ໃນວັນທີ 25 ພຶດສະພາ 2016 ທີ່ນະຄອນຫລວງວຽງຈັນ, ກອງປະຊຸມລັດຖະບານສະໄໝສາມັນປະຈຳເດືອນພຶດສະພາໄດ້ປິດລົງດ້ວຍຜົນສຳເລັດ ເຊິ່ງ ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ແນະນຳໃຫ້ກະຊວງອຸດສາຫະກໍາ-ການຄ້າເອົາໃຈໃສ່ຄວບຄຸມລາຄາສິນຄ້າ ຕາມທ້ອງຕະຫລາດ ເພື່ອບໍ່ໃຫ້ມີການສວຍໂອກາດຂຶ້ນລາຄາ ສິນຄ້າອຸປະໂພກ-ບໍລິໂພກທີ່ນໍາເຂົ້າຈາກຕ່າງປະເທດຄວນມີສະຕິກເກີ ເພື່ອຫັນເຂົ້າສູ່ລະບຽບ ເຮັດໃຫ້ສາມາດຄຸ້ມຄອງ ແລະ ສ້າງລາຍຮັບເພີ່ມ ທ່າມກາງຄ່າຄອງຊີບຂອງພະນັກງານ-ລັດຖະກອນ, ທະຫານ ແລະ ຕຳຫລວດພົບວ່າລາຍຮັບຕົວຈິງຂອງເຂົາເຈົ້າຍັງບໍ່ສອດຄ່ອງລາຍຈ່າຍປະຈຳວັນ ເນື່ອງຈາກລາຄາສິນຄ້າຖີບຕົວສູງຂຶ້ນຢ່າງຕໍ່ເນື່ອງ.
ປັດຈຸບັນນີ້ເຫັນວ່າລາຄາສິນຄ້າໃນທ້ອງຕະຫລາດເພີ່ມທະວີສູງຂຶ້ນເລື້ອຍໆ ແລະ ສິນຄ້າອຸປະໂພກ-ບໍລິໂພກສ່ວນໃຫຍ່ບໍ່ຕິດສະຫລາກເປັນພາສາລາວ ແລະ ບໍ່ໄດ້ສະແດງລາຄາສິນຄ້າໃຫ້ຜູ້ບໍລິໂພກຮັບຮູ້ຢ່າງຈະແຈ້ງ ເຊິ່ງບັນຫາດັ່ງກ່າວໄດ້ກໍໃຫ້ເກີດມີຊ່ອງຫວ່າງສໍ້ໂກງ ແລະ ຂີ້ຕົວະຜູ້ບໍລິໂພກພາຍໃນຢ່າງກວ້າງຂວາງ ໃນນັ້ນໄດ້ສົ່ງຜົນກະທົບແຮງທີ່ສຸດຕໍ່ຜູ້ມີລາຍໄດ້ນ້ອຍ ແລະ ຜູ້ທຸກຍາກຫາເຊົ້າກິນຄ່ຳ.
ທ່ານ ຄຳຫລ້າ ປະຊາຊົນໜອງດ້ວງໄດ້ເປີດເຜີຍວ່າ: ສາເຫດທີ່ພາກໃຫ້ລາຄາສິນຄ້າຂຶ້ນໆລົງໆ ແລະ ແຕກຕ່າງກັນ ເປັນຍ້ອນພະນັກງານຈຳນວນໜຶ່ງທີ່ກ່ຽວຂ້ອງບໍ່ລົງເຮັດວຽກກວດກາສຳຫລວດຕົວຈິງ ແລະ ລະເມີດລະບຽບກົດໝາຍຈຶ່ງເຮັດໃຫ້ເກີດມີການລາຍງານແບບດອກໄມ້ ເຊິ່ງບັນຫາດັ່ງກ່າວມັນສ້າງໂອກາດ ແລະ ເງື່ອນໄຂໃຫ້ພໍ່ຄ້າແມ່ຄ້າຍິ່ງໄດ້ໃຈໃນການສວຍໂອກາດຂຶ້ນລາຄາສິນຄ້າດັ່ງກ່າວ. ສະນັ້ນຖ້າຕ້ອງການຢາກແກ້ໄຂບັນຫາແທ້ໆກໍຕ້ອງເຮັດແທ້ທຳຈິງ ແລະ ມີຄວາມເດັດຂາດໃນການຈັດຕັ້ງປະຕິບັດໜ້າທີ່ດ້ວຍຄວາມຮັບຜິດຊອບ, ໂປ່ງໃສ, ສາມາດກວດສອບ ແລະ ໃຫ້ຖືກທິດຄັກແນ່.
ແນວໃດກໍດີ ຄາລາອາຫານໃນທ້ອງຕະຫລາດທົ່ວໄປພວມເໜັງຕີແຮງໃນປັດຈຸບັນໂດຍສະເພາະຊີ້ນໝູເພີ່ມຂຶ້ນຈາກ 35.000 ກີບຕໍ່ກິໂລມາເປັນ 40.000 ກີບຕໍ່ກິໂລ, ຊີ້ງົວປະມານ 70.000 ກີບຕໍ່ກິໂລມາເປັນ 80.000 ກີບຕໍ່ກິໂລ, ຜັກສະລັດຈາກ 10.000 ກີບຕໍ່ກິໂລມາເປັນ 20.000 ກີບຕໍ່ກິໂລ.
ຂ່າວຈາກ: ສຳນັກຂ່າວສານປະເທດລາວ