງແຕ່ 26-150 ກິໂລວັດ ໂມງ 414 ກີບຕໍ່ກິໂລວັດໂມງ ແລະຂັ້ນໄດທີສາມແຕ່ 151 ກິໂລວັດໂມງຂຶ້ນໄປແມ່ນ 999 ກີບຕໍ່ກິໂລວັດໂມງ.
ຊຶ່ງປະຈຸບັນປະເທດລາວມີເຂື່ອນໄຟຟ້າທັງໝົດ 46 ແຫ່ງ ມີກຳລັງຕິດຕັ້ງ 6.306 ເມກາວັດ ຊຶ່ງບໍລິສັດເອກະຊົນສົ່ງອອກໂດຍກົງ IPPo 4.410 ເມກາວັດ ແລະສົ່ງອອກພາຍໃນປະເທດ IPPd 1.267 ເມກາວັດ, ບໍລິສັດຜະລິດໄຟຟ້າມະຫາຊົນ 630 ເມກາວັດ, ເຂື່ອນຂະໜາດນ້ອຍ SPP 46,75 ເມກາວັດ ໂດຍກຳລັງດຳເນີນການກໍ່ສ້າງມີ 35 ແຫ່ງ ມີກຳ ລັງຕິດຕັ້ງທັງໝົດ 4.471 ເມກາວັດ ໂດຍປະເທດເຮົາມີທ່າແຮງສາມາດພັດທະນາໄຟຟ້າໄດ້ທັງໝົດ 26 ພັນເມກາວັດທັງນີ້ມາຮອດປະຈຸບັນ ຍັງມີຈຳນວນຜູ້ຊົມໃຊ້ໄຟຟ້າທົ່ວປະເທດທັງໝົດ 1,24 ລ້ານກວ່າໜ່ວຍ.