ການກໍ່ສ້າງເສັ້ນທາງເບຕົງແຕ່ສີ່ແຍກໄຟແດງດົງໂດກ-ໄຟແດງຕານມີໄຊ, ເມືອງໄຊທານີ, ນະຄອນຫລວງວຽງຈັນ, ຊຶ່ງໄລຍະທາງຍາວ 2,5 ກິໂລແມັດມີຄວາມຄືບໜ້າຫລາຍກວ່າ 70% ແລະ ຈະເປີດໃຫ້ລົດແລ່ນສັນຈອນສອງຝາກທາງໃນເດືອນມິຖຸນານີ້.
ທ່ານ ຫຸມພັນ ພະດວງເດດ ຜູ້ຮັບພິຊອບໂຄງການກໍ່ສ້າງເສັ້ນທາງດັ່ງກ່າວໃຫ້ຮູ້ວ່າ: ເສັ້ນ ທາງດັ່ງກ່າວມີຄວາມຍາວ 2,5 ກິໂລແມັດ, ກວ້າງ 25 ແມັດ, ປູເບຕົງໜາ 23 ຊັງຕີແມັດ, ມີມູນຄ່າກໍ່ສ້າງຫລາຍກວ່າ 10 ລ້ານໂດລາສະຫະລັດ, ໂດຍແມ່ນບໍລິສັດວິສະວະກໍາຢູນນານເປັນຜູ້ລົງທຶນ ແລະ ຮັບເໝົາກໍ່ສ້າງ, ຊຶ່ງໄດ້ເລີ່ມລົງມືກໍ່ສ້າງແມ່ນແຕ່ຕົ້ນປີ 2015 ແລະ ມາຮອດປັດຈຸບັນເຫັນວ່າມີຄວາມຄືບໜ້າຫລາຍກວ່າ 70% ໂດຍສະ
ເພາະແມ່ນການເລັ່ງປູເບຕົງຝາກເບື້ອງບ້ານຊ້າງຄູ້ໃຫ້ສໍາເລັດພາຍໃນເດືອນນີ້ ແລະ ຄາດວ່າຈະສາມາດເປີດໃຫ້ລົດສັນຈອນໄປມາສອງຝາກທາງໄດ້ໃນທ້າຍ ເດືອນມິຖຸນານີ້. ສ່ວນສັງຄົມມີຄວາມສົນໃຈວ່າເສັ້ນທາງດັ່ງກ່າວມີພາຫະນະສັນຈອນໄປມາເປັນຈໍານວນຫລາຍເປັນຫຍັງຈຶ່ງເຮັດຄູກາງທາງກວ້າງແທ້? ທ່ານຫົວໜ້າຮັບພິຊອບໂຄງການຕອບວ່າ: ການເຮັດຄູກາງທາງໃຫຍ່ກໍເພື່ອໃຫ້ລົດທີ່ຈະລ້ຽວກັບໃນຈຸດລ້ຽວມີຄວາມສະດວກປອດໄພດີ.
ຂ່າວຈາກ: ລາວພັດທະນາ