ຂປລ. ກະຊວງແຮງງານ ແລະ ສະຫວັດດີການສັງຄົມ ໄດ້ຈັດການແຂ່ງຂັນສີມືແຮງງານ ແຫ່ງຊາດ ຄັ້ງທີ່ II ຂຶ້ນ ທີ່ນະຄອນຫລວງວຽງຈັນ, ເພື່ອຄັດເລືອກເອົານັກແຂ່ງຂັນ ຜູ້ທີ່ມີສີມືດີເລີດ ເຂົ້າຮ່ວມແຂ່ງຂັນສີມືແຮງງານອາຊຽນຄັ້ງທີ 11 ທີ່ຈະຈັດຂຶ້ນ ໃນ ທ້າຍເດືອນກັນຍາ 2016 ນີ້, ຢູ່ ປະເທດມາເລເຊຍ. ພິທີເປີດການແຂ່ງຂັນ ດັ່ງກ່າວ, ໄດ້ມີຂຶ້ນໃນວັນທີ 19 ພຶດສະພາ ນີ້, ຢູ່ ສູນພັດທະນາສີມືແຮງງານເວດສະພົງ ນະຄອນຫລວງວຽງຈັນ ໂດຍມີ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງ ຖວທ, ບັນດາ ຫົວໜ້າກົມ, ຮອງກົມ, ພ້ອມດ້ວຍນັກຮຽນ-ນັກສຶກສາ ເຂົ້່າຮ່ວມ.
ການຈັດການແຂ່ງຂັນສີມືແຮງງານ ຄັ້ງນີ້, ເປັນການເປີດໂອກາດໃຫ້ບັນດາຊາວໜຸ່ມ, ໄວໜຸ່ມ, ກຳມະກອນລາວ ບັນດາເຜົ່າ ໄດ້ສະແດງຄວາມຮູ້, ຄວາມສາມາດ, ສີມື ທັງເປັນການຊຸກຍູ້ສົ່ງເສີມ ໃຫ້ບັນດາຊາວໜຸ່ມເຫັນຄວາມສຳຄັນໃນການຝຶກວິຊາຊີບ ແລະ ພັດທະນາສີມືແຮງງານຫລາຍຂຶ້ນ. ເຊິ່ງການແຂ່ງຂັນດັ່ງກ່າວ, ປະກອບມີ 9 ສາຂາວິຊາຊີບຊ່າງ ຄື: ຊ່າງກໍ່, ຊ່າງໄມ້ເຄື່ອງເຮືອນ, ຊ່າງຕັດຫຍີບ ເຄື່ອງນຸ່ງແມ່ຍິງ, ຊ່າງຕິດຕັ້ງໄຟຟ້າໃນອາຄານ, ຊ່າງປຸງແຕ່ງອາຫານ, ອອກແບບໜ້າເວບໄຊ, ຊ່າງຈອດ, ເຕັກໂນໂລຊີລົດຍົນ ແລະ ອອກແບບກຣາຟິກ. ມີ ຜູ້ເຂົ້າຮ່ວມແຂ່ງຂັນທັງໝົດ 65 ຄົນ, ຍິງ 20 ຄົນ ທີ່ມາຈາກ, ວິທະຍາໄລ, ສະຖາບັນ, ໂຮງຮຽນ ທັງພາກລັດ ແລະ ເອກະຊົນ ເຂົ້າຮ່ວມແຂ່ງຂັນ ເຊິ່ງຜູ້ຊະນະເລີດໃນການແຂ່ງຂັນໃນແຕ່ລະສາຂາວິຊາ ຈະໄດ້ເຂົ້າຮ່ວມແຂ່ງຂັນສີມືແຮງງານອາຊຽນ ຄັ້ງທີ 11 ທີ່ປະເທດມາເລເຊຍ ໃນທ້າຍເດືອນກັນຍາ 2016 ນີ້.
ສປປ ລາວ ໄດ້ເຂົ້າຮ່ວມການແຂ່ງຂັນ ສີມືແຮງງານ ໃນລະດັບອາຊຽນ ຜ່ານມາ 8 ຄັ້ງ, ເປັນຜູ້ສັງເກດການ 1 ຄັ້ງ, ເຂົ້າຮ່ວມແຂ່ງຂັນ 7 ຄັ້ງ ສາມາດຍາດໄດ້ 1 ຫລຽນເງິນ ຈາກສາຂາວິຊາຊ່າງຕິດຕັ້ງໄຟຟ້າໃນອາຄານ ໃນການແຂ່ງຂັນສີມືແຮງງານ ອາຊຽນ ຄັ້ງທີ 10 ທີ່ ປະເທດຫວຽດນາມ ແລະ ໄດ້ຮັບໃບຢັ້ງຢືນ ສີມືແຮງງານລະດັບອາຊຽນ 11 ໃບ.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!